ဝင်းမောင်/People’s Spring
ရှမ်းပြည်နယ်မြောက်ပိုင်း မူဆယ်မြို့နယ်ရှိ တအာင်းတပ်မတော်(TNLA) တပ်မဟာ(၁)၏ လွယ်မောက်တပ်စခန်းကို စစ်ကောင်စီက ပေါင် ၅၀၀ ဗုံးများ အသုံးပြုပြီး လေကြောင်းမှ ဗုံးကြဲတိုက်ခိုက်ခဲ့ကြောင်း TNLAက ယနေ့ သတင်းထုတ်ပြန်သည်။
စက်တင်ဘာ ၂၅ရက်ည ၁၀နာရီ ၁၅မိနစ်တွင် တစ်ကြိမ်၊ ၁၀နာရီ ၂၃ မိနစ်တွင် တစ်ကြိမ် TNLA တပ်ရှိရာနှင့် မန်ကန်ရွာ၊ နမ့်ငူးရွာ အနီးသို့ ဗုံးကြဲခဲ့ပြီး ၁၀နာရီခွဲတွင်လည်း TNLA တပ်မဟာ(၁) တပ်စခန်း လွယ်မောက်စခန်းကို ပေါင် ၅၀၀ ဗုံးသီး ၂လုံးဖြင့် ထပ်မံ ဗုံးကြဲလာခြင်းဖြစ်သည်ဟုဆိုသည်။
ယင်းသို့ ဗုံးကြဲတိုက်ခိုက်မှုကြောင့် TNLA တပ်စခန်း အဆောက်အဦး ပျက်စီးထိခိုက်မှု ရှိခဲ့သော်လည်း လူထိခိုက်သေဆုံးမှု မရှိကြောင်း အသိပေးထားသည်။
Public Service Announcement
လက်တလောစစ်ရေးအခြေအနေနှင့် လေကြောင်း တိုက်ခိုက်မှု အခြေအနေများကို မေးမြန်းရန် TNLA တာဝန်ရှိသူ ထံဆက်သွယ်ခဲ့သော်လည်း အဆက်အသွယ်မရပေ။
TNLAနှင့် စစ်ကောင်စီတပ်တို့သည် မူဆယ်မြို့နယ်တွင် စက်တင်ဘာ ၂၃ရက်က တိုက်ပွဲဖြစ်ပွားခဲ့သော်လည်း ယင်းနောက်ပိုင်း တိုက်ပွဲဖြစ်ပွားမှုမရှိဘဲ စစ်ကောင်စီက လာရောက်ဗုံးကြဲတိုက်ခိုက်လာခြင်းဖြစ်သည်ဟု ဆိုသည်။
TNLAနှင့် စစ်ကောင်စီတပ်တို့သည် ဇူလိုင်မှစ၍ မူဆယ်မြို့နယ်၌ တိုက်ပွဲများ ဖြစ်ပွားခဲ့ရာ စယ်လန့်၊ နမ့်ကတ်၊ နာထန်၊ ဂေါင်ရာ၊ နမ့်တောင်၊ လွယ်ကျလော့၊ ဟိုပေါ်၊ ဆိုင်ခေါင်နှင့် ကောင်ရာ ရွာများ၌ တိုက်ပွဲဖြစ်ခဲ့ကြောင်း အသိပေးထားသည်။
ထို့ပြင် ကွတ်ခိုင်နှင့် မိုးကုတ်မြို့နယ်များ၌လည်းတိုက်ပွဲပြင်းထန်ခဲ့ကြောင်း ထုတ်ပြန်ထားသည်။ ဇူလိုင်မှ ယနေ့အထိ တိုက်ပွဲပေါင်း ၆၀ကြိမ်ခန့်ဖြစ်ခဲ့သည်ဟု TNLA၏ ထုတ်ပြန်များအရ သိရသည်။
