ဧပြီ−၈၊၂၀၂၆။အိမ်သွင်/People’s Spring
စစ်ကိုင်းတိုင်း၊ ရေဦးမြို့နယ်မှာ ဒုရဲမှူးတစ်ဦးကို စစ်တပ်က သေနတ်နဲ့ ပစ်သတ်ပြီး ရုပ်အလောင်း ဖျောက်ဖျက်ဖို့ ကြိုးစားနေတယ်လို့ ရေဦးမြို့အဝင်က စစ်ကောင်စီရဲ့ကြာပန်းစစ်ဆေးရေးဂိတ်နဲ့ နီးစပ်သူက ပြောပါတယ်။
ရေဦးမြို့မရဲစခန်းက ဒုရဲမှူးမြင့်လွင်ကို မြို့အဝင်စစ်ဆေးရေးဂိတ်မှာတာဝန်ကျနေတဲ့ စစ်တပ်က ဧပြီ ၇ရက် ညနေမှာ သေနတ်နဲ့ ပစ်ခတ်သတ်ဖြတ်ခဲ့တာပါ။
” ဆရာကြီးသန်းနိုင်က ပစ်တာ။ သေတာက ဒုရဲမှူးမြင့်လွင်။ အခု အလောင်းကို ရေခဲတိုက်မှာ ထားထားတယ်” လို့ ရေဦးမြို့အဝင် ကြာပန်းစစ်ဆေးရေးဂိတ်နဲ့ နီးစပ်သူက ပြောပါတယ်။
Public Service Announcement
ညနေ ၆နာရီ၃၅မိနစ်ခန့်မှာ ဒုရဲမှူးမြင့်လွင်က ရဲစခန်းကနေ အရပ်ဝတ်နဲ့ ထွက်လာပြီး ကြာပန်းစစ်ဆေးရေးဂိတ်ဘက်လာစဉ် သန်းနိုင်လို့ခေါ်တဲ့ စစ်ကောင်စီတပ်ဖွဲ့ဝင်က သေနတ်နဲ့ပစ်ခတ်ထားလို့ ဒေသခံသတင်းရင်းမြစ်က ပြောပါတယ်။
သန်းနိုင်ရဲ့ ရာထူးအထိအကျမသိရပေမယ့် အဲဒီဂိတ်က စစ်ကောင်စီတပ်ဖွဲ့ဝင်တွေက ဆရာကြီးလို့ခေါ်ကြပါတယ်။
” ရဲစခန်းနဲ့ ကြာပန်းစစ်ဆေးရေးဂိတ်က (၁)မိုင်လောက်ပဲဝေးတယ်။ သူတို့တွေ ကြောက်လန့်ပြီးအချင်းချင်းပစ်ခတ်ပုံရတယ်။ စစ်တပ်ရော ရဲတပ်ဖွဲ့ရော မြို့ထဲမှာပဲနေရဲတာ။အပြင်ကိုမထွက်ရဲဘူး” လို့ ဒေသခံတစ်ဦးက ပြောပါတယ်။
ဆေးရုံအအေးခန်းမှာထားတဲ့ ဒုရဲမှူးသန်းနိုင်ရဲ့ရုပ်အလောင်းကို ရဲတပ်ဖွဲ့နဲ့မိသားစုဝင်တွေက သွားရောက်ထုတ်ယူစဉ် စစ်တပ်က တားမြစ်ထားတယ်လို့ သိရပါတယ်။
“အလောင်းကို စစ်ဆေးခွင့်မပေးဘဲ မီးရှို့သင်္ဂြိုဟ်ဖို့ လုပ်နေတယ်”လို့ ဒေသခံသတင်းရင်းမြစ်က ဒီနေ့ ဧပြီ ၈ရက် ညနေပိုင်းမှာ ပြောပါတယ်။
ရဲတပ်ဖွဲ့ဟာ တရားဥပဒေစိုးမိုးရေးတာဝန်ကိုထမ်းဆောင်ဖို့တာဝန်ရှိပေမယ့် စစ်တပ်အာဏာသိမ်းပြီးနောက်ပိုင်း စစ်ကောင်စီတပ်တွေနဲ့အတူ လူထုကို ဖမ်းဆီးသတ်ဖြတ်မှုတွေကျူးလွန်နေပါတယ်။ စစ်တပ်နဲ့ရဲတပ်ဖွဲ့ လက်တွဲနေရမယ်လို့ စစ်ခေါင်းဆောင်က ထုတ်ပြောထားပေမယ့် လက်တွေ့မှာတော့ ရဲတပ်ဖွဲ့ကို စစ်တပ်က ၎င်းတို့ထက်နိမ့်တဲ့ လက်နက်ကိုင်အဖွဲ့အဖြစ် ဆက်ဆံပြီး ဖိနှိပ်မှုတွေပြုလုပ်နေတယ်လို့ ရဲတပ်ဖွဲ့ဝင်တွေကပြောပါတယ်။
ရေဦးမြို့နယ်မှာ လက်ရှိတိုက်ပွဲဖြစ်ပွားခြင်းမရှိပေမယ့် စစ်တပ်ကလက်နက်ကြီးနဲ့ ပစ်ခတ်တာတွေ၊ ရှေးဦးမြို့နယ်ပတ်ဝန်းကျင်ကို လေကြောင်းတိုက်ခိုက်မှုတွေပြုလုပ်နေပါတယ်။
