မိထက်/People’s Spring
ရှမ်းပြည်နယ်မြောက်ပိုင်း သီပေါမြို့ထဲရှိ စစ်ကောင်စီတပ်ဖွဲ့ဝင်များ မြို့ပြင်ဘက်ရှိတပ်ရင်းထဲသို့ ဆုတ်ခွာသွားပြီး မြို့မထိခိုက်စေရေးအတွက် လက်နက်ချရန် မဟာမိတ်ပူးပေါင်းတပ်ဖွဲ့များက ကမ်းလှမ်းညှိနှိုင်းနေကြောင်း သတင်းရရှိသည်။
“စစ်တပ်က ခလရ(၂၃)ရယ် ခမရ ၅၀၃၊ ၅၀၄ ထဲကို ဝင်သွားတယ်။ မဟာမိတ်တွေက ဝိုင်းပတ် ပိတ်ဆို့ထားတယ်။ လက်နက်ချဖို့ ဒီဖက်က ညှိတယ်။ စစ်တပ်က ဆုတ်ခွာခွင့်တောင်းထားတယ်လို့ သိရတယ်” ဟု သီပေါမြို့ခံတစ်ဦးကပြောသည်။
Public Service Announcement
သီပေါမြို့မှ ရဲစခန်း၊ ထွေအုပ်ရုံးအပါအဝင်စစ်ကောင်စီစခန်းများကို ယနေ့ နံနက်အစောပိုင်းမှစ၍ တအာင်းအမျိုးသားလွတ်မြောက်ရေးတပ်မတော်(TNLA)နှင့် မဟာမိတ်များက စစ်ကောင်စီစခန်းများကိုတိုက်ခိုက်ခြင်းဖြစ်သည်။ တိုက်ပွဲအပြင်းအထန်ဖြစ်ပွားပြီးနောက် စစ်ကောင်စီတပ်ဖွဲ့ဝင်များ ဆုတ်ခွာသွားခြင်းဟု သိရသည်။
“မြို့ပေါ်မှာ မရှိတော့လို့ စိတ်နည်းနည်းအေးတယ်။ ဝိုင်းပိတ်ခံထားရတဲ့ စစ်ကောင်စီတပ်လည်း လက်နက်ချစေချင်တယ်။ မချရင်တော့ အသက်ပေးရမှာပဲ” ဟု ဒေသခံတစ်ဦးကပြောသည်။
နေ့လယ်ပိုင်းက တိုက်ပွဲတွင် သီပေါထောင်လည်း ပွင့်သွားပြီး အကျဉ်းသားအချို့လွတ်မြောက်ခဲ့သည်ဟုသိရသည်။ ထောင်ပွင့်သွားသည်ကို အတည်ပြုနိုင်သော်လည်း အကျဉ်းသားများနှင့်ပတ်သက်၍ အသေးစိတ်အတည်မပြုနိုင်သေးပေ။
ယနေ့ညနေပိုင်း၌ မြေပြင်တိုက်ပွဲမဖြစ်ပွားသော်လည်း စစ်ကောင်စီကလေကြောင်းမှ ကင်းထောက်နေကြောင်းသတင်းရရှိသည်။ မြို့အပြင်ဘက်ကျေးရွာအချို့မှ ဒေသခံများကို မဟာမိတ်ပူးပေါင်းတပ်ဖွဲ့များက ယာယီတိမ်းရှောင်ခိုင်းထားသည်။
သီပေါမြို့သည် ကိုးကန့်တပ်မတော်(MNDAA)ထိန်းချုပ်ထားသည့်လားရှိုးမြို့နှင့် TNLA ထိန်းချုပ်ထားသည့် ကျောက်မဲမြို့ကြား၌တည်ရှိသည်။
(TNLA တပ်ဖွဲ့ဝင်အချို့ကို ရှေ့တန်းနှင့် သိမ်းပိုက်ခဲ့သော ကျောက်မဲမြို့တွင်းတို့၌ တွေ့ရစဉ်။ ပုံဟောင်းကို အသုံးပြုထားသည်။)
