အောက်တိုဘာ-၉၊၂၀၂၆။ဇော်၀င်း/People’s Spring
ရှမ်းပြည်နယ်တောင်ပိုင်းနဲ့ ကရင်နီပြည်နယ်အစပ်မှာ တိုက်ပွဲတွေ အပြင်းအထန်ဖြစ်နေတယ်လို့ မိုးဗြဲပြည်သူ့ကာကွယ်ရေးတပ်(MBPDF)က ဒီကနေ့ ညပိုင်းမှာ ထုတ်ပြန်ပါတယ်။
အောက်တိုဘာ ၇ ရက်ကတည်းက မိုးဗြဲမြို့၊ လွယ်ယင်းတောင်ခြေကျေးရွာမှာ တော်လှန်ရေးတပ်ပေါင်းစုတွေနဲ့ စစ်တပ်တို့ကြား တိုက်ပွဲအပြင်းအထန်ဖြစ်ပွားနေတာလို့ ဆိုပါတယ်။
အောက်တိုဘာ ၈ ရက်လည်း တိုက်ပွဲဖြစ်ပွားပြီး ထိခိုက်မှုများတဲ့ စစ်တပ်က လက်နက်ကြီး၊ ဒရုန်း၊ လေယာဉ်တွေနဲ့ အကြိမ်ပေါင်းများစွာလာရောက်ကြဲချတာ ရှိတယ်လို့ အသိပေးပါတယ်။
Public Service Announcement
“Y 12 နဲ့ချည်းပဲကို ဗုံး အလုံး ၃၀ ကျော်တယ်။ထိတာတွေရှိတယ်။မနေ့က စစ်ရှောင်နှစ်ဦးဆုံးသွားတယ်”လို့ မိုးဗြဲမြို့ခံသတင်းရင်းမြစ်က လူထုနွေဦးကို ပြောပါတယ်။
ဒါ့အပြင် ပြည်သူတွေရဲ့နေအိမ်အများအပြားထိခိုက်ပျက်စီးပြီး စစ်တပ်ရဲ့ လေကြောင်းတိုက်ခိုက်မှုတွေကြောင့် သေဆုံးခဲ့ရတဲ့ ပြည်သူတွေရဲ့ မိသားစုနဲ့အတူ ထပ်တူ၀မ်းနည်းရတယ်လို့လည်း MBPDF က ဆိုပါတယ်။
လက်ရှိမှာ စစ်တပ်က လေကြောင်းအသုံးပြုတာများလာတဲ့အတွက် စစ်ရှောင်ပြည်သူတွေအနေနဲ့သတိရှိစွာနေထိုင်ကြဖို့ တိုက်တွန်းထားပါတယ်။
ဒါ့အပြင် တော်လှန်ရေးတပ်ပေါင်းစု နဲ့ စစ်တပ်အကြား အချိန်မရွေးတိုက်ပွဲထပ်မံဖြစ်ပွားလာနိုင်တာကြောင့် ကန့်သတ်ထားတဲ့နယ်မြေအတွင်းကို ဖြတ်သန်းသွားလာတာမလုပ်ကြဖို့လည်း သတိပေးထားပါတယ်။
အာဏာသိမ်းစစ်တပ်က မိုးဗြဲမြို့အနောက်ခြမ်း လွယ်ဝိုင်းနဲ့ လွယ်ယင်းမင်္ဂလာကျေးရွာကတဆင့် နန်းမယ်ခုံမြို့ ဆင်တောင်ကျေးရွာအထိ ခြေကုပ်ယူပြီး မိုးဗြဲ-နန်းမယ်ခုံလမ်းမကြီးကို ထိန်းချုပ်ဖို့ ကြိုးစားနေတာ ဖြစ်ပါတယ်။
