ရခိုင်ပြည်နယ် ကျောက်ဖြူမြို့မရဲစခန်းတွင် နယ်ထိန်းခေါင်းဆောင်ရဲကို ရဲတပ်သားတစ်ဦးက သေနတ်ဖြင့် ပစ်သတ်လိုက်ကြောင်း ဒေသခံများက ပြောသည်။
ကျောက်ဖြူမြို့မ ရဲစခန်းမှ နယ်ထိန်းခေါင်းဆောင် ရဲအုပ်အုန်းကျော်ဌေးအား ရဲတပ်သားစိုးလင်းအောင်က ယမန်နေ့(ဇူလိုင် ၂၉ရက်)ည ၁၀ နာရီခန့်တွင် သေနတ်ဖြင့် ပစ်သတ်ခဲ့ခြင်းဖြစ်သည်။
” သေနတ်သံ (၆)ချက်စကြားတယ်။ နောက်ထပ် (၆)ချက် ထပ်ကြားတယ်။ တစ်ယောက်တည်းကပဲ ပစ်လား။ အပြန်အလှန်ပစ်ခတ်တာတွေလား မသိဘူး”ဟု ရဲစခန်းအနီးနေသူတစ်ဦးက ပြောသည်။
ဇူလိုင် ၂၉ရက် ညက ကျောက်ဖြူမြို့မစခန်းမှူးနှင့် မြို့နယ်မှူး အပြောင်းအရွှေ့နှုတ်ဆက်ပွဲ ပြုလုပ်အပြီးတွင် ယင်းပစ်ခတ်မှုဖြစ်ခဲ့ခြင်းဟု ကျောက်ဖြူမြို့မရဲစခန်းမှ ရဲတပ်ဖွဲ့ဝင်တစ်ဦးက ပြောသည်။
Public Service Announcement
“အရက်မူးပြီး ဖြစ်တဲ့ ပြဿနာ။ အခုစခန်းမှူးရောမြို့နယ်မှူးရော စုံခုံအစစ်ခံနေရပြီ”ဟု အထက်ပါရဲကပြောသည်။
သေနတ်ဖြင့် ပစ်ခတ်ခဲ့သည့် ရဲတပ်သားစိုးလင်းအောင်သည် ယနေ့(ဇူလိုင် ၃၀ရက်)နံနက်အထိ ထွက်ပြေးလွတ်မြောက်နေသည်ဟု သတင်းရရှိသည်။
“စစ်တပ်ဘောမတဲ့ ကောင်တွေ(ရဲတပ်ဖွဲ့ဝင်များကိုဆိုလိုသည်) သူ့အကုသိုလ်နဲ့သူ လောင်နေပြီ”ဟု ကျောက်ဖြူဒေသခံတစ်ဦးက ပြောသည်။
ထပ်မံသိရှိရသော သတင်းများအရ သေနတ်ဖြင့် ပစ်ခတ်ခဲ့သည့် ရဲတပ်သား စိုးလင်းအောင်သည် ယနေ့(ဇူလိုင် ၃၀ရက်)နံနက်အထိ ထွက်ပြေးလွတ်မြောက် နေပြီး CDM ပြုလုပ်သွားသည်ဟုလည်း သတင်းထွက်ပေါ်နေသည်။
“ကိုစိုးလင်းအောင် CDM လုပ်သွားတယ်လို့ သိရတယ်။ ဘယ်အဖွဲ့နဲ့ ချိတ်ဆက်ပြီး CDM လုပ်တာ လဲတော့ မသိရသေးဘူး။ CDM လုပ်ချင်တဲ့ ရဲတွေကိုတော့ ကျွန်တော်တို့ ကူညီဖို့ အသင့်ပဲ”ဟု ဒေသခံ ရခိုင်တိုင်းရင်းသားတစ်ဦးက ပြောသည်။
