မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်ထဲက ဒေသခံ ၆ ဦး ဟာ မနေ့ကညပိုင်းက ဖမ်းဆီးခံရပြီး ညတွင်းချင်းသတ်ခံရကာ အလောင်းစွန့်ပစ်သွားတယ်လို့မြင်းခြံလူထုလှုပ်ရှားမှုကော်မတီက သတင်းထုတ်ပြန်ပါတယ်။
ဖမ်းဆီးသတ်ဖြတ်ခံရသူတွေဟာ နွားထိုးကြီးမြို့နယ် ၊မင်းရွာ က အမျိုးသား ၆ ဦးဖြစ်ပြီး အဲဒီအထဲမှာ NLD ပါတီဝင် ၄ ဦးပါတယ်လို့သိရပါတယ်။
တောင်သာမြို့နယ် လူထုလှုပ်ရှားမှုကော်မတီ ကတော့ သတ်ဖြတ်ခံရသူ ၆ ဦးရဲ့ အမည်နဲ့အသက်အရွယ်တွေကို ဖော်ပြထားပါတယ်။
သူတို့တွေဟာ ဦးကျော်ဆောင် ၆၃ နှစ် ၊ ဦးခင်မောင်စိန်. ၆၃ နှစ် ၊ကိုမင်းဇော် ၊ ကိုဟန်တင် ၄၂ နှစ် ၊ ကိုစိုးပိုင် ၃၇ နှစ် ၊ မောင်အောင်ကိုမင်း ၁၇ နှစ် တို့ပဲဖြစ်ပါတယ်။
Public Service Announcement
အဲဒီသူတွေထဲမှာ ဦးကျော်ဆောင် ၊ ဦးခင်မောင်စိန် ၊ကိုမင်းဇော် ၊ကိုဟန်တင်တို့ ဟာ NLD ပါတီဝင်တွေဖြစ်တယ်လို့ တောင်သာမြို့နယ် လူထုလှုပ်ရှားမှုကော်မတီ ဆိုထားပါတယ်။
မနေ့ကညပိုင်း ၉ နာရီခွဲ ခန့်မှာ မြင်းခြံ မြို့ ပေါ်က စစ်တပ်ထောက်ခံသူ အသက် ၄၀ အရွယ် ဒေါ်သီတာယုမွန်ဦးဆောင်တဲ့ ပျုစောထီးအဖွဲ့ဟာ မင်းရွာကို ကား ၂ စီးနဲ့ ရောက်လာပြီး ဖမ်းဆီးသတ်ဖြတ်ခဲ့တာလို့လည်းတောင်သာမြို့နယ် လူထုလှုပ်ရှားမှုကော်မတီက ဆိုထားပါတယ်။
သတ်ဖြတ်ပြီးနောက် မင်းရွာနဲ့ ကူကုန်းရွာ ဇရပ်အနီးမှာအလောင်းတွေကိုစွန့်ပစ်သွားတယ်လို့သိရပါတယ်။
ပြီးခဲ့တဲ့ နိုဝင်ဘာလ ဒုတိယ ပတ်အတွင်းကလည်း နွားထိုးကြီးမြို့က NLD ပါတီ ထောက်ခံသူ ပိုင်ဆိုင်တဲ့ လက်ဖက်ရည်ဆိုင်က ဝန်ထမ်း ၂ ဦး ဖမ်းဆီးသတ်ဖြတ်ခံလိုက်ရပါသေးတယ်။
ဒီသတ်ဖြတ်မှုတွေကို စစ်ကောင်စီလက်နက်တပ်ဆင်ပေးထားတဲ့ သွေးသောက်အမည်ခံ ပျုစောထီးတွေက လုပ်ဆောင်တာလို့ ဒေသခံအချို့က ယူဆကြပါတယ်။
နွားထိုးကြီးမြို့ဟာ တောင်သာ ၊မြင်းခြံ ၊ ငါန်းဇွန် ၊တံတားဦး၊မြစ်သား၊ဝမ်းတွင်း ၊မလှိုင်မြို့နယ်တွေနဲ့ ထိစပ်နေတဲ့ မြို့နယ်ဖြစ်ပါတယ်။
