ဟန်နွေ/People’s Spring
လားရှိုးမြို့တိုက်ပွဲအတွင်း ဖမ်းမိသည့် စစ်ကောင်စီတပ်ဖွဲ့ဝင်များအနက် စစ်သုံ့ပမ်း ၅၅ဦးနှင့် ၎င်းတို့၏ မိသားစုဝင်များကို ထပ်မံ လွှတ်ပေးလိုက်ကြောင်း ကိုးကန့် တပ်မတော် (MNDAA)က ယနေ့ သတင်းထုတ်ပြန်သည်။
MNDAAအနေဖြင့် လားရှိုးမြို့ အရှေ့မြောက်ပိုင်းတိုင်းစစ်ဌာနချုပ်(ရမခ)အား သိမ်းပိုက်စဉ် စစ်သုံ့ပမ်း ထောင်ချီ ဖမ်းမိခဲ့ရာ စစ်သုံ့ပမ်းမိသားစုဝင်များကို ဩဂုတ် ၆ရက်မှစ၍ ပြန်လည်လွှတ်ပေးခြင်းများ ပြုလုပ်လျက်ရှိရာဩဂုတ် ၁၁ ရက်တွင် စစ်သုံ့ပမ်း ၅၅ဦး၊ ၎င်းတို့၏ မိသားစုဝင် ၂၇၆ ဦး စုစုပေါင်း ၃၃၁ဦးကို ပြန်လွှတ်ပေးခဲ့သည်ဟုဆိုသည်။
Public Service Announcement
ထိုသို့ လွှတ်ပေးခြင်းအပြင် လမ်းစရိတ်များ ပေးခဲ့ကြောင်းလည်း ကိုးကန့်တပ်မတော်က ထုတ်ပြန်သည်။
MNDAAအနေဖြင့် လူသားချင်းစာနာထောက်ထားမှု ပြသသည့်အနေဖြင့် ထိုသို့လွှတ်ပေးခြင်း၊ လမ်းစရိတ်ပေးခြင်း၊ ဒဏ်ရာရသူများအားကုသပေးခြင်း၊ စစ်သုံ့ပမ်းမိသားစုဝင်များကို စားနပ်ရိက္ခာထောက်ပံ့ပေးခြင်းများ ပြုလုပ်ခဲ့သည်ဟု အသိပေးသည်။
MNDAA အနေဖြင့် ထိုသို့ စစ်သုံပမ်းများကို ပြန်လွှတ်ပေးမှု ရှိသကဲ့သို့ တစ်ဖက်တွင်လည်း စစ်သုံပမ်း ထောင်ချီကျန်ရှိနေပြီး ၎င်းတို့အား ကယ်ဆယ်ရေးစခန်းများ ဖွင့်လှစ်ထားရှိခဲ့ဟု အသိပေးထားသည်။
