●စစ်ကောင်စီလက်အောက်ခံ တရားသူကြီးများကို အရေးယူရန်ဆောင်ရွက်မည်ဟုထုတ်ပြန်
မြင်းခြံခရိုင်တရားရုံးမှ အကြီးတန်းစာရေး ဦးသိန်းသန်းစိုးအား အကြမ်းဖက်စစ်ကောင်စီက ထောင်ဒဏ် (၃)နှစ် ချမှတ်လိုက်ခြင်းသည် တရားမဲ့အမိန့်ချမှတ်ခဲ့ခြင်းဖြစ်ပြီးကန့်ကွက်ရှုတ်ချကြောင်း NUG က ထုတ်ပြန်သည်။
နိုင်ငံတော်အာဏာ သိမ်းမှုအပေါ် အကြမ်းမဖက် အာဏာဖီဆန်ရေးလှုပ်ရှားမှု (CDM) ပြုလုပ်ဆန့်ကျင်နေသည့်မန္တလေးတိုင်းဒေသကြီး၊ မြင်းခြံခရိုင်တရားရုံးမှ အကြီးတန်းစာရေးဦးသိန်းသန်းစိုးအား အကြမ်းဖက်စစ်ကောင်စီကဖမ်းဆီးကာ ရာဇသတ်ကြီး ပုဒ်မ ၅၀၅ – က ဖြင့် မတ်လ ၂၁ရက်တွင် ထောင်ဒဏ် (၃) နှစ်ချမှတ်ခဲ့သည်။
ဦးသိန်းသန်းစိုးအား ယခုကဲ့သို့ ဖမ်းဆီးအမိန့်ချခြင်းအပေါ် အမျိုးသားညီညွတ်ရေးအစိုးရ၊ တရားရေးဝန်ကြီးဌာနက တရားမဲ့ အမိန့်ချမှတ်ခြင်းဖြစ်ကြောင်း ကြေညာခြင်းဟုခေါင်းစဥ်တပ်ကာယနေ့ (မတ် ၂၂ ရက်)ကန့်ကွက်ရှုတ်ချခဲ့ခြင်းဖြစ်သည်။
Public Service Announcement
အကြမ်းဖက်စစ်ကောင်စီ၏ လက်အောက်ခံ တရားရုံးများတွင် ဆက်လက်တာဝန်ထမ်းဆောင်နေသည့် တရားသူကြီးများချမှတ်သော အမိန့်များသည် တရားဝင်မှုမရှိကြောင်း အမျိုးသားညီညွတ်ရေးအစိုးရက ထုတ်ပြန်ကြေညာထားပြီးဖြစ်သည်။ မန္တလေးတိုင်းဒေသကြီး၊ မြင်းခြံခရိုင်တရားရုံးမှ အကြီးတန်းစာရေး ဦးသိန်းသန်းစိုးအပေါ် ၂၁.၃.၂၀၂၂ ရက်နေ့က ရာဇသတ်ကြီး ပုဒ်မ ၅၀၅ – က ဖြင့် ထောင်ဒဏ် (၃) နှစ်ချမှတ်ခဲ့ခြင်းသည်လည်းတရားမဲ့အမိန့်ချမှတ်ခဲ့ခြင်းသာဖြစ်သည်ဟုပါရှိသည်။ထိုကဲ့သို့ အမှန်တရားဘက်တော်သားများအပေါ် တရားမဲ့အမိန့်ချမှတ်နေကြသည့် တရားသူကြီးများအား ကန့်ကွက်ရှုတ်ချကြောင်းနှင့် အကြမ်းဖက်စစ်ကောင်စီ လက်အောက်ခံ တရားသူကြီးများအား အရေးယူဆောင်ရွက်နိုင်ရန် ဆက်လက်ဆောင်ရွက်သွားမည်ဖြစ်ကြောင်း ကြေငြာချက်တွင်ဖော်ပြထားသည်။
