မန္တလေးတိုင်းဝန်ကြီးချုပ် ဒေါက်တာဇော်မြင့်မောင် အဂတိမှုနဲ့စွပ်စွဲခံရတဲ့အမှုမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် သက်သေအဖြစ်ထွက်ဆိုမယ်လို့သိရပါတယ်။
အမှုအတွက် သက်သေစာရင်းမှာ ဒေါ်အောင်ဆန်းစုကြည်ကို ဒေါက်တာဇော်မြင့်မောင်က ထည့်သွင်းထားတာပါ။
လက်ရှိမှာ ဒေါက်တာဇော်မြင့်မောင်ကို စစ်ကောင်စီက ထောင်ဒဏ် ၄ နှစ်ချထားပြီး မန္တလေး အိုးဘိုထောင်မှာ ချုပ်နှောင်ထားကာ ကျန်ရှိတဲ့အမှုတွေအတွက် ထောင်တွင်းအထူးတရားရုံးမှာ စစ်ဆေးနေတာလည်းဖြစ်ပါတယ်။
မနေ့ က ဧပြီလ ၂၂ ရက်မှာ ဒေါက်တာဇော်မြင့်မောင်ကို အဂတိအမှုအတွက်စစ်ဆေးခဲ့တယ်လို့ တရား ရုံးအသိုင်းအဝိုင်းကနေသိရပါတယ်။
ဒေါ်အောင်ဆန်းစုကြည် သက်သေအဖြစ်ထွက်ဆိုမယ့်ရုံးချိန်းဟာ လာမယ့်ရက်သတ္တပတ်အတွင်းမှာဖြစ်နိုင်တယ်လို့သိရပါတယ်။
ဒါပေမယ့် စစ်ကောင်စီဟာ တရားခွင်ကို လူကိုယ်တိုင် လာရောက်ထွက်ဆိုခွင့်ပေးတာမျိုးမဟုတ်ဘဲ အွန်လိုင်းကတဆင့် ထွက်ဆိုတာမျိုးပဲ ဒေါ်အောင်ဆန်းစုကြည်ကိုခွင့်ပြုလိမ့်မယ်လို့ တရားရုံးအသိုင်းအဝိုင်းကပြောကြပါတယ်။
ဒေါက်တာဇော်မြင့်မောင်ဟာလည်း ဒေါ်အောင်ဆန်းစုကြည်ကို စွပ်စွဲထားတဲ့အမှုအတွက် သက်သေစာရင်းမှာ ပါခဲ့ပေမယ့် ကျန်းမာရေးအကြောင်းပြကာ နေပြည်တော်ကို စစ်ကောင်စီက သွားခွင့်မပြုခဲ့တာမျိုးရှိခဲ့ပါတယ်။