လျှပ်စစ်ဓာတ်အားထုတ်လုပ်မူလျော့ကျလာမည့်ဖြစ်၍ နိုင်ငံအတွင်းနေရာအချို့တွင်လာမည့်မတ်လ ၁၂ ရက်မှ ၁၈ရက်အတွင်း တစ်ပတ်ကြာ ၂၄ နာရီလုံးလျှပ်စစ်မီးပြတ်တောက်မည်ဟု အကြမ်းဖက်စစ်ကောင်စီထိန်းချုပ်ထားသည် လျှပ်စစ်နှင့်စွမ်းအင်ဝန်ကြီးဌာနက ယနေ့ထုတ်ပြန်လိုက်သည်။
ရခိုင်ကမ်းလွန်ရှိ ရွှေသဘာဝဓာတ်ငွေ့စီမံကိန်းတွင် ပိုက်လိုင်းအသစ်ချိတ်ဆက်ခြင်းကြောင့် လျှပ်စစ်ဓာတ်အားထုတ်လုပ်မှု ၃၃၄ မဂ္ဂါဝပ်လျော့ကျခြင်းအပါအဝင် ဓာတ်အားစနစ်အတွင်း မဂ္ဂါဝပ်၁၃၀၄ လျော့ကျသွားမည်ဖြစ်၍မတ်လ ၁၂ ရက်မှ မတ်လ၁၈ ရက်အတွင်းနေရာအချို့တွင် ၂၄ နာရီလုံးလျှပ်စစ်မီးဖြတ်တောက်ရခြင်းဖြစ်သည်ဟု အာဏာသိမ်းစစ်ကောင်စီ၏ ဝန်ကြီးဌာနကဆိုသည်။
“စစ်တပ်က အာဏာသိမ်းပြီးတဲ့နောက်ပိုင်း ဘာတခုမှ ကောင်းကျိုးမရှိဘူး။ဆီဈေးတွေလည်းတက်၊ မီးတွေလည်း ပျက် ။ ကုန်ဈေးနှုန်းက တက်တယ်။ အခုလို ၂၄ နာရီတောင် ပျက်မယ်ဆိုတော့ တော်တော်တရားလွန်သွားပြီ” ဟု ရန်ကုန်မြို့နေပြည်သူတစ်ဦးကပြောသည်။
နိုင်ငံတစ်ဝန်းမီးပြတ်တောက်မှု ပိုမိုးဆိုးရွာလာသလို စက်သုံးဆီဈေးများလည်း စံချိန်တင်မြင့်တက်နေ၍ ကုန်ထုတ်လုပ်မှု ဝန်ဆောင်မှုစာရိတ်များပိုကုန်ကျ၍ ကုန်ဈေးနှုန်းများလည်း မြင့်တက်လာနိုင်ကြောင်းစီးပွားရေးသမားအချို့ကပြောသည်။
Public Service Announcement
စစ်တပ်က နိုင်ငံတော်အာဏာကို အဓမ္မသိမ်းယူပြီးနောက် နိုင်ငံအတွင်း လျှပ်စစ်ဓာတ်အားပေးစနစ်ပျက်စီးပြိုလဲလာခဲ့သည်။ စစ်တပ်အာဏာမသိမ်းခင်အချိန်က နိုင်ငံအတွင်း လျှပ်စစ်ထုတ်လုပ်နိုင်မှုသည် မဂ္ဂါဝပ် ၄၂၀၀ရှိပြီး စစ်တပ်အာဏာသိမ်းပြီး ၂၁၇၇ မဂ္ဂါဝပ်သာ ထုတ်လုပ်နိုင်တော့သည်ဟု စစ်ကောင်စီဝန်ကြီးဌာနက ဝန်ခံထုတ်ပြန်ထားသည်။
လက်ရှိအချိန်တွင် တစ်နိုင်ငံတွင် လျှပ်စစ်သုံးဆွဲမူသည် နေ့ဘက်တွင် မဂ္ဂါဝပ် ၃၄၀၀ရှိပြီး ညဘက်တွင် မဂ္ဂါဝပ် ၃၆၀၀ရှိသည်။ ထုတ်လုပ်မူနှင့် သုံးစွဲခြင်းမလုံလောင်ခြင်းကြောင့် အလှည့်ကျမီးပေးစနစ်ကို ကျင့်သုံးနေရသည်ဟုဆိုသည်။
စစ်ကောင်စီ၏ အဆိုအရ ယခင်အရပ်သားအစိုးလက်ထက်တွင် အကောင်အထည်ဖော်ခဲ့သည့် မဂ္ဂါဝပ် ၇၅၀ထွက်သည့် LNG ဓာတ်အားပေးစက်ရုံနှစ်ခုတွင်LNGဈေးနှုန်းမြင့်တက်လာခြင်းကြောင့် ရပ်တန့်ထားသည်ဟုဆိုသည်။ သို့သော်LNG ဓါတ်အားပေးစက်ရုံများကို စစ်ကောင်စီက ပိုက်ဆံမပေးတော့သဖြင့် ရပ်နားသွားခြင်းဖြစ်ကြောင်း People’s Spring က စုံစမ်းသိ့ရသည်။ ထို့ကြောင့် စစ်ကောင်စီက အာဏာသိမ်းပြီးနောက် လက်နက်များဝယ်ယူရန် ၊အာဏာသိမ်းခေါင်းဆောင် မင်းအောင်လှိုင်အတွက် ဗိုလ်ရှုသဘင်ကျင်းပရန် စသည်တို့တွင် ငွေများစွာအကုန်အကျခံသော်လည်း လျှပ်စစ်မီးပေးရန်အတွက် အကုန်အကျများစွာမခံသည်ကိုတွေ့ရသည်။
ဓာတ်အားလိုင်းများပြတ်တောက်ခြင်းကြောင့် ဘီလူးချောင်းရေအားလျှပ်စစ်စီမံကိန်းမှဓာတ်အား မဂ္ဂါဝပ် ၂၂၀ ကို မဟာဓာတ်အားလိုင်းသို့မပိုနိုင်ဟုလည်းဆိုထားသည်။ ထိုအပြင် ယခုအခါ ရွှေဘာဝဓာတ်ငွေ့စီမံကိန်းတွင် အသစ်ထွက်လာသည့် သဘာဝဓာတ်ငွေ့တွင်းဖြင့် ပိုင်းလိုင်းချိတ်ရန်အတွက် ဓာတ်ငွေ့ထုတ်လုပ်မှုခေတ္တရပ်ဆိုင်းမည်ဟုဆိုပြန်သည်။ထိုကြောင့် မဂ္ဂါဝပ် ၃၃၄ ထပ်မံလျော့နည်းမည်ဟုစစ်ကောင်စီကဆိုသည်။ စသည်တို့ကြောင့် ပုံမှန်ထုတ်လုပ်မှုထက် ဓာတ်အား ၁၃၀၄ မဂ္ဂါဝပ် လျော့နည်းနေကြောင်းစစ်ကောင်စီက ထုတ်ပြန်ထားသည်။
