ဇေအောင်/People’s Spring
ထားဝယ်အကျဉ်းထောင်မှ နိုင်ငံရေးအကျဉ်းသားတစ်ဦး ဆေးကုသမှုလုံလောက်စွာမရ၍ သေဆုံးခဲ့ရပြီး ယခုနှစ်အတွင်း အကျဥ်းထောင်များ၌ သေဆုံးသူ ၁၅ ဦးအထိ ရှိလာကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)က သတင်းထုတ်ပြန်သည်။
ထားဝယ်အကျဉ်းထောင်တွင် ပုဒ်မ (၅၀)ည နှင့်ပုဒ်မ (၅၂)တို့ဖြင့် မတရားဖမ်းဆီးခံထားရသည့် (၆၂)နှစ်အရွယ် နိုင်ငံရေးအကျဉ်းသား ဦးရဲအောင်(ခ)ကိုချင်းဆိုသူသည် အောက်တိုဘာ ၁၇ရက်တွင် ထားဝယ်ဆေးရုံ၌ သေဆုံးခဲ့ရကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM)က အသိပေးသည်။
အဆိုပါ နိုင်ငံရေးအကျဥ်းသားသည် အကျဉ်းထောင်အတွင်း ဖမ်းဆီးခံထားရစဉ် စက်တင်ဘာ၂၇ရက်တွင် လေဖြတ်သွားသည့်အတွက် ထောင်တွင်းဆရာဝန်အင်အားလောက်ငှမှုမရှိ၍ ထောင်ပြင်ပသို့ ပို့ဆောင်ကုသမှုခံယူခဲ့ရကြောင်း၊ အဆိုပါ လေဖြတ်ရောဂါဝေဒနာကို ကုသမှုခံယူနေချိန်၌ သေဆုံးသွားခြင်းဖြစ်ကြောင်း PPNMက ထပ်မံအသိပေးသည်။
Public Service Announcement
ထို့ကြောင့် ၂၀၂၄အတွင်း အကျဥ်းထောင်များအတွင်း၌ ဆေးဝါးစောင့်ရှောက်မှု
မလုံလောက်၍ သေဆုံးသူ ၁၅ဦးအထိရှိလာကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက်(PPNM)က ထုတ်ပြန်ထားသည်။
“ထောင်တွင်းဆေးဝါးစောင့်ရှောက်မှု လုံလောက်စွာ မရရှိတဲ့အခြေအနေကို သူလေဖြတ်တဲ့ဝေဒနာ ခံရစဥ်မှာပဲ တွေ့ရတယ်။ ထောင်ငယ်တွေမှာဆိုရင် ပိုပြီးဆိုးရွားတဲ့ ထောင်တွင်း လူ့အခွင့်အရေးချိုးဖောက်မှုတွေကို ပိုပြီးတွေ့ရတယ်။”ဟု PPNM ဦးဆောင်ကော်မတီဝင် ကိုသိုက်ထွန်းဦးက ပြောသည်။
ကျဆုံးရသည့် အခြေအနေအသေးအစိတ်အား မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)မှ အတည်ပြုနိုင်ရေး ကြိုးစားနေကြောင်း အသိပေးထားသည်။
