ထားမြတ်/People’s Spring
လားရှိုးအကျဉ်းထောင်အား ညီနောင် သုံးဖွဲ့မှ ထိန်းသိမ်းနိုင်ပြီးနောက် ကိုးကန့်တပ်မတော် (MNTJP/MNDAA)မှ တအာင်းလူမျိုး အကျဉ်းသား ၁၁၈ဦးကို လွှဲပြောင်း ပေးအပ်လာကြောင်း တအာင်းတပ်မတော်(TNLA)က ထုတ်ပြန်သည်။
ညီနောင်မဟာမိတ် သုံးဖွဲ့မှ ကိုးကန့်တပ်မတော် MNDAA ဦးဆောင်၍ တော်လှန်ရေးပူးပေါင်းတပ်ဖွဲ့များနှင့်အတူ လားရှိုးမြို့ရှိ စစ်အာဏာရှင်စစ်ကောင်စီ၏ အုပ်ချုပ်ရေးယန္တယားအား ဖယ်ရှားတိုက်ဖျက်ရေးတိုက်ပွဲဆင်နွှဲရာ ဇူလိုင် ၂၄ရက်တွင် လားရှိုးအကျဉ်းထောင်အား သိမ်းပိုက်နိုင်ခဲ့ခြင်းဖြစ်သည်။
လွှဲအပ်ပေးသည့်အကျဉ်းသား ၁၁၈ဦးတွင် မတရားအသင်းနှင့် ဆက်သွယ်သည့်ပုဒ်မ ၁၇/၁ဖြင့် တရားစွဲခံရသူအကျဉ်းသား (၅)ဦး၊ မသင်္ကာမှုဖြင့် ၁၅ဦး၊ လောင်းကစားမှုဖြင့် တစ်ဦး၊ အရေးပေါ်ထုတ်ပြန်သည့်အမိန့် Martial Law ဥပဒေဖြင့် သုံးဦး၊ ရဲပြေးမှုနှင့် လဝက အမှု လေးဦး၊ ဓါးပြတိုက်မှု နှစ်ဦး၊ ရဲစီးမှု တစ်ဦး၊ လူကုန်ကူးမှု (၂)ဦး၊ မူးယစ်မှု ၈၆ဦးတို့ ပါဝင်ကြောင်း ဖော်ပြသည်။
Public Service Announcement
အဆိုပါ အကျဉ်းသားများကို ပလောင်ပြည်နယ်လွတ်မြောက်ရေးတပ်ဦး PSLF/TNLA အုပ်ချုပ်ရေးဌာနမှ လက်ခံနေရာချမှတ်ပေးထားသည်ဟု ဆိုသည်။
ထို့နောက် ၎င်းတို့၏ သက်ဆိုင်ရာအမှုအသီးသီးကို ပြန်လည်စိစစ်ကာ ပြန်လွှတ်ပေးခြင်း၊ ပြစ်မှုဆိုင်ရာ ပြန်လည်အရေးယူခြင်းစသည့်လုပ်ငန်းစဉ်များ စီစဉ်ဆောင်ရွက်လျက် ရှိသည်ဟု အသိပေးသည်။
ထို့အပြင် လားရှိုးအကျဉ်းထောင်မှ လွတ်မြောက်ပြီးဖြစ်သော်လည်း သက်ဆိုင်ရာမိသားစုထံနှင့် TNLAထံ မရောက်ရှိသေးသည့် တအာင်းနိုင်ငံအကျဥ်းသားများကိုလည်း မိသားစုထံပြန်လည် ရောက်ရှိနိုင်ရေးအတွက် ကိုးကန့်တပ်ဖွဲ့ MNDAAနှင့် ဆက်လက်ညှိနှိုင်းနေသည်ဟု TNLAက ထုတ်ပြန်သည်။
