ပြည်သူများအခက်အခဲကြုံနေရချိန် ရွှေဘိုခရိုင်အတွင်း ချေးငွေကုမ္ပဏီများ လုပ်ငန်းရပ်ဆိုင်းထားရန် (ပကဖ) မေတ္တာရပ်ခံ

စစ်ကိုင်းတိုင်း၊ ရွှေဘိုခရိုင်အတွင်း၌ ပြည်သူလူထု အခက်အခဲကြုံနေရချိန် ငွေချေးကုမ္ပဏီလုပ်ငန်းများ ခေတ္တရပ်ဆိုင်းထားရန် ခရိုင်ပြည်သူ့အုပ်ချုပ်ရေးအဖွဲ့(ပအဖ)က မေတ္တာရပ်ခံသည်။

အမျိုးသားညီညွတ်ရေးအစိုးရ(NUG) လက်အောက်ရှိ ရွှေဘိုခရိုင်ပြည်သူ့အုပ်ချုပ်ရေးအဖွဲ့ (ပအဖ)က စက်တင်ဘာ ၅ ရက်တွင် ပုဂ္ဂလိက ချေးငွေကုမ္ပဏီလုပ်ငန်းများနှင့် ပတ်သက်၍ ကြေညာချက်ထုတ်ပြန်ခဲ့သည်။

ထိုကြေညာချက်တွင် ယခုလက်ရှိ စစ်ကိုင်းတိုင်းဒေသသည် မြေပြင်အခြေအနေအရ စစ်ရေးတင်းမာနေချိန်ဖြစ်ပြီး အဖက်ဖက်မှ ကျဆုံးနေသော စစ်အာဏာရှင်တို့၏ အဆုံးစွန်အထိ ယုတ်မာခြင်းကို ပြည်သူလူထုကြီးမှာ အလူးအလဲ ခံစားနေရချိန်ဖြစ်ကြောင်း အသိပေးထားသည်။

ငွေစုငွေချေးလုပ်ငန်းရှင် ကုမ္ပဏီကြီးများအနေဖြင့် မိမိတို့၏ ကိုယ်ကြိုးကိုမကြည့်ဘဲ အများပြည်သူ၏ လက်ရှိဘဝများကိုကိုယ်ချင်းစာ၍ နားလည်မှုထားကာ ရွာစဉ်လျှောက်ပြီး ငွေစုငွေချေး ကောက်ခံနေခြင်းလုပ်ငန်းများကို ‌လူထုတော်လှန်ရေး စစ်အာဏာရှင်စနစ်အမြစ်ပြတ်ပြုကျရေး ဒီမိုကရေစီတိုက်ပွဲ မပြီးဆုံးချိန်အထိ (သို့) တော်လှန်ရေး‌ရဲဘော်များ နယ်မြေစိုးမိုးမှုမရရှိခင် အချိန်ကာလတစ်ခုအထိ ယာယီရပ်ဆိုင်းထားပေးရန် အများပြည်သူလူထုနှင့်တော်လှန်ရေးအဖွဲ့အစည်းများကိုယ်စား အထူးပင်မေတ္တာရပ်ခံပန်ကြားအပ်ပါသည်ဟု ရေးသားထားသည်။

Public Service Announcement

အကယ်‌၍ လိုက်နာမှုမရှိခဲ့သည်ရှိသော် လုံးဝတာဝန်ယူဖြေရှင်းပေးသွားမည်မဟုတ်ကြောင်းနှင့် မြေပြင်တော်လှန်ရေးအင်အားစုများချမှတ်ထားသည့် စည်းမျဉ်းစည်းကမ်း ဥပဒေအတိုင်းသာ ခံယူသွားကြရန်ဖြစ်ကြောင်း ကြိုတင်အသိပေးထုတ်ပြန်လိုက်ကြောင်း ကြေညာချက်တွင် ဖော်ပြသည်။

စစ်ကိုင်းတိုင်းတွင် သာမကဘဲ မကွေးတိုင်းရှိ စစ်ကောင်စီတပ်နှင့် ထိတွေ့မှုပြင်းထန်နေသော နယ်ဒေသများတွင်လည်း ချေးငွေလုပ်ငန်းများ ရပ်ဆိုင်းထားရန် ဒေသတွင်း PDFအဖွဲ့များက သတိပေးထားသည်။