ကန်ပက်လက်မြို့နယ် ချင်းကာကွယ်ရေးတပ်ဖွဲ့နှင့် စစ်ကောင်စီတပ်တို့ နှစ်လအတွင်း တိုက်ပွဲ ကိုးကြိမ်ဖြစ်ခဲ့ရာ စစ်ကောင်စီတပ်မှ ၅၇ဦးသေဆုံးပြီး ၂၆ဦး ဒဏ်ရာရခဲ့ကြောင်း ကန်ပက်လက် CDFက ယနေ့ ထုတ်ပြန်သည်။
ချင်း-မကွေး နယ်စပ်ရှိ ကန်ပက်လက်၊ ဆောမြို့နယ်တို့၌ ဇန်နဝါရီနှင့် ဖေဖော်ဝါရီအတွင်း တိုက်ပွဲဖြစ်ပွားမှု အခြေ အနေများကို ထုတ်ပြန်ခဲ့ခြင်းဖြစ်သည်။
နှစ်လအတွင်း ကန်ပက်လက်မြို့၊ ဆောမြို့၊ ဆောမြို့နယ် အညာကတင်းရွာ၊ အပေါရွာအနီး၊ ဆွဲလွဲကျင်းနှင့် မဆာတွီကြား၊ မောချောင်းရွာအနီး၊ ကျင်ဒွေး- မောချောင်းကြား၊ မဆာတွီ-ဆွဲလွဲကျင်းကြား စသည့်နေရာများ၌ တိုက်ပွဲဖြစ်ခဲ့သည်ဟုဆိုသည်။ တိုက်ပွဲအတွင်း ကန်ပက်လက် CDF တပ်ဖွဲ့ဝင် တစ်ဦးကျဆုံးခဲ့ကြောင်း ဖော်ပြထားသည်။
ထို့ပြင် ဇန်နဝါရီ ၃၁ရက်က ကန်ပက်လက်မြို့တွင်းတိုက်ပွဲတွင် စစ်ကောင်စီရမ်းသမ်းပစ်ခတ်သောလက်နက်ကြီးထိမှန်ကာ ပြည်သူတစ်ဦးသေဆုံးခဲ့ကြောင်းဖော်ပြထားသည်။
Public Service Announcement
အကြမ်းဖက်စစ်ကောင်စီသည် ဖေဖော်ဝါရီ ၂၁ရက်တွင် မောချောင်းရွာရှိ ပြည်သူလူထု နေအိမ် လေးလုံးအား မီးရှို့ဖျက်ဆီးခဲ့ကြောင်း၊ ထို့ပြင် မဆာတွီကျေးရွာနှင့် မောချောင်းကျေးရွာ လူနေအိမ်များအားဖောက်ထွန်းကာ ပစ္စည်းများခိုးယူခဲ့ကြောင်း ကန်ပက်လက် CDFက ထုတ်ပြန်သည်။
ဖေဖော်ဝါရီ ၂၈ရက်ကလည်း မဆာတွီကျေးရွာရှိ နွားနောက် နှစ်ကောင်အား ပစ်သတ်ကြပြီး တစ်ကောင်ကို ချက်စားကြကာ တစ်ကောင်ကို ကားပေါ်တင် ယူဆောင်သွားကြောင်း ဖော်ပြထားသည်။
