စစ်ကောင်စီ၏ စစ်ကူတပ်များကို ဟန့်တားရန်လားရှိုး-သိန္နီကြားရှိ တံတားတစ်ခုကို ဖျက်ဆီး
စစ်ကောင်စီ၏ စစ်ကူတပ်များကို ဟန့်တားရန်လားရှိုး-သိန္နီကြားရှိ တံတားတစ်ခုကို ဖျက်ဆီးကိုးကန့်ဒေသရှိ စစ်ကောင်စီတပ်စခန်း တစ်ခုကို နိုဝင်ဘာ ၃၀ရက်တွင် ထပ်မံသိမ်းပိုက်နိုင်ခဲ့ကြောင်း ကိုးကန့်တပ်မတော်(MNDAA)က သတင်းထုတ်ပြန်သည်။
ကိုးကန့် တုန်းရှမ်းဒေသ တာရှင်ကျိုင့်နှင့် တိုက်ကြာကျိုင့်နေရာကြားရှိ စစ်ကောင်စီ တပ်စခန်းတစ်ခုကို တိုက်ခိုက်သိမ်းပိုက်ခဲ့ခြင်းဖြစ်ပြီး လက်နက်ခဲယမ်းအချို့ ရရှိခဲ့သည်ဟု အသိပေးသည်။
ထို့ပြင် စစ်ကောင်စီ၏စစ်ကူအဖွဲ့များ တားမြစ်ရန်အတွက် အထူးဒေသ(၁) မူပန်(သိန္နီ)ခရိုင်လုံခြုံရေး တပ်ဖွဲ့မှ လားရှိုးနှင့် မူပန်(သိန္နီ)ဆက်သွယ်ထားသောတံတားကို နိုဝင်ဘာလ ၂၉ ရက် က ဖြတ်တောက်လိုက်ကြောင်း အသိပေးထားသည်။
နိုဝင်ဘာ ၃၀ ရက် နံနက်အချိန်တွင် MNDAA နှင့် ဒေသလုံခြုံရေးတပ်ဖွဲ့တို့ပူးတွဲပြီး မူပန်(သိန္နီ)ခရိုင် ၊ သန်လွင်အုပ်စုတွင် လှုပ်ရှားနေသောစစ်ကောင်စီတပ်ဖွဲ့ကို ဒရုန်းဖြင့် သုံးကြိမ်တိုင်တိုင် ပစ်ခတ် တိုက်ခိုက်ခဲ့သည်ဟုလည်း ထုတ်ပြန်သည်။
Public Service Announcement
၁၀၂၇ စစ်ဆင်ရေးစတင်ခဲ့သည့် အောက်တိုဘာ ၂၇ရက်မှ နိုဝင်ဘာကုန်ပိုင်းအထိ စစ်ကောင်စီ၏ တပ်စခန်းအကြီး အသေး စုစုပေါင်း(၁၈၆)ခု မဟာမိတ်တပ်ပေါင်းစုက သိမ်းပိုက်နိုင်ခဲ့သည်ဟု အသိပေးသည်။ တအာင်းတပ်မတော်(TNLA)ကလည်းစစ်ကောင်စီတပ်စခန်း ၄၇ ခုထက်မနည်းကို သိမ်းပိုက်ထား၍ စစ်ဆင်ရေး ၃၅ရက်အတွင်း စစ်ကောင်စီတပ်စခန်း ၂၃၃ ခုထက်မနည်းကို သိမ်းပိုက်ထားပြီးဖြစ်သည်။
ထို့ပြင် စစ်ဆင်ရေးအတွင်း ချင်းရွှေဟော် ၊ မုံးကိုး ၊ ကွမ်းလုံ ၊ ပန်ဆိုင်း နှင့် ကုန်းကြမ်းစသည့် မြို့နယ်(၅)ခုကိုသိမ်းပိုက်ရရှိခဲ့သည့်အပြင် ချင်းရွှေဟော် ၊ မုံးကိုး ၊ ပန်ဆိုင်း နှင့် ကျင်းစန်းကျော် နေရာရှိ နယ်စပ်ဂိတ် (၄)ခုကိုလည်း အောင်မြင်စွာသိမ်းပိုက်နိုင်ခဲ့ကြောင်း အသိပေးသည်။ ယခင်က သိန္နီမြို့ကိုပါ မဟာမိတ်တပ်များက သိမ်းပိုက်ထိန်းချုပ်ထားခြင်းဖြစ်သည်။ အဆိုပါသိန္နီမြို့နေရာသည် စစ်ကောင်စီတပ်များ စစ်ကူ အလွယ်တကူ ပို့နိုင်သည့် ဒေသဖြစ်၍လက်ရှိတွင် ပြောက်ကျား တိုက်ပွဲများ ဆက်လက်ဆင်နွှဲလျက်ရှိကြောင်း MNDAA ပြောရေးဆိုခွင့်ရှိသူ လီကျာဝင်းက ရှင်းပြသည်။
လက်ရှိ လက်နက်ကိုင်တော်လှန်ရေးတပ်ဖွဲ့မှ တစ်နိုင်ငံလုံးအတိုင်းအတာရှိ စုစုပေါင်း မြို့နယ် (၁၈)ခုကို ပြန်လည်သိမ်းပိုက်နိုင်ခဲ့ကြောင်း ထုတ်ပြန်ထားသည်။
