▪️စစ်တပ်၏ အကြမ်းဖက်မှုများကို ပြင်းထန်စွာရှုံ့ချပြီး ထပ်တိုးအရေးယူရန် တိုက်တွန်း
ဥရောပသမဂ္ဂ(EU)သည် အမျိုးသားညီညွတ်ရေးအစိုးရ NUG ကို အသိအမှတ်ပြုကာ ကူညီထောက်ပံ့မှုများပေးရေးအတွက် ဥရောပပါလီမန်က ယမန်နေ့(မတ်လ ၁၀ ရက်) ထုတ်ပြန်သည်။
ဥရောပပါလီမန်က ထုတ်ပြန်သည့် မြန်မာ့အရေးဆုံးဖြတ်ချက်တွင် အမျိုးသားညီညွတ်ရေးအစိုးရ (NUG)၊ ပြည်ထောင်စုလွှတ်တော်ကိုယ်စားပြုကော်မတီ (CRPH) နှင့် အမျိုးသားညီညွတ်ရေးအတိုင်ပင်ခံကောင်စီ (NUCC)တို့ကို မြန်မာပြည်သူများ၏ ဒီမိုကရေစီဆန္ဒများကို ကိုယ်စားပြုသည့် တရားဝင်ကိုယ်စားလှယ်များအဖြစ် အသိအမှတ်ပြုရန် ထောက်ခံထားသည်။
“ဥရောပလွှတ်တော်ရဲ့ ထုတ်ပြန်ချက်ထဲမှာ NUCCကို အသိအမှတ်ပြုဖို့အတွက် ထောက်ခံလာတာ ထူးခြားချက်ပါပဲ။ မြန်မာနိုင်ငံအပေါ် အီးယူရဲ့ အရေးယူဆောင်ရွက်ချက်တွေအားကောင်းဖို့ အစဥ်တစိုက်ကြိုးပမ်းနေတဲ့ ဥရောပလွှတ်တော်အမတ်များကို ကျေးဇူးတင်ပါတယ်” ဟု ဥရောပရောက် NUG လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက ပြောသည်။
Public Service Announcement
စစ်တပ်က အာဏာသိမ်းပြီး တစ်နှစ်ကျော်လာချိန်တွင် ကလေးငယ် ၁၀၀ ကျော်အပါအဝင် ပြည်သူ ၁၅၀၀ ကျော်ကို သေဆုံးခဲ့ရပြီး အကြမ်းဖက်မှုများ ပိုတိုးလုပ်ဆောင်နေသည့် စစ်ကောင်စီကို ထပ်တိုးပိတ်ဆို့ဒဏ်ခတ်မှုများလုပ်ဆောင်ရန် ဥရောပပါလီမန်က တိုက်တွန်းသည်။
စစ်ကောင်စီ၏ အကြမ်းဖက်မှုများ ရက်စက်ကြမ်းကြုတ်မှုများကို ပြင်းထန်စွာထပ်မံရူတ်ချထားပြီး ၂၀၂၀ ရွေးကောက်ပွဲရလာဒ်ကို လေးစားရန်၊ ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံးကို ပြန်လွှတ်ပေးရန်နှင့် အရပ်သားအစိုးရပြန်လည်ပေါ်ထွန်းအောင်လုပ်ဆောင်ရန်တို့ကို ဥရောပပါလီမန်က တောင်းဆိုသည်။
