●မီးရှို့ ဖျက်ဆီးခံရသောအိမ်လေးလုံးနှင့်စစ်ဘေးရှောင်များကို ကန်ပက်လက်(ပအဖ)ကဆန်အိတ်၃၀နှင့်ကျပ် ၁၇သိန်းကျော်ထောက်ပံ့
ချင်းပြည်နယ်ကန်ပက်လက်မြို့နယ်တွင် တိုက်ပွဲသုံးကြိမ်ဖြစ်ပွားပြီး စစ်ကောင်စီတပ်သား ၆ ဦးခန့်သေဆုံးခဲ့ကြောင်း CDF-ကန်ပက်လက် ပြန်ကြားရေးတာဝန်ခံကပြောသည်။
ယနေ့ နံနက်(မတ်၇ရက်)တွင် ကန်ပက်လက်မြို့တွင်းကို စစ်ကောင်စီဖက်မှ အင်အား ၁၅၀ဖြင့် စစ်ကြောင်းသုံးကြောင်းဖြင့် ထိုးစစ်ဆင်လာစဉ်တွင် ချင်းဒေသကာ ကွယ်ရေးတပ်- CDF (ကန်ပက်လက်)နှင့် ပူးပေါင်းတပ်ဖွဲ့များကတိုက်ခိုက်ခဲ့ခြင်းဖြစ်သည်။
“ဒီနေ့သူတို့ကစစ်ကြောင်း သုံးကြောင်းခွဲပြီးတက်လာတယ်။ တချို့ကလေယာဉ်ကွင်းဆောက်ဖို့ လျာထားတဲ့နေရာကတက်လာလို့ အာ့မှာ တိုက်ပွဲဖြစ်တာ၊”ဟု CDF-ကန်ပက်လက် ပြန်ကြားရေးတာဝန်ခံက ပြောသည်။
Public Service Announcement
နံနက် ၇နာရီမှ ၉နာရီအထိ တိုက်ပွဲသုံးကြိမ်ဖြစ်ပွားခဲ့ခြင်းဖြစ်ပြီးတိုက်ပွဲများအတွင်း အကြမ်းဖက်စစ်ကောင်စီဘက်မှ ၆ဦးသေဆုံးကာဒေသခံကာကွယ်ရေးတပ်များဘက်မှ ထိခိုက်ကျဆုံးမှုမရှိကြောင်း CDF-ကန်ပက်လက်မှ ပြန်ကြားရေးတာဝန်ခံကဆက် ပြောသည်။
ညနေပိုင်းတွင်လည်းတိုက်ပွဲထပ်မဖြစ်သော်လည်းစစ်ကောင်စီတပ်ဘက်က မြို့တွင်းမှ လက်နက်ကြီးများဖြင့်ရမ်းသမ်းပစ်ခတ်နေသည်ဟု ၎င်းက ရှင်းပြသည်။
လက်ရှိတိုက်ပွဲအခြေအနေများကြောင့် လက်မွန်- ခါးပန်လမ်းပိုင်း၊ လက်မွန် – ကျော့တော်လမ်းပိုင်း၊ အညာကတင်း-ကန်းလောင်းလမ်းပိုင်းနှင့် ဆော- ကန်ပက်လက်လမ်းပိုင်းတို့အား လုံးဝ အသုံးမပြုကြရန်CDF-ကန်ပက်လက်ကသတိပေးထုတ်ပြန်ထားသည်။
အကြမ်းဖက်စစ်ကောင်စီတပ်နှင့်CDF-Kanpetletတို့ကြား ဖေဖော်ဝါရီ ၂၇ ရက်တွင်လည်း မောချောင်းရွာနှင့်မဆာတွီရွာအကြား၌ တိုက်ပွဲဖြစ်ပွားခဲ့ပြီးအကြမ်းဖက်စစ်ကောင်စီတပ်သား ၂ ဦးသေဆုံးခဲ့သည်။
ထိုပြင် ဖေဖော်ဝါရီ ၂၈ ရက်တွင် ဆောမြို့နယ်၊ဆွဲလွဲကျင်းရွာနှင့်ကန်ပက်လက်မြို့နယ်၊မဆာတွီကျေးရွာအကြားတွင်လည်း ထပ်မံတိုက်ပွဲဖြစ်ပွားခဲ့ပြီး စစ်ကောင်စီတပ်သား ၁၀ ဦးခန့်သေဆုံးခဲ့သည်။ အလားတူမတ်လ ၄ ရက်တွင်လည်းတိုက်ပွဲများဆက်လက်ဖြစ်ပွားခဲ့သည်။
ထိုတိုက်ပွဲများအတွင်း မဆာတွီကျေးရွာနှင့်မောချောင်းကျေးရွာတို့မှပြည်သူတို့၏နေအိမ်မအချို့ မီးရှို့ဖျက်ဆီးခံခဲ့ရသည်။ မီးရှို့ဖျက်ဆီးခံခဲ့ရသောနေအိမ်လေးလုံး နှင့် စစ်ဘေးရှောင်များကို ကန်ပက်လက်မြို့နယ် ပြည်သူအုပ်ချုပ်ရေးအဖွဲ့ (ပအဖ) က ဆန်အိတ်၃၀နှင့်ငွေသား(၁,၇၅၃,၀၀၀)ကျပ်ထောက်ပံ့ပေးခဲ့သည်ဟု မတ် ၇ ရက်က ထုတ်ပြန်ထားသည်။
