တော်လှန်ရေးရဲဘော် ၃ ဦးကိုထိုင်းအာဏာပိုင်များကမြန်မာစစ်အုပ်စုလက်အောက်ခံ လက်နက်ကိုင်အဖွဲ့ထံသို့ အပ်နှံခြင်းမှာ ထိုင်းနိုင်ငံအတွင်း ရွှေ့ပြောင်းခိုလှုံရောက်ရှိနေသော မြန်မာနိုင်ငံသားများ၏ အသက်အန္တရာယ်နှင့် လုံခြုံရေးကို ခြိမ်းခြောက်လာသည့် ကိစ္စရပ်အဖြစ် အမျိုးသားညီညွတ်ရေးအစိုးရ NUG သဘောထားထုတ်ပြန်သည်။
Lion Battalion ဗျူဟာစစ်ကြောင်းမှ ရဲဘော်သုံးဦးမှာ ထိုင်းနိုင်ငံ၊ မဲဆောက်သို့ ဆေးလာကုရင်း ထိုင်းလူဝင်မှုကြီးကြပ်ရေး(လဝက)၏ ဖမ်းဆီးခြင်းခံရကာ ဧပြီ ၄ ရက် နံနက်အစောပိုင်းတွင် စစ်ကောင်စီ၏ လက်အောက်ခံ နယ်ခြားစောင့်တပ်ဖွဲ့ BGF ထံ အပ်နှံခဲ့ပြီး လက်ရှိတွင် စစ်ကောင်စီ၏ စစ်ကြောရေး၌ ရောက်ရှိနေကြောင်း သိရသည်။
အဆိုပါဖြစ်စဥ်နှင့်ပတ်သက်၍ NUG က ယနေ့ သတင်းထုတ်ပြန်ရာ မြန်မာ့တော်လှန်ရေးတပ်ဖွဲ့ဝင် လူငယ် (၃) ဦးအား ထိုင်းနိုင်ငံ အာဏာပိုင်များက ဖမ်းဆီး၍ အကြမ်းဖက်စစ်အုပ်စုလက်အောက်ခံ လက်နက်ကိုင်အဖွဲ့ထံသို့ နိုင်ငံတကာ ရဲလုပ်ထုံးလုပ်နည်းများနှင့် ညီညွတ်မှုမရှိဘဲ လွှဲပြောင်းပေးအပ်ခဲ့သည့် ဖြစ်စဉ်ပေါ်ပေါက်ခဲ့သည်ကို တွေ့ရှိရကြောင်း ဖော်ပြသည်။
အဆိုပါ ဖြစ်စဉ် နှင့် လုပ်ရပ်သည် မြန်မာစစ်ကောင်စီ၏ အကြမ်းဖက် ဖိနှိပ်ရက်စက်မှုများအပါအဝင် အကြောင်းအမျိုးမျိုးကြောင့် ထိုင်းနိုင်ငံအတွင်း ရွှေ့ပြောင်းခိုလှုံရောက်ရှိနေသော မြန်မာနိုင်ငံသားများ၏ အသက်အန္တရာယ်နှင့် လုံခြုံရေးကို ခြိမ်းခြောက်လာသည့် ကိစ္စရပ်ဖြစ်သောကြောင့် အမျိုးသားညီညွတ်ရေးအစိုးရအနေဖြင့် မိမိနိုင်ငံသားများအား ကာကွယ်စောင့်ရှောက်ရမည့် တာဝန်ရှိသည်နှင့်အညီ အဆိုပါဖြစ်စဉ်နှင့်တကွ အလားတူဖြစ်စဉ်များကို အထူးအလေးထားဦးစားပေး၍ သက်ဆိုင်ရာ အဖွဲ့အစည်းများနှင့် စဉ်ဆက်မပြတ် ဆက်သွယ်ညှိနှိုင်း၊ ဖြေရှင်းဆောင်ရွက်လျက်ရှိိကြောင်း ဆက်လက်ဖော်ပြသည်။
Public Service Announcement
NUG ၏ ထုတ်ပြန်ချက်အပေါ် Lion Battalion ဗျူဟာစစ်ကြောင်းမှ ရဲဘော်တစ်ဦးက “သူတို့(NUGက) ဒါမျိုးထုတ်သင့်တယ်လေ။သူတို့ထုတ်တာကောင်းပါတယ်” ဟု မှတ်ချက်ပြုသည်။
Lion Battalion ဗျူဟာစစ်ကြောင်းမှ ရဲဘော်သုံးဦးမှာ ဧပြီိ ၁ ရက်ညနေပိုင်းတွင် ထိုင်းလဝက၏ ဖမ်းဆီးခြင်းခံရပြီး ဧပြီ ၃ ရက်တွင် အဆိုပါရဲဘော်များကို ထိုင်းလဝကထံမှ ပြန်ထုတ်ရန် ကြိုးပမ်းခဲ့သော်လည်း ဧပြီ ၄ ရက်တွင်မှ ပြန်လာရန် ပြောဆိုအပြီး ဧပြီ ၄ ရက် နံနက်ပိုင်းတွင် ထိုင်းလဝကသည် BGF ထံ အပ်နှံခဲ့ကြောင်း အထက်ပါရဲဘော်က ပြောသည်။
