ရွှေကူမြို့နယ် သာယာကုန်းကျေးရွာအနီးတိုက်ပွဲတွင် စစ်ကောင်စီတပ်မှ သုံးဦးသေဆုံးပြီး ငါးဦးထက်မနည်းဒဏ်ရာရကြောင်း မြို့လှ KPDF က ထုတ်ပြန် သည်။
ယနေ့(စက်တင်ဘာ ၆ရက်) နံနက် ၈ နာရီ ၁၅မိနစ်ခန့်တွင် အင်အား ၇၀ကျော်ပါ စစ်ကောင်စီ၏ ခလရ(၇၇)စစ်ကြောင်းမှူးမုတ်ဆိတ် ဦးဆောင်သောအဖွဲ့မှာ မြိုင်ယာကျွန်းမှ သာယာကုန်းကျေးရွာဘက်သို့ ခြေလျှင်စစ်ကြောင်းထိုးလာစဥ် တိုက်ခိုက်ခဲ့သည်ဟု ဆိုသည်။
မြို့လှ KPDF တပ်ခွဲ (၁)မှ ဗိုလ်မိုးကြိုး ဦးဆောင်သော တပ်စိတ်မှူးလင်းဝါ ပါဝင်သောအဖွဲ့မှ မြိုင်ယာကျွန်းနှင့် သာယာကုန်းရွာကြားတွင် မိုင်းအကြီး၊ အငယ် နှင့် လေယာဥ်မိုင်းများဖြင့် မိုင်းဆွဲတိုက်ခိုက်ခဲ့ကြောင်း အသိပေးသည်။
စစ်ကောင်စီဘက်မှ မိုင်းကွင်းအတွင်း ဝင်ရောက်လာရာ သုံးဦးနေရာပင် သေဆုံးခဲ့ပြီး ငါးဦးထက်မနည်း ဒဏ်ရာရရှိခဲ့ကြောင်း ဖော်ပြသည်။
Public Service Announcement
စစ်ကောင်စီဘက်မှ အထိနာကာ သာယာကုန်းရွာဘက်သို့ လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ် ဝင်ရောက်ခဲ့ရာ အသက်(၆၀)ခန့် ကျေးရွာနေဒေသခံ အမျိုးသားတစ်ဦး ပေါင်၌ လက်နက်ကြီးကျည်အစ ထိမှန်ခဲ့ပြီး ကျေးရွာရှိ မီးရှို့ ဖျက်ဆီးခံရသည့် နေအိမ်တစ်လုံး အပါအဝင် နေအိမ် သုံးလုံး ပျက်စီးသည်။
တိုက်ပွဲကို အထိခိုက်မရှိဘဲ အချိတ်အဆက်မိမိဖြင့် အောင်မြင်စွာ အသာစီးရယူ တိုက်ခိုက်နိုင်ခဲ့ကြောင်း မြို့လှ KPDF က ပြောသည်။
ယမန်နေ့ကလည်း ရွှေကူမြို့နယ်တွင် စစ်ကောင်စီ၏ တပ်မ(၈၈)လက်အောက်ခံ ခလရ(၇၇) အဖွဲ့နှင့် တိုက်ပွဲ ဖြစ်ပွားခဲ့ပြီး စစ်ကောင်စီတပ်သားများ ထိခိုက်မှုများနိုင်ကြောင်း မြို့လှ K-PDFက ထုတ်ပြန်ထားသည်။
အဆိုပါစစ်ကောင်စီအဖွဲ့မှာ ဗန်းမော်မြို့သို့ လက်နက်ရိက္ခာပို့ဆောင်ခဲ့သည့် သင်္ဘောများကို မြစ်ကြောင်း တစ်လျှောက်လုံခြုံရေးရယူခဲ့သည့်အဖွဲ့ ဖြစ်ကြောင်း သိရသည်။
