စက်သုံးဆီ​ဈေး တစ်လီတာ ၂,၀၀၀ ကျပ်အထက် ပထမဆုံးအကြိမ်​ရောက်

●စစ်တပ် အာဏာမသိမ်းခင်ကနှင့်နှိုင်းယှဥ်လျှင် ​ဈေးသုံးဆမြင့်တက်လာခြင်းဖြစ်

အာဏာသိမ်းပြီး ၁၃ လကျော်အကြာတွင် စက်သုံးဆီတစ်လီတာလျှင် ကျပ် ၂၀၀၀ကျော်သို့ ပထမဆုံးအကြိမ် စံချိန်တင်မြင့်တက်လာကြောင်းဈေးကွက်အတွင်းမှ သိရသည်။

ရန်ကုန်ဈေးကွက်တွင် ဓာတ်ဆီ တစ်လီတာကိုယ​နေ့ ကျပ် ၁,၉၁၀ ကျပ်မှ ၁,၉၇၅ ကျပ်အထိ ပေါက်ဈေးရှိသော်လည်း အခြားဒေသအာလုံးတွင် ကျပ် ၂,၀၀၀အထက်ကို မတ်လ ၃ ရက်တွင်စံချိန်တင်မြင့်တက်သွားခြင်းဖြစ်သည်။ ရန်ကုန်မြို့ရှိ ဆိုင်များတွင်ပင် စစ်​ကောင်စီက​ဒေါ်လာ​ရောင်း​ပေး​သောဆိုင်များတွင် ​ဈေးအနည်းငယ်နည်း​သော်လည်း ​အချို့ဆိုင်များမှာ ယ​​​​နေ့တွင်ပင် တစ်လီတာ ၂,၀၀၀ ကျပ်​ကျော်​နေပြီဖြစ်သည်။

နိုင်ငံတော်အာဏာကို စစ်တပ်က မသိမ်းယူခင် ၂၀၂၁ ဇန်နဝါရီ ၃၁ ရက်က အောက်တိန်း၉၂ တစ်လီတာကို ၆၆၅ ကျပ်၊အောက်တိန်း ၉၅ တစ်လီတာကို ၇၆၅ကျပ် နှင့် ဒီဇယ်တစ်လီတာကို ၆၉၅ကျပ်သာ ရှိခဲ့သည်။ စစ်တပ်အာဏာသိမ်းထားသည့် တစ်နှစ်ကျော်အတွင်း စက်သုံးဆီ တစ်လီတာကို ဈေး ၂၀၀ ရာခိုင်းနှုန်း​(သုံးဆ)ကျော်မြင့်တက်လာခြင်းဖြစ်သည်။

Public Service Announcement

ရန်ကုန်ဈေးကွက်တွင် ယ​​​နေ့ (မတ် ၃ရက်) နံနက်၌ အောက်တိန်း တစ်လီတာကို ၁,၉၁၀ကျပ်ဖြင့် ဈေးဖွင့်ခဲ့သော်လည်းညနေပိုင်းတွင် တစ်လီတာကို ၁,၉၃၅ ကျပ်မှ ၁,၉၉၅ ကျပ်အထိတက်လာသည်။ မတ် ၃ ရက်တွင် အောက်တိန်း ၉၅ တစ်လီတာကို ၁,၉၇၅ ကျပ်နှင့် ဒီဇယ်တစ်လီတာကို ၁,၉၂၅ ကျပ်အထိ ဈေးမြင့်တက်လာသည်။ အချို့ဆိုင်များတွင် ​အောက်တိန်း ၉၂ တစ်လီတာလျှင် ၁,၉၉၅ ကျပ်၊ ၉၅ တစ်လီတာလျှင် ၂၁၀၅ကျပ်နှင့် ဒီဇယ်တစ်လီတာလျှင် ၁,၉၉၅ ကျပ်​ဈေးအထိ ဈေးတက်သွားသည်။

မန္တလေး၊ပဲခူးနှင့် အခြားတိုင်းဒေသကြီးများတွင် အောက်တိန်း ၉၂ တစ်လီတာကို ၂,၀၁၅ကျပ်နှင့် အောက်တိန်း ၉၅ တစ်လီတာကို ၂၁၅၅ ကျပ်အထိ မြင့်တက်ကုန်သည်။ ပရီမီယံ ဒီဇယ် တစ်လီတာကို ၂,၀၄၅ကျပ်အထိ​ ဈေး​ပေါက်လာသည်။

ရန်ကုန်မြို့တွင် မတ်လ ၁ ရက်က အောက်တိန်း ၉၂ တစ်လီတာကို ၁,၇၆၀ကျပ်၊ အောက်တိန်း ၉၅ တစ်လီတာကို၁,၈၁၅ကျပ်နှင့် ဒီဇယ် တစ်လီတာကို ၁,၇၃၅ ကျပ် အထိသာ​ဈေးရှိရာမှ ရက်ပိုင်းအတွင်း တစ်လီတာလျှင် ၂၀၀ ကျပ်​ကျော်ရုတ်တရက်​ ဈေးတက်လာခြင်းဖြစ်သည်။

“ရှေ့ဆက်ဆီဈေးက ဆက်တက်မှာ ရန်ကုန်မှာလဲ မနက်ဖြန်ဆို တစ်လီတာ ၂,၀၀၀ကျော်တော့မှာ”ဟု အငှားယာဉ်မောင်းတစ်ဦးကပြောသည်။

လက်ရှိ ဆီဈေးမြင့်တက်လာခြင်းမှာ နိုင်ငံတွင်း ကျပ်ငွေတန်ဖိုး တရှိန်ထိုးကျဆင်းခြင်းနှင့် ရုရှားက ယူကရိန်းအပေါ် ကျူးကျော်စစ်ကြောင့် ကမ္ဘာ့စက်သုံးဆီဈေး ပိုမိုမြင့်တက်လာခြင်းကြောင့်ဖြစ်သည်ဟု စက်သုံးဆီလုပ်ငန်းရှင်တစ်ဦးက ပြောသည်။ စက်သုံးဆီ​ဈေးစံချိန်တင်မြင့်တက်လာခြင်း​ ၊မီးပျက်ခြင်း ၊​​ငွေ​ကြေး​ဖောင်းပွခြင်းတို့ကြောင့် သယ်ယူပို့​ဆောင်စာရိတ် ၊ကုန်​ဈေးနှုန်းများ ပိုမိုမြင်တက်လာမည်ဖြစ်​ကြောင်းလုပ်ငန်းရှင်တစ်ဦးကလည်း သုံးသပ်သည်။

ထိုပြင် မြန်မာနိုင်ငံက စက်သုံးဆီလုပ်ငန်းရှင်များကို ဆီရောင်းချမှုကို ပိုမိုတင်းကျပ်လိုက်ခြင်းကြောင့် ပြည်တွင်းစက်သုံးဆီတင်သွင်းမှုမိုပိုခက်ခဲလာသည်ဟု ၎င်းကဆိုသည်။