မိထက်/People’s Spring
မွန်ပြည်နယ်၊ မော်လမြိုင်မြို့၊ ရိုးကိုးရပ်ကွက်ရှိ စက်သုံးဆီဆိုင်တွင် ဆီဘောက်ဆာယာဉ် မီးလောင်ပေါက်ကွဲမှုဖြစ်ပြီး မီးငြှိမ်းသတ်သူများအပါအဝင် လူ၂၁ဦး ဒဏ်ရာရခဲ့သည်။
ဆီဆိုင်အတွင်းရပ်ထားသည် ဆီဘောက်ဆာ ယာဉ်သည် ယနေ့(နိုဝင်ဘာ ၇ရက်) ညနေ ၅နာရီ ၂၀ မိနစ်တွင် မီးစတင်လောင်ကျွမ်းပြီး ဆီဆိုင်ကိုပါ မီးကူးစက်ခြင်းဟု သတင်းရရှိသည်။
အဆိုပါ မီးလောင်မှုကို မီးသတ်တပ်ဖွဲ့၊လူမှုရေးအဖွဲ့များနှင့် ဒေသခံများက ဝိုင်းဝန်းငြှိမ်းသတ်စဉ် ပေါက်ကွဲမှုဖြစ်ပြီး ထိခိုက်ဒဏ်ရာရရှိခဲ့ကြခြင်းဖြစ်သည်။
Public Service Announcement
မီးသတ်တပ်ဖွဲ့ဝင် ၇ဦး၊လူမူကယ်ဆယ်ရေးသမား ၁၄ဦးဒဏ်ရာရရှိခဲ့သည်ဟု ဒေသခံတစ်ဦးက ပြောသည်။
” မီးငြိမ်းကာနီး ပေါက်ကွဲတာ။ အဲဒီမှာ ဒဏ်ရာတွေရတာ။ မီးဟပ်တာတွေကြောင့်လဲ ထိခိုက်တာရှိတယ်”ဟု နောက်ထပ်ဒေသခံတစ်ဦးက ပြောသည်။
ဆီထွက်ပေါက်ကို ပိတ်နိုင်ပြီဟု လူမှုရေးအဖွဲ့ဝင်များက အော်ပြောပြီး မကြာမီ ပေါက်ကွဲခြင်းဟု ဆိုသည်။ဒဏ်ရာရသူများ၏ အခြေအနေကို နောက်ဆက်တွဲ မသိရှိရသေးပေ။
အဆိုပါ မီးလောင်မှုကို မီးငြှိမ်းသတ်ယာဉ် ၁၀စီး၊ မီးသတ်ရေသယ်ယာဉ် ရှစ်စီးဖြင့် ငြှိမ်းသတ်ခဲ့ရာ ည ၉နာရီ၅၅ မိနစ်တွင် မီးငြိမ်းသည်ဟု မီးသတ် တပ်ဖွဲ့က သတင်းထုတ်ပြန်သည်။
