ရဲခေါင်/People’s Spring
ကရင်နီပြည်နယ်၌ သုံးလအတွင်း ရဲတပ်သားသစ် ၁၀၀ကျော်အား ခန့်အပ်နိုင်ခဲ့ကြောင်း ကရင်နီပြည်ကြားကာလအုပ်ချုပ်ရေးကောင်စီ (IEC)က အသိပေး ထုတ်ပြန်သည်။
ဇူလိုင်မှ စက်တင်ဘာအထိ သုံးလပတ်အတွင်း IEC ဌာနများ၏ လုပ်ငန်းဆောင်ရွက်ချက်များအရ ရဲတပ်သားသစ် များမွေးထုတ်ခြင်းအပါအဝင် ရဲစခန်းနှင့် ရဲကင်း သုံးခုအား တိုးချဲ့ဖွင့်လှစ်နိုင်ခဲ့သည်ဟု ဆိုသည်။
အဆိုပါကာလအတွင်း ကရင်နီပြည်ရဲဌာခွဲမှ အမှုပေါင်း ၄၁မှုအား ကိုင်တွယ်ခဲ့ပြီး ထိုအမှုများတွင် စစ်ကောင်စီနှင့်ပတ်သက်သော အမှု (၂) မှု၊ လူ သတ်မှု (၁)မှု၊ ခိုးမှု(၃)မှု၊ မူးယစ်ဆေးဝါးမှု (၂၅) မှု၊ အခြားမှု (၁၀)မှုအဖြစ် ခွဲခြားသတ်မှတ်နိုင်ပြီး၊ တရားရုံးများတွင် စစ်ဆေးဆဲ အမှု (၂၁)မှုနှင့် စိစစ်ဆဲအမှု (၂၀)မှု ရှိကြောင်း ဖော်ပြသည်။
Public Service Announcement
ထို့အပြင် ပြည်ထဲရေးဌာနအောက်ရှိ ပြည်သူ့အုပ်ချုပ်ရေးဌာနခွဲမှ မြို့နယ်အဆင့် ပူးပေါင်း အုပ်ချုပ်ရေးအဖွဲ့များကို မြို့နယ်ပေါင်း (၅) မြို့နယ်တွင် ထပ်မံဖွဲ့စည်းနိုင်ခဲ့ကြောင်း IEC က ပြောသည်။
၂၀၂၄အတွင်း မြို့နယ်ပေါင်း ၁၆မြို့နယ်တွင် မြို့ နယ်အဆင့် အုပ်ချုပ်ရေးအဖွဲ့များဖွဲ့စည်းထားပြီးအဆိုပါမြို့နယ်များတွင် ကျေးရွာအုပ်စုနှင့် ရပ်ကျေးအဆင့်ဆင့်တို့တွင် အုပ်ချုပ်ရေးယန္တရားများလည်ပတ်ကာ အခြေခံပြည်သူ့ဝန်ဆောင်မှုလုပ်ငန်းများကို စတင်ဆောင်ရွက်နေပြီးဖြစ်ကြောင်းလည်း အသိပေးထားသည်။
ပြည်သူ့လုံခြုံရေးနှင့် တရားဥပဒေစိုးမိုးရေးကဏ္ဍအတွက် ကရင်နီပြည်ရဲဌာနခွဲ (KSP)ကိုဖွဲ့စည်းထားပြီး ကရင်နီပြည်နယ်၌ ရဲစခန်းနှင့် ရဲကင်း ၃၀ ကျော်ကို ရဲတပ်သား ၇၀၀ခန့်ဖြင့် ဖွင့်လှစ်ထားကာ ၂၀၂၄တွင် ရဲဝန်ထမ်း ၁,၀၀၀ ပြည့်မီရန် IEC က လျာထားသည်။
စစ်တပ်အာဏာသိမ်းပြီးနောက်ပိုင်း တော်လှန်ရေး အားကောင်းသော ဒေသတစ်ခုဖြစ်သည့် ကရင်နီပြည်နယ်၌ စစ်ဘေးရှောင်ပြည်သူ ၂၈၂,၆၁၅ အထိရှိကြောင်း ကရင်နီလူမှုအသင်းအဖွဲ့ကွန်ရက်က ဆို သည်။
စစ်ကောင်စီ၏ ထိုးစစ်အပါအဝင် စားနပ်ရိက္ခာ ဖြတ်တောက်မှုများကြောင့် စစ်ဘေးရှောင်ပြည်သူများအတွက် နိုင်ငံတကာ၏ အကူအညီနှင့် အရေးပေါ် စားနပ်ရိက္ခာ အပါအဝင်အခြေခံ ကျန်းမာရေးစောင့်ရှောင်မှုများသည် လို အပ်ချက်များစွာရှိနေကြောင်း ကရင်နီလူ့အခွင့်အရေးအဖွဲ့များနှင့် IEC က တောင်းဆိုထားသည်။
