▪︎မုန်တိုင်းဒဏ်ကိုမြန်မာပြည်သူ ၃ သန်းဝန်းကျင်ခံရပြီး၂ သိန်းမှာအဆိုးဆုံးခံရမည်ဟု GDACS ခန့်မှန်း
▪︎မနက်ဖြန်(မေ ၁၄ ရက်)တွင် ရခိုင်ကမ်းရိုးတန်းကို လေတိုက်နှုန်း အများဆုံးမိုင် ၁၁၀ ဝန်းကျင်ဖြင့်တိုက်ခတ်မည်ဟု အိန္ဒိယမိုးဇလနှင့် JTWC ခန့်မှန်း
မိုခါဆိုင်းကလုန်းမုန်တိုင်းဒဏ်အဆိုးဆုံးခံရနိုင်သော စစ်တွေ ၊ကျောက်ဖြူ ၊မြေပုံ ၊ပေါက်တော၊ပုဏ္ဏကျွန်း၊ရသတောင်၊အမ်းစသော ဒေသမှပြည်သူများအနေဖြင့် ဘေးလွတ်ရာသို့ အမြန်ဆုံးပြောင်းရွေ့ကြရန် အမျိုးသားညီညွတ်ရေးအအစိုးရ(NUG)က သတိပေးသည်။
အားကောင်းသောမုန်တိုင်းကြောင့် လေပြင်းထန်ခြင်း ၊မိုးသည်းထန်စွာရွာသွန်းခြင်း ၊မုန်တိုင်ဒီရေ တက်ခြင်း ၊ မြေပြိုခြင်း၊ရေကြီးရလျှံဖြစ်နိုင်ခြင်းစသော သဘာဝဘေးအန္တရာယ်များကြုံနိုင်၍ စစ်တွေ ၊ကျောက်ဖြူ ၊မြေပုံ ၊ပေါက်တော၊ပုဏ္ဏကျွန်း၊ရသတောင်၊အမ်းစသည့်ဒေသများမှာ မှာဘေးလွတ်ရာသို့ အမြန်ပြောင်းရွေ့သင့်ကြောင်း NUG ၊လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန(MOHADM) က မေ ၁၂ ရက်ညတွင်သတိပေးသည်။အထက်ပါဒေသများအပြင်မြေငူကျွန်း ၊ကိုင်းထောင့်ကြီး၊ဆင်ဂျက် ၊ဝဘော်ကြီး ဒေသများမှ ပြည်သူများလည်းအမြန်ရွေ့ပြောင်းရန် တိုက်တွန်းထားသည်။
ယနေ့မနက်တွင် မိုခါမုန်တိုင်းသည် ဘင်္ဂလားပင်လယ်အော်အလယ်ပိုင်းတွင် အလွန်အားကောင်းသောဆိုင်ကလုန်းမုန်တိုင်းအဖြစ် ရှိနေပြီးတစ်နာရီလျှင် ၆ မိုင်ကျော်နှုန်းဖြင့်မြောက် ၊အရှေ့မြောက်အရပ်သို့ ရွေ့လျားနေသည်။ လက်ရှိတွင် စစ်တွေမြို့ ၏ အနောက်တောင်ဘက် မိုင် ၄၃၄ မိုင်ဝန်းကျင်ရှိပင်လယ်ပြင်တွင် ရှိနေပြီး ၆ နာရီအတွင်း အလွန့်အလွန်အားကောင်းသောဆိုင်ကလုန်းမုန်တိုင်းကြီးအဖြစ်ပိုအားကောင်းလာမည်ဟု အိန္ဒိယမိုးဇလကယနေ့မနက် ၄ နာရီခွဲတွင်ထုတ်ပြန်သည်။
အိန္ဒိယမိုးဇလ၏ မိုခါမုန်တိုင်းကမ်းခြေဖြတ်သန်းဝင်ရောက်မည့်နေရာ ၊အချိန် ၊ လေတိုက်နှုန်းတို့မှာ မေ ၁၂ ရက်ခန့်မှန်းချက်နှင့်အတူတူပင်ဖြစ်ပြီး မေ ၁၄ ရက် နံနက်ပိုင်းတွင် မြန်မာနိုင်ငံကျောက်ဖြူမြို့နှင့် ဘင်္ဂလားဒေရှ်နိုင်ငံကော့ဘဇာကြားမှာ လေတိုက်နှုန်းတစ်နာရီလျှင် အနိမ့်ဆုံး ၉၃ မိုင်မှ အမြင့်ဆုံး ၁၀၉ မိုင်အတွင်းတိုက်ခတ်နိုင်သည်ဟု အိန္ဒိယမိုးဇလ(IMD)က ယနေ့ နံနက်တွင် ခန်မှန်းထုတ်ပြန်သည်။
Public Service Announcement
အမေရီကန်ရေတပ်၏ မုန်တိုင်းစောင့်ကြည့်သတိပေးစင်တာ ဖြစ်သောJTWC(Joint Typhoon Warning Center)က မြန်မာနှင့် ဘဂ်လားဒေရှ်ကမ်းရိုးတန်း ဖြတ်ကျော်ခါနီးတွင် မေ ၁၄ ရက်၌ တစ်နာရီ လေတိုက်နှုန်း အမြင့်ဆုံး ၁၁၅ မိုင်ဝန်းကျင်ရှိနိုင်သည်ဟု ထပ်မံထုတ်ပြန်ထားသည်။
အဆိုပါလေတိုက်နှုန်းဖြင့် တိုက်ခတ်ပါက နာဂစ်မုန်တိုင်း၊ ဂီရိ မုန်တိုင်းတို့က မိုခါမုန်တိုင်းထက်ပိုအားပြင်းနေသည်။
ကမ္ဘာလုံးဆိုင်ရာ သဘာဝဘေးအန္တရာယ်သတိပေးချက်နှင့်ပူးပေါင်းဆောင်ရွက်ရေးစနစ်(GDACS )ကလည်း မုန်တိုင်းသည် မြန်မာပြည်သူ ၃ သန်းဝန်းကျင်အပေါ် သက်ရောက်မည်ဖြစ်ပြီးမုန်တိုင်းဒဏ်အဆိုဆုံးရင်ဆိုင်ရမည့် ပြည်သူ ၂ သိန်းရှိနိုင်သည်ဟု မေ ၁၂ ရက်တွင်ပြန်သည်။ဘင်္ဂလားဒေရှ်နိုင်ငံမှ ပြည်သူ ၈ သိန်းခန့်မှာလည်း မုန်တိုင်းဒဏ်ခံရမည် ဖြစ်ပြီးရိုဟင်ဂျာ ဒုက္ခသည်သည်များလည်း မုန်တိုင်းဒဏ်ခံရနိုင်ကြောင်း GDACS ကအသိပေးထားသည်။
ရခိုင်ပြည်နယ်မှာမုန်တိုင်းဒီရေတက်ခြင်း ၊ လေပြင်းတိုက်ခတ်ခြင်း၊ မိုးသည်ထန်စွာရွာသွန်းခြင်း၊ရေကြီးရေလျှံခြင်းစသောမုန်တိုင်းနောက်ဆက်တွဲများကိုအများဆုံးရင်ဆိုင်ရမည်ဖြစ်ကြောင်း နိုင်ငံတကာမိုးဇလခန့်မှန်းချက်များအရသိရသည်။ ၂၀၀၈ မေလက နာဂစ်မုန်တိုင်းတွင် ပြည်သူအများစုသေဆုံးခဲ့သည်မှာ မုန်တိုင်းဒီရေ တက်လာပြီး ပြည်သူများ၊နေအိမ်များ အပါအဝင် အရာဝတ္ထုအားလုံးကို ဆွဲချသွား၍ဖြစ်ပြီး ယခုတစ်ကြိမ်တွင်လည်းမုန်တိုင်းဒီရေကို ရခိုင်ကမ်းရိုးတန်းဒေသများအထူးသတိထားရန် မိုးလေဝသ ပညာရှင်အချို့က သတိပေးထားသည်။ NUG က ရခိုင်ကမ်းရိုးတန်းဒေသများတွင် မုန်တိုင်းဒီရေ အနည်းဆုံး ၆ ပေမှ အမြင့်ဆုံး ၁၂ ပေအထိ့တက်နိုင်ကြောင်းသတိပေးထားသည်။
စစ်ကိုင်းတိုင်း ၊မကွေးတိုင်း၊ချင်းပြည်နယ်၊ဧရာဝတီမြစ်ဝကျွန်းပေါ် အပါအဝင် နိုင်ငံဧရိယာအများစုမှာလည်း မိုးသည်ထန်စွာရွာသွန်းခြင်း ၊လေပြင်းတိုက်ခတ်ခြင်း၊ရုတ်တရက်ရေကြီးခြင်း ၊မြေပြိုခြင်းစသောဘေးအနာဆရာယ်များကိုသတိပြုရန် မုန်တိုင်းစောင့်ကြည့်ရေးဌာနများကသတိပေးထားသည်။
မုန်တိုင်းသည်ရခိုင်ကမ်းရိုးတန်းကိုဖြတ်ကျော်ပြီး ကုန်တွင်းပိုင်းသို့ စစ်ကိုင်တိုင်းနှင့် ချင်းပြည်နယ်သို့ မေ ၁၄ ရက်ဝင်လာချိန်မှာပင် တစ်နာရီလေတိုက်နှုန်း ၅၇ မိုင်ကျော်ရှိနိုင်သေးကြောင်း JTWC နှင့် အိန္ဒိယမိုးဇလတို့ကခန့်မှန်းမှန်းသည်။ထိုနောက်စစ်ကိုင်းတိုင်းတွင် မေ ၁၅ ရက်အထိတစ်နာရီလေတိုက်နှုန်း မိုင် ၂၀ ကျော်ဖြင့်ရှိနေရာမှ တဖြည်းဖြည်းအားပျော့ပျောက်ကွယ်သွားမည်ဟု JTWC နှင့် IMDကခန့်မှန်းသည်။
လေတိုက်နှုန်းခန့်မှန်းတွက်ချက်ရာတွင်NUG -MOHADMက အများစုနှင့်ကွာခြားနေသည်။မိုင်တစ်ရာကျော်နှုန်းဖြင့်တိုက်ခတ်လာသောအားကောင်းသည့်ဆိုင်ကလုန်းမုန်တိုင်းသည် ကုန်းတွင်းပိုင်းဝင်ရောက်ချိန်တွင် ရခိုင်ရိုးမတောင်တန်းများကြောင့် အရှိန် ၂ ဆင့်ခန့်လျော့ကျသွားပြီး လေတိုက်နှုန်းမှာ အများဆုံး (၇၀)မှ (၇၅)မိုင်ခန့်နှုန်းဖြင့် သာတိုက်ခတ်နိုင်သည်ဟုခန့်မှန်းထားခြင်းဖြစ်သည်။မုန်တိုင်းသည် မေလ (၁၄)ရက်နေ့၊ ညသန်ခေါင်းယံအချိန်တွင် ရခိုင်ကမ်းရိုးတန်းကို မောင်တောမြို့နှင့် စစ်တွေမြို့ကြား (ကျောက်ပန္ဒူရွာအနီး)မှ ဖြတ်ကျော်ဝင်ရောက်နိုင်သည်ဟု MOHADM ကထုတ်ပြန်ခဲ့သည်။
၂၀၁၀ အောက်တိုဘာ ၂၇ ရက်ကဂီရိမုန်တိုင်းတိုက်ခတ်ခဲ့စဥ်က ရခိုင်ရိုးမတောင်တန်းများကာဆီးမှုကြောင့်မုန်တိုင်းအရှိန်လျော့ကျသွားပြီး လူသေဆုံးထိ့ခိုက်မှု နာဂစ်မုန်တိုင်းနှင့်ယှဥ်လျှင် အဆပေါင်းများစွာလျော့နည်းခဲ့သည်။
(JTWC ၊ အိန္ဒိယမိုးဇလ ၊ GDACS ၊ NUG-MOHADM တို့၏ ခန့်မှန်းချက်နှင့်သတိပေးချက်များ)
●မှတ်ချက် -Knot ၏ ယူနစ် KTS ကို မိုင်နှုန်းသို့ပြောင်းလိုပါက ၁.၁၅၁ ဖြင့်မြှောက်ရမည်ဖြစ်သည်
