ကျေးရွာပြန်လည်ထူထောင်ရေး အတူတကွဆောင်ရွက်မည်ဟု ဒေသခံများအားပြော
ကျေးရွာပြန်လည်ထူထောင်ရေး အတူတကွဆောင်ရွက်မည်ဟု ဒေသခံများအားပြောစစ်ကောင်စီတပ်က လေကြောင်းမှ အပြင်းအထန်ထိုးစစ်ဆင်တိုက်ခိုက်၍ ထိခိုက်ပျက်စီးမှုများ ပြားခဲ့သည့် တအာင်းဒေသနမ့်ဆန်မြို့နယ် ကုန်းသာရွာသို့ တအာင်းတပ်မတော်(PSLF/TNLA) ဒုဥက္ကဋ္ဌ တားဂျုတ်ဂျား ဦးဆောင်သည့် အဖွဲ့က သွားရောက်စစ်ဆေးခဲ့သည်။
ဒီဇင်ဘာ ၂၀ရက်တွင် ကျရောက်သည့် တအာင်း(ပလောင်)နှစ်သစ်ကူးနေ့ မတိုင်ခင်က အဆိုပါ တိုက်ပွဲပြင်းထန်စွာဖြစ်ပွားရာနေရာသို့ သွားရောက်ခဲ့ခြင်းဖြစ်သည်ဟု ဆိုသည်။
“ဘုန်းကြီးကျောင်း၊ စာသင်ကျောင်း၊ လူနေအိမ်တွေ ဘယ်လောက်အထိ ပျက်စီးဆုံးရှုံးသလဲပေါ့။ မန်လုံးကျေးရွာ ဇရပ်မှာတည်းခိုနေတဲ့ ကုန်းသာရွာခံတွေကို အားပေးစကား ပြောပေးတယ်။ ကျေးရွာ ပြန်လည်ထူထောင်ပေးဖို့ အတူတကွ ရှိတဲ့အကြောင်း ကတိတွေပေးခဲ့တယ်” ဟု ဒုဥက္ကဋ္ဌ တားဂျုတ်ဂျားက People’s Spring သတင်းဌာန၏ မေးမြန်းချက်အပေါ် ဖြေကြားသည်။
စစ်ကောင်စီသည် ဒီဇင်ဘာ ၇ရက် နေ့လယ်ပိုင်းက ကုန်းသာကျေးရွာနှင့်အနီးသို့ ရဟတ်ယာဉ် ၅စီးဖြင့် စစ်ဆင်အားများချပြီး ရုတ်တရက်ထိုးစစ်ဆင်တိုက်ခိုက်လာ၍ ဒေသတွင်းရှိ TNLA တပ်နှင့် တိုက်ပွဲပြင်းထန်စွာ ဖြစ်ပွားခဲ့သည်။ တိုက်ပွဲ စတင်ပြီး နာရီပိုင်းအကြာ၌ပင် စစ်ကောင်စီတပ်က ရဟတ်ယာဉ် တိုက်လေယာဉ်များ အသုံးပြုပြီး လေကြောင်း ပစ်ကူပေးတိုက်ခိုက်သကဲ့သို့ နမ့်ဆန်နှင့်မန်တုံမြို့မှ လက်နက်ကြီးများဖြင့် တိုက်ပွဲဖြစ်ပွားရာသို့ တိုက်ခိုက်ခဲ့သည်။
Public Service Announcement
ဒီဇင်ဘာ ၇ရက်မှ ဒီဇင်ဘာ ၁၁ရက် ညပိုင်းအထိ မြေပြင်တိုက်ပွဲ ၅ရက်ဆက် နေ့ညဖြစ်ပွားခဲ့ပြီး ဒီဇင်ဘာ ၁၂ရက်နှင့် ၁၃ရက်များတွင် စစ်ကောင်စီတပ်က လေကြောင်းမှပစ်ခတ်ခြင်း၊ လက်နက်ကြီးဖြင့် တိုက်ခိုက်ခြင်းများ လုပ်ဆောင်ခဲ့သည်။
အဆိုပါတိုက်ပွဲအတွင်း စစ်ကောင်စီတပ် အထိနာခဲ့၍ ပေါင် ၅၀၀အလေးချိန် ဗုံးကြီးများ အသုံးပြု တိုက်ခိုက်ခြင်း အပါအဝင် လေကြောင်း တိုက်ခိုက်မှု အကြိမ် ၆၀ပြုလုပ်ခဲ့ပြီး လက်နက်ကြီး တိုက်ခိုက်မှုအကြိမ် ၄၀နီးပါး ရှိခဲ့သည်။ ထိုသို့ လေကြောင်းနှင့် လက်နက်ကြီး တိုက်ခိုက်မှုကြောင့် အိမ်ခြေ ၆၀ခန့်ရှိ ကုန်းသာကျေးရွာသည် ရွာလုံးကျွတ်နီးပါး ထိခိုက်ပျက်စီးခဲ့ရာ ဘုန်းကြီးကျောင်းနှင့် စာသင်ကျောင်းများ လည်း ပါဝင်သည်။ စစ်ကောင်စီတပ်၏ ထိုသို့ တိုက်ခိုက်မှုသည် တအာင်းဒေသကို ဖျက်ဆီးရန် ကြိုးပမ်းမှုဖြစ်၍ တအာင်းဒေသခံ ပြည်သူများ တော်လှန်ရေးသတိ အထူးထားရှိပြီး စည်းလုံးညီညွတ်စွာ ခုခံတော်လှန်ကြရန် TNLAက ထုတ်ပြန်ထားသည်။
