လုံးခင်းမှာ စစ်တပ်က အရပ်သား ၂ဦးကိုပစ်သတ်

ဧပြီ-၆၊၂၀၂၆။အိမ်သွင်/People’s Spring

ဖားကန့်၊လုံးခင်းကျေးရွာအုပ်စုထဲမှာတိုက်ပွဲဖြစ်ပွားနေချိန် ပိတ်မိနေတဲ့အရပ်သားတွေထဲက ၂ ဦးကို အာဏာသိမ်းစစ်တပ်ကပစ်သတ်သွားတယ်လို့ ဒေသခံတွေကပြောပါတယ်။

ရွာလယ်တစ်နေရာကို စစ်တပ်စစ်ကြောင်းရောက်ရှိလာပြီး အရပ်သားတွေကို ပစ်သတ်တာလို့ ဒေသခံ သတင်းရင်းမြစ်ကပြောပါတယ်။

“နေ့လယ်ပိုင်းဝင်ဝင်လာချင်းဒေသခံတွေကို အပြင်မထွက်ခိုင်းတော့ဘူး။ပိတ်ထားလိုက်တယ်။ ညနေကတော့ ရွှေမှော်ရှေ့နားမှာ ပစ်သတ်ပစ်တာ ၂ ယောက်။အဲ့စစ်ကြောင်းရှိနေသေးတော့ အလောင်းပြန်မရသေးဘူး”လို့ ၎င်းက ပြောပါတယ်။

Public Service Announcement

လုံးခင်းမှာ ဧပြီလ၆ရက် မွန်းလွဲပိုင်းကစပြီး တိုက်ပွဲပြင်းထန်နေပါတယ်။စစ်သား​တွေက KIA၊KPDF ယူနီဖောင်းတွေဝတ်လာလို့ဒေသခံတွေထင်ယောင်ထင်မှားဖြစ်ပြီးပြေးလွှားချိန်မရခဲ့ဘူးလို့သိရပါတယ်။

ညနေ၆နာရီခန့်မှာလုံးခင်းသံတံတားအနီးမှာတိုက်ပွဲပြင်းထန်နေပြီး စစ်ကောင်စီရဲ့ လေကြောင်းအန္တရာယ်ကိုသတိပြုကြဖို့ ဒေသခံတွေအပြင် KIA၊KPDF နဲ့နီးစပ်သူတွေကလူမှုကွန်ရက်ကတဆင့် သတိပေးနေကြပါတယ်။

ဖားကန့်မှာ ဧပြီလ ၂ရက်က တိုက်ပွဲစတင်ဖြစ်ပွားခဲ့တာပါ။ တိုက်ပွဲအတွင်းစစ်တပ်ရဲ့ရှေ့တန်းကာကင်းစခန်း ၆ခုကို KIA၊KPDFကသိမ်းယူထားပြီး စစ်ရေးဆက်လက်တင်းမာနေတာဖြစ်ပါတယ်။ဧပြီလ ၂ရက်က တိုက်ပွဲစတင်ပြီးနောက်ပိုင်း စစ်ကောင်စီတပ်က လေကြောင်းကနေဗုံးကြဲတဲ့အပြင် ဖားကန့်ဗျူဟာကုန်းနဲ့လက်နက်ကြီးတပ်ဆင်ထားတဲ့နေရာတွေကနေ ပစ်ခတ်လို့ ကလေးငယ်အချို့ပါဝင်ဒေသခံ ၆ဦးဒဏ်ရာရခဲ့ပါတယ်။

တိုက်ပွဲတွေကြောင့်လုံးခင်းနဲ့ ဖားကန့်သွားတဲ့လမ်းပိုင်းကို အသုံးမပြုကြဖို့ KIA၊KPDFက သတိပေးထားပြီး စစ်ကောင်စီကလည်းလမ်းပိုင်းအချို့ကိုကန့်သတ်ထားပါတယ်။

လက်ရှိ အခြေအနေနဲ့ပတ်သက်လို့ ကချင်အမျိုးသားလွတ်မြောက်ရေးတပ်မတော်(KIA)ကို ဆက်သွယ်မေးမြန်းနေဆဲဖြစ်ပါတယ်။ ဖားကန့်မှာစစ်တပ်စစ်ကြောင်းတွေက အရပ်သားတွေကိုပစ်မှတ်ထားအကြမ်းဖက်သတ်ဖြတ်တာ​တွေအရင်ကလည်းရှိခဲ့ပါတယ်။ ဒါ​ကြောင့် စစ်ရေးတင်းမာနေချိန်မှာ ကြိုတင်ရှောင်တိမ်းဖို့၊ စစ်တပ်စစ်ကြောင်းတွေနဲ့တွေ့ရင်လမ်းပေါ်ထွက်ပြီးကြည့်တာမျိုးတွေမလုပ်ဖို့နဲ့ လေကြောင်းနဲ့လက်နက်ကြီးအန္တရာယ်ကိုလည်းသတိပြုဖို့ KIAကသတိပေးထားပါတယ်။