စစ်ကိုင်းတိုင်းအတွင်းရှိ မြို့နယ်အများစုတွင် အင်တာနက်လိုင်းများဖြတ်တောက်ခံရပြီးနောက် ဒီပဲယင်းမြို့နယ်အတွင်း စစ်ကောင်စီတပ်က စစ်ကြောင်းထိုးနေကြောင်း ဒေသကာကွယ်ရေးတပ်ဖွဲ့များက ပြောသည်။
ဒီပဲယင်းညီနောင်များအဖွဲ့၏ ယနေ့(မတ် ၄)နံနက်ထုတ်ပြန်ချက်အရ ဒေသခံပြည်သူကိုးဦးအား စစ်ကောင်စီတပ်မှ မီးရှို့သတ်ဖြတ်ခဲ့ကြောင်း ဖုန်းသတင်းဖြင့် အတည်ပြုနိုင်ခဲ့သည်ဟု ဖော်ပြထားသည်။
ယမန်နေ့(မတ် ၃)ည ၁၁နာရီတွင် အင်တာနက်လိုင်းများ ဖြတ်တောက်ခံရပြီး ယနေ့နံနက်အစောပိုင်းတွင် စစ်ကောင်စီတပ်မှ စိုင်းပြင်မြို့အရှေ့ဘက်ရှိ မင်းဆွေနှစ်ကျေးရွာအား ဝင်ရောက်စီးနင်း၍ ပြည်သူအချို့ကို မီးရှို့သတ်ဖြတ်ခဲ့ခြင်းဖြစ်ကြောင်း Free Rangers – Depryin အဖွဲ့မှ တော်လှန်ရေးရဲဘော်တစ်ဦးက အတည်ပြုသည်။
“လောလောဆယ် ကျွန်တော်တို့ ချိတ်ဆက်ရသလောက် ကင်းသမားခုနှစ်ဦး မီးရှို့အသတ်ခံရတယ်လို့တော့ သိထားတယ်။ ထပ်မံစုံစမ်းနေဆဲပဲ”ဟု ၎င်းက ပြောသည်။
အကြမ်းဖက်စစ်ကောင်စီသည် စစ်ကိုင်းတိုင်းအတွင်းရှိ မြို့နယ်များတွင် အင်တာနက်လိုင်းများဖြတ်တောက်ခြင်းကို ယမန်နေ့(မတ် ၃)ည ၁၁ နာရီက စတင်လုပ်ဆောင်ခဲ့ရာ တစ်တိုင်းလုံးတွင် စစ်ကိုင်း၊ ကလေး၊ မုံရွာနှင့် ရွှေဘို စသည့်မြို့နယ်လေးခုသာ အင်တာနက်လိုင်းရရှိကြောင်း ဒေသခံများထံမှ သိရသည်။