▪︎PDF ၂ ဦး ကျဆုံးပြီး၁၀ ဦးဒဏ်ရာရ၊စခန်းအတွင်း ၄ကြိမ် ဝင်ရောက်တိုက်ခိုက်ခဲ့သော်လည်း လေကြောင်းပစ်ကူအကြိမ်ကြိမ်လာ၍ ဆုတ်ခွာခဲ့ရ
မကွေးတိုင်း ဂန့်ဂေါမြို့နယ် ကန်ရွာနယ်မြေရဲစခန်းအား ခရိုင်တပ်ရင်းများနှင့်ပူးပေါင်းတပ်က ဝင်ရောက်တိုက်ခိုက်ရာ စစ်တပ်ကလေကြောင်းတိုက်ခိုက်မှု ၉ ကြိမ်ပြုလုပ်ခဲ့သော်လည်း စခန်း၏ ၇၅ ရာခိုင်နှုန်းမီးရှို့နိုင်ခဲ့ပြီး စစ်သား ၄၅ဦး သေဆုံးခဲ့ကြောင်း ပါဝင်တိုက်ခိုက်ခဲ့သောခရိုင်တပ်ရင်းများမှ တာဝန်ရှိသူများကပြောသည်။
မတ်လ ၃၁ ရက်နေ့တွင် ကန်ရွာ နယ်မြေရဲစခန်းကိုPDFများကရှစ်နာရီကြာခဲ့သော တိုက်ခိုက်မှုတွင် စစ်ကောင်စီတပ်သား ၄၅ ဦးသေဆုံးပြီး ၁၀ ဦး ဒဏ်ရာရရှိခဲ့ကာ သေနတ် ၅လက် သိမ်းဆည်းရမိကြောင်းပြည်သူ့ကာကွယ်ရေးတပ်မတော်(PDF) အမှတ်(၁) စစ်ဒေသ၊ တပ်ရင်း (၃၉၀၁)ကလည်း သတင်းထုတ်ပြန်သည်။
“ မနက် ၆နာရီကစတိုက်တာ ညနေ၂နာရီ ၂၀မိနစ်မှဆုတ်မိန့်ရတာ။ စခန်းသိမ်းတယ် ဆိုတာထက် ယောသားတွေရဲ့သတ္တိကိုပြတဲ့ပွဲပါ။ ပထမဂျက်ဖိုက်လာကျဲတာ ကျနော်တို့အလုပ်ဆက်လုပ်တုန်း။ Mi35နဲ့ပစ်မှစိတ်တိုပြီးမီးရှို့(ရဲစခန်းကို)ကြတာ။ အဲ့တုန်းက၁ ခုဘဲရှို့ သေးတယ်။အဲ့ဒီမိုးခိုးကြောင့်သူပစ်မှတ်ရှာမရဘဲပု စဥ်းမျက်ကမ်းဖြစ်သွားတယ်” ဟု ဂန့်ဂေါခရိုင်တပ်ရင်း (၁၄) တပ်ရင်းမှူး မျိုးသူရကပြောသည်။
စခန်းတွင်စစ်ကောင်စီတပ်မှစစ်သား နှင့်ရဲ ၈၁ယောက်ရှိပြီး တိုက်ပွဲနောက်ဆုံးအထိ ၁၇ ဦးခန့်သာကျန်သည်ဟု တပ်ရင်းမှူးကရှင်းပြ သည်။ ထိုထဲတွင် ဒဏ်ရာရသူများအပြင်ထွက်ပြေးသူများလည်းရှိသည်ဟု၎င်းကဆက်ပြောသည်။
Public Service Announcement
စစ်ကောင်စီတပ်အထိနာပြီး စခန်းကျလုအချိန်တွင် စစ်တပ်က လေကြောင်းမှတိုက်ခိုက်မှုနှင့် စစ်ကူတပ်သားများကို သုံးကြိမ်တိုင်ပို့ခဲ့ကြောင်းသိ့ရသည်။ တစ်ကြိမ်လျှင် စစ်သား ၁၇ ဦးနှုန်းဖြင့် စုစုပေါင်း ၅၀ ကျော်စစ်ကူထပ်ပို့ခဲ့ကြောင်း၎င်းကပြောသည်။
ဂန့်ဂေါခရိုင်တပ်ရင်းများဖြစ်ကြသည့် အမှတ် ၁၊ ၇၊ ၁၁၊ ၁၂၊ ၁၄၊ ၁၉ တပ်ရင်း ၆ ရင်းတို့နှင့်အတူ ABSDF၊ HYPER UAV FORCE၊ ပကဖ ရဲဘော် များ စသည့် ပူးပေါင်းတပ်များက ဝင်ရောက်တိုက်ခိုက်ခဲ့ခြင်းဖြစ်သည်။
“တိုက်ပွဲချိန်က၈ကျော်ကြာခဲ့တယ်။အခက်အခဲကတော့မြို့နယ်အတွင်းကအမာဆုံစခန်းကိုတီးတာဆိုတော့ အခက်အခဲအရမ်းများတယ်။”ဟု ဂန့်ဂေါခရိုင်တပ်ရင်း (၁၄) တပ်ရင်းမှူး မျိုးသူရကပြောသည်။
တိုက်ပွဲအတွင်းပူးပေါင်းတပ်ဖွဲ့ မှ ရဲဘော် ၂ ဦး ကျဆုံးပြီး ရဲဘော်တစ်ဦး နင်းမိုင်းမိကာ ခြေတစ်ဖက် ဆုံးရှုံးခဲ့ကာ ၊အခြား ထိခိုက်ဒဏ်ရာရသူ ၉ ဦး ရှိကြောင်း အသိပေးခဲ့သည်။
တိုက်ပွဲဖြစ်စဉ်မှာ ရဲစခန်းကို မနက် ၆နာရီမှစတင်ပစ်ခတ်ခဲ့ရာ တိုက်ပွဲ ၃နာရီ အကြာ၌ နယ်မြေရဲစခန်းအတွင်းဝင်ရောက် နိုင်ကာ စခန်းကို မီးရှို့နိုင်ခဲ့သည်ဟုသိရသည်။စတင် ဝင်ရောက်ချိန်၌ပင် စစ်ကောင်စီဘက်မှ တိုက်လေယာဉ် ၁စီးဖြင့် ၂ကြိမ် ပစ်ခတ်ခဲ့ပြီး နောက်ထပ် ရဟတ်ယာဉ် တိုက်လေယာဉ် ဖြင့် ၇ကြိမ် လာရောက်ပစ်ခတ်ခဲ့ကြောင်း၊ ပူးပေါင်းတပ်ကလည်း ရဲစခန်းအတွင်းသို့ ၄ ကြိမ်တိတိပြန်လည်ဝင်ရောက်တိုက်ခိုက်ခဲ့ကြောင်းသိရသည်။
စခန်းသိမ်းပိုက်နိုင်ရေး ကြိုးစားခဲ့သော်လည်း မွန်းလွဲ ၂နာရီခန့်တွင် ရဟတ်ယာဉ်ဖြင့် ၃ကြိမ် စစ်ကူလာပို့၍ ပြန်လည် ဆုတ်ခွာခဲ့ရကြောင်း၊ ပြန်လည်ဆုတ်ခွာချိန်တွင် ရန်သူစခန်း၏ ၇၅ ရာခိုင်နှုန်းခန့်ကိုမီးရှို့ဖျက်ဆီးနိုင်ခဲ့ကြောင်း ထုတ်ပြန်သည်။
ရဲစခန်းတိုက်ခိုက်မှုမှ G3(၄)လက်၊G4(1)လက်၊G3မောင်းတုံး(၁)ခု၊ကျည်ဘောက်(၄)ခု ၊လက်ပစ်ဗုံး(၂)လုံး၊စကားပြောစက်(၂)လုံး၊ဖုန်း(၇)လုံး၊Laptop(၁)လုံး၊ဓား(၁)လက်၊ငွေ(၆၀၈၀၀)ကျပ်နှင့်အခြားအသုံးအဆောင်ပစ္စည်းများသိမ်းဆီးရမိခဲ့ကြောင်း ဖော်ပြသည်။
ဂန့်ဂေါဒေသခံတစ်ဦးကလည်း ကန်ရွာ ရဲစခန်း ပစ်ခတ်မှု ဖြစ်ပွားပြီးနောက် ယနေ့တွင်လည်း စစ်ကောင်စီတပ် လေကြောင်း လှုပ်ရှားမှုရှိသည်ဟု ပြောသည်။
“ ဒီနေ့(ဧပြီ ၃)က ကျမတို့ရွာရဲ့ အောက်ပိုင်း ဘယ်ရွာဆိုတာ သေချာမသိရသေးဘူး။ ဟတ်စကီး ၂စင်းသွားတယ်။ ဒီနေ့ နေ့လည်ခင်းက” ဟု ဒေသခံက ပြောသည်။
HYPER UAV FORCE အဖွဲ့ကလည်း စစ်တပ်က ရဟတ်ယာဥ်ဖြင့် အင်အားဖြည့်တင်းမှုရှိနေကြောင်း ရုပ်သံမှတ်တမ်းနှင့်တစ်ကွထုတ်ပြန်သည်။
NUG က မကွေးတိုင်းရှိခရိုင်တပ်ရင်း ကို လက်နက်တပ်ဆင်ပေးပြီးနောက် ကန်ရွာရဲစခန်းတိုက်ခိုက်မှုမှာ ပထမဆုံးစခန်းသိမ်းတိုက်ပွဲဖြစ်သည်။
