ဖာပွန်ခရိုင်ထဲက ကျေးရွာတစ်ရွာမှာ မတ်လ ၅ ရက်ညက လက်နက်ကြီးထိမှန်လို့ ကိုယ်ဝန်ဆောင်တစ်ဦးနဲ့ ကလေးသုံးဦးအပါအဝင် ရွာသား ၇ ဦးသေဆုံးသွားခဲ့ပြီး လေးဦးဒဏ်ရာရရှိသွားခဲ့တယ်လို့ ကရင်ငြိမ်းချမ်းရေးအထောက်အကူပြုကွန်ရက် (KPSN) က သတင်းထုတ်ပြန်ပါတယ်။
ဘူးသိုမြို့နယ် မယ်ကလောကျေးရွာအုပ်စု ကလော်ဒေးကျေးရွာမှာ ဖြစ်ပါတယ်။
သေဆုံးသွားတဲ့ ကလေးသုံးဦးစလုံးဟာ မိန်းကလေးတွေပဲဖြစ်ကြပြီး ဒဏ်ရာရရှိသူတွေထဲမှာလည်း ကလေးငယ်နှစ်ဦးပါဝင်တယ်လို့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီတပ်ဟာ ကျေးရွာတွေကို တမင်ရည်ရွယ်ပစ်ခတ်ပြီး အခုလုပ်ရပ်ဟာ စစ်ရာဇဝတ်မှုနဲ့ လူသားဖြစ်မှုကိုဆန့်ကျင်တဲ့ ရာဇဝတ်မှုဖြစ်တယ်လို့ KPSN က ဆိုပါတယ်။
Public Service Announcement
ဒါ့အပြင် စစ်ကောင်စီဟာ ဒရုန်းအသုံးပြုပြီး စစ်ဘေးရှောင်နဲ့ ကျေးရွာတွေရဲ့တည်နေရာတွေကို စုံစမ်းကာ လက်နက်ကြီး၊ လေယာဉ်တွေနဲ့ လာရောက်တိုက်ခိုက်မှုတွေ လုပ်ဆောင်နေတာဖြစ်ပါတယ်။
နိုင်ငံတကာအနေနဲ့ စစ်ကောင်စီကို ပိတ်ဆို့အရေးယူမှုတွေလုပ်ဆောင်ဖို့၊ စစ်လက်နက်ပစ္စည်းတွေ လေယာဉ်ဆီတွေ မရောင်းချပေးဖို့၊ အခက်ကြုံနေရတဲ့ စစ်ဘေးရှောင်တွေအတွက် နယ်စပ်ဖြတ်ကျော်ကူညီပေးမှုတွေ ပိုမိုလုပ်ဆောင်ပေးနိုင်ဖို့ စတဲ့အချက်တွေကို KPSN က တောင်းဆိုထားပါတယ်။
