တောင်ကိုရီးယားရောက် မြန်မာနိုင်ငံသားများစုပေါင်းထည့်ဝင်မှုဖြင့် NUG အစိုးရကို အမေရိကန် ဒေါ်လာ တစ်သိန်း ထပ်မံလှူဒါန်းခဲ့ရာ စုစုပေါင်း ဒေါ်လာ ၁၁ သိန်းပေးပို့နိုင်ခဲ့ပြီဖြစ်ကြောင်း ယနေ့ သတင်းထုတ်ပြန်သည်။
စစ်အာဏာသိမ်းမှု ဆန့်ကျင်ရေးကော်မတီ (ကိုရီးယား)က One Day Challenge လှုပ်ရှားမှုကို သတင်းထုတ်ပြန်ခဲ့ခြင်းဖြစ်ပြီး One Day Challenge အဖွဲ့သားများက ၎င်းတို့ လုပ်ခလစာ၏ တစ်ရက်စာကို စစ်အာဏာရှင်တော်လှန်ရေးအတွက် NUG ကို လစဉ် လှူဒါန်းနေခြင်းဖြစ်သည်။
အဆိုပါ ထောက်ပံ့ငွေကို အမျိုးသားညီညွတ်ရေးအစိုးရ၏ ဒေသန္တရအုပ်ချုပ်ရေး အကောင်အထည် ဖော်ဆောင်ရွက်ရန်နှင့် နယ်မြေစိုးမိုးရေး ကိစ္စရပ်များအတွက် သုံးစွဲနေကြောင်း NUG က ထုတ်ပြန်ကြေညာထားသည်။
ထို့အပြင် One Day Challenge ထောက်ပံ့ငွေဖြင့် အကြမ်းဖက်စစ်တပ်ကို ရှေ့တန်းမှ ဖိအားကောင်းစွာပေးကာ တော်လှန်တိုက်ပွဲဝင်နေသော တပ်ဦးခံတပ်ဖြစ်သည့် အထူးတပ်ဖွဲ့သို့ အမေရိကန် ဒေါ်လာ၃သောင်း (၅၉၄သိန်းကျပ်)တန်ဖိုးရှိ ကျည်အရေအတွက် (၁၃,၅၀၀)အား ထောက်ပံ့ခဲ့ပြီး ဥကရစ်ထ စခန်းသိမ်း တိုက်ပွဲအတွက် ဘတ်တစ်သန်းနှင့် မြေပြင်PDF,LPDF,UG အဖွဲ့ (၁၀၂)ဖွဲ့သို့ ကျပ်(၁,၉၃၅)သိန်းကိုလည်း “NUGအစိုးရ၏ ထောက်ပံ့ ကူညီငွေ”အဖြစ် ထောက်ပံ့ပေးခဲ့သည်ဟု ထုတ်ပြန်သည်။
Public Service Announcement
NUG က One Day Challenge အဖွဲ့ဝင်များ၏ လစဉ် ထည့်ဝင်ငွေကို အခွန်ငွေ အဖြစ် သတ်မှတ်ကာ ၆လ တစ်ကြိမ် အခွန်လက်မှတ်များ ထုတ်ပေးခြင်းနှင့် ၁၂လတစ်ကြိမ် ယာယီသမ္မတ၏ မှတ်တမ်းတင် ဂုဏ်ပြုလွှာကို ချီးမြှင့်ခြင်း တို့ကို ပြုလုပ်ပေးသည်ဟု ဆိုသည်။
