ဟန်နွေ/People’s Spring
ရှမ်းပြည်နယ်မြောက်ပိုင်း လားရှိုးမြို့တွင် စစ်ကောင်စီ လေကြောင်းတိုက်ခိုက်မှုကြောင့် သေဆုံးခဲ့သူများ၏ မိသားစုဝင်များကို ကိုးကန့်တပ်မတော်(MNDAA)၏ လားရှိုးဧရိယာ စစ်ရေးအုပ်ချုပ်မှုကော်မတီက သွားရောက်တွေ့ဆုံကာ ဝမ်းနည်းကြေကွဲကြောင်း အသိပေးပြီး လူသားချင်းစာနာမှုဆိုင်ရာ စောင့်ရှောက်မှုပေးရန်အတွက် နှစ်သိမ့်ကြေးထောက်ပံ့ခဲ့ကြောင်း MNDAAက ယနေ့ ထုတ်ပြန်သည်။
လားရှိုးမြို့ကို MNDAA သိမ်းပိုက်ပြီးနောက် ဩဂုတ် ၃၀ရက်မှ အောက်တိုဘာ ပထမပတ် အထိ စစ်ကောင်စီက လေကြောင်းတိုက်ခိုက်မှု ၁၃ကြိမ်ထက်မနည်း ပြုလုပ်ခဲ့သည်။
Public Service Announcement
အဆိုပါ တိုက်ခိုက်မှုများအတွင်းရအရပ်သား သုံးဦး သေဆုံးပြီး ပြည်သူ၁၀၀ နီးပါးဒဏ်ရာရရှိခဲ့ကြောင်း MNDAAက အသိပေးသည်။ ဒေသခံများ၏ ပြောကြားချက်အရ သေဆုံးသူ အရပ်သားဦးရေမှာ ၃ဦးထက်ပိုမိုသည်ဟု ဆိုသည်။
လေကြောင်းတိုက်ခိုက်ခံရမှုကြောင့် ထိခိုက်ဒဏ်ရာရရှိသူများအား ဆေးရုံသို့ သွားရောက်ကြည့်ရှုစစ်ဆေးပြီးနောက် အောက်တိုဘာ ၉ ရက် မနက်တွင် လားရှိုးဧရိယာ စစ်ရေးအုပ်ချုပ်မှုကော်မတီအဖွဲ့၏ သက်ဆိုင်ရာလုပ်ငန်းအဖွဲ့သည် သေဆုံးသူ ၃ဦး၏ နေအိမ်များသို့ သွားရောက်ကာ ဝမ်းနည်းကြောင်းဖော်ပြ နှစ်သိမ့်ခဲ့သည်ဟု MNDAAက ထုတ်ပြန်သည်။
မိသားစုများအတွက် လားရှိုးဧရိယာ စစ်ရေးအုပ်ချုပ်မှုကော်မတီ၏ နက်နက်ရှိုင်းရှိုင်း စိုးရိမ်ပူပန်မှုကို ထုတ်ဖော်ပြောကြားပြီး သေဆုံးသူများ၏မိသားစု အခြေအနေများကို စိတ်ရှည်လက်ရှည် ဂရုတစိုက်မေးမြန်းခဲ့ကြောင်း ဖော်ပြသည်။
ထို့ပြင် လုပ်ငန်းအဖွဲ့အနေဖြင့် ၎င်းတို့ ဘဝတွင်
အခက်အခဲများကြုံတွေ့ရပါက ၎င်းတို့နေထိုင်ရာ ရပ်ရွာစီမံခန့်ခွဲမှုရုံးသို့ သတင်းပို့နိုင်ပြီး သက်ဆိုင်ရာဌာနများက အဆိုပါပြဿနာကို ကူညီဖြေရှင်းပေးနိုင်ရန် အတတ်နိုင်ဆုံး ကြိုးစားဆောင်ရွက်မည်ဖြစ်ကြောင်း ပြောကြားခဲ့သည်ဟုဆိုသည်။
ထိုနေ့တွင် လုပ်ငန်းအဖွဲ့မှ နှစ်သိမ့်ငွေကျပ် ၁၅ သိန်းနှင့် ဆန်တစ်အိတ်နှင့် ဟင်းချက်ဆီတစ်ပုံးကို မိသားစုတစ်စုစီကို ပေးအပ်ခဲ့ကြောင်းလည်း ထုတ်ပြန်သည်။
စစ်ကောင်စီ၏ လေကြောင်း တိုက်ခိုက်မှုများ ကြုံရချိန်တွင် လားရှိုးဧရိယာ စစ်ရေး အုပ်ချုပ်မှုကော်မတီသည် အခင်းဖြစ်ပွားရာနေရာသို့ အလျင်အမြန် သွားရောက်၍ ရှာဖွေကယ်ဆယ်ရေးလုပ်ငန်းများကို ဆောင်ရွက်ပြီး ပြည်သူများ၏ အသက်အိုးအိမ် စည်းစိမ်များဆုံးရှုံးမှု အနည်းဆုံးဖြစ်အောင် ကြိုးပမ်းဆောင်ရွက်ပေးလျက်ရှိသည်ဟုလည်း MNDAAက အသိပေးသည်။
