မေ -၃၊၂၀၂၆။ဇော်ဝင်း/People’s Spring
တော်လှန်ရေး (၅)နှစ်ကျော်တဲ့အထိ စိတ်ဓာတ်မကျဘဲပါဝင်နေတဲ့ အကြမ်းမဖက်အာဏာဖီဆန်ရေး (CDM)ဝန်ထမ်းတွေ စည်းလုံးကြဖို့ ဂုဏ်ပြုတွေ့ဆုံဆွေးနွေးခဲ့တယ်လို့ ကရင်နီပြည်နိုင်ငံ့ဝန်ထမ်းအကြမ်းမဖက်အာဏာဖီဆန်ရေးလှုပ်ရှားမှုကောင်စီ (KSCSC-CDM) တာဝန်ရှိသူက ပြောပါတယ်။
ကရင်နီပြည်ကြားကာလအုပ်ချုပ်ရေးကောင်စီ (IEC)မှာ ပါဝင်ဆောင်ရွက်နေတဲ့ ထွေအုပ် CDM တွေက ဦးဆောင်ပြီး ထွေအုပ် CDM တွေတွေ့ဆုံပွဲအစီအစဥ်ကို မနေ့က(မေလ ၂ ရက်)ကရင်နီပြည်နယ်မှာ ပြုလုပ်ခဲ့တယ်လို့ ဆိုပါတယ်။
ရာထူး၊ လစာတွေစွန့်လွတ်ပြီးပြည်သူ့တော် လှန်ရေးမှာပါဝင်ပေးဆပ်ခဲ့မှုတွေအတွက် CDM တွေကိုဂုဏ်ပြုအားပေးခဲ့တာလို့ အသိပေးပါတယ်။
Public Service Announcement
စစ်အာဏာရှင်စနစ်အပါအဝင် အာဏာရှင်စနစ် မှန်သမျှ ကျဆုံးရေးနဲ့ စနစ်ပြောင်းပြည်သူ့ တော်လှန်ရေးကနေ ဖက်ဒရယ်ဒီမိုကရေစီ ပြည်ထောင်စုနိုင်ငံတော်ပေါ်ထွန်းလာတဲ့ အထိ CDM အဖြစ် တတ်စွမ်းရာ ကဏ္ဍအသီးသီးကနေ အတူတကွ တော်လှန်တိုက်ပွဲဝင်ကြဖို့လည်း တိုက်တွန်းခဲ့တယ်လို့ သိရပါတယ်။
KSCS ရဲ့စာရင်းအရ စစ်တပ်အာဏာသိမ်းပြီးနောက်ပိုင်းကရင်နီပြည်နယ်မှာ အကြမ်းမဖက်အာဏာဖီဆန်တဲ့ CDM လှုပ်ရှားမှုမှာ ပါဝင်ခဲ့တဲ့ နိုင်ငံ့ဝန်ထမ်းပေါင်း ၅,၆၀၀ကျော်ရှိပါတယ်။
တော်လှန်ရေးကာလအတွင်း ကျဆုံးခဲ့တဲ့ CDM ဝန်ထမ်းမိသားစုတွေအတွက် ထောက်ပံ့မှု တွေ နဲ့ အသက် ၆၀ပြည့် CDM တွေကိုကူညီဖို့လည်း ကြိုးပမ်းနေတယ်လို့ KSCSက ထုတ်ပြန်ထားပါနယ်။
တစ်နိုင်ငံလုံးအတိုင်းအတာအရ စစ်တပ် အာဏာသိမ်းလို့ အကြမ်းမဖက်အာဏာဖီဆန်ရေး(CDM) အစီအစဥ်မှာပါဝင်ခဲ့တဲ့ အစိုးရဝန်ထမ်း လေးသိန်းထက် မနည်းရှိခဲ့တယ်လို့ သိရပါတယ်။
လွန်ခဲ့တဲ့ နှစ်နှစ်လောက်ကတည်းက CDM ဝန်ထမ်းအများစုရဲ့ဘဝရပ်တည်မှုတွေဟာ အခက်အခဲပေါင်းစုံနဲ့ ပိုရင်ဆိုင်နေကြရတယ်လို့ သက်ဆိုင်သူတွေရဲ့ ထုတ်ဖော်ပြောဆိုမှုတွေ ရှိထားပါတယ်။
ဒါကြောင့် ဌာနတွင်းအလုပ်ပြန်ဝင်တဲ့ CDM ဝန်ထမ်းတွေရှိကာ အာဏာသိမ်းစစ်တပ်ရဲ့စည်းရုံးခံရတဲ့ CDM ဝန်ထမ်းတွေလည်းခံဝန်ထိုးရတာနဲ့ စောင့်ကြည့်ခံရတာတွေရှိတယ်လို့ သိရပါတယ်။
