ဇေအောင်/People’s Spring
မန္တလေးတိုင်း၊ မိတ္ထီလာခရိုင်၊ မလှိုင်မြို့နယ်တွင် စစ်ကောင်စီအဖွဲ့ထံ ဆက်ကြေးပေးဖွင့်သည့် ဂျင်ဝိုင်းကို စစ်တပ်က ပြန်ဖမ်း၍ လောင်းကစားသမားအများအပြား ဖမ်းဆီးခံလိုက်ရကြောင်း ဒေသခံများက ပြောသည်။
ယမန်နေ့(ဒီဇင်ဘာ ၁၅ရက်) နေ့လယ်ပိုင်းက မလှိုင်မြို့နယ်၊ လယ်ကြီးရွာအနောက်ဘက်တွင် စစ်ကောင်စီတပ်နှင့်ရဲများအား ဆက်ကြေးပေးဖွင့်ထားသည့် ဂျင်ဝိုင်းကို စစ်တပ်က ဝင်ရောက်ဖမ်းဆီးခဲ့ကြောင်း၊ သက်ကြီးပိုင်းနှင့် ကလေးသူငယ်များအား ပြန်လွှတ်ပေးသော်လည်း အခြား လောင်းကစားလုပ်နေသူ ယောကျာ်း၊မိန်းမ အများအပြားအား ဖမ်းဆီးခေါ်ဆောင်သွားကြောင်း လူထုသတင်းကွန်ယက်-မလှိုင်မြို့၏ တာဝန်ရှိသူတစ်ဦးက ပြောသည်။
“သူတို့က ဆက်ကြေးတောင်းတာက လုပ်လို့တောင်းတာပါ။ တောင်းရလို့ လုပ်ခိုင်းတာမဟုတ်ဘူးပေါ့။ အခုလိုဖမ်းတဲ့အခါကြ ဆက်ကြေးပေးတဲ့သူပါချင်မှပါမယ်။ လာကစားတဲ့သူ စျေးရောင်းတဲသူတွေပါတော့တာပေါ့။ ဆိုင်ကယ်၊ကား၊ ငွေ အကုန်သိမ်းလို့ရတယ်ဗျာ။ လူတွေပြန်ရွေးခိုင်းမယ်။ စစ်မှူထမ်းအသက် မီသူတွေ ငွေများများတောင်းမယ်။ မရရင် စစ်မှုထမ်းခိုင်းမယ်။ ဂွင်ကြီးကြီးမိတာပေါ့။”ဟု အထက်ပါတာဝန်ရှိသူက ပြောသည်။
Public Service Announcement
သို့သော် ဖမ်းဆီးခံရသူ အရေအတွက်ကိုမူ အတိအကျမသိရသေးပေ။
ဖမ်းဆီးခံရသူများတွင် လူငယ်များလည်း ပါဝင်၍ စစ်မှုထမ်းခိုင်းမည်ဟု ယူဆရကြောင်း ဒေသခံများက ပြောသည်။
ထို့အပြင် စစ်ကောင်စီတပ်က မလှိုင်မြို့နယ်တွင် စစ်မှုထမ်းရန်အတွက် လူငယ်အများအပြားအား ဖမ်းဆီးနေရာ ဒီဇင်ဘာ ဒုတိယပတ်အတွင်း လူငယ် ၃၀ခန့် ဖမ်းဆီးခံလိုက်ရကြောင်း ဒေသခံများထံမှ သိရသည်။
စစ်ကောင်စီအာဏာသိမ်းပြီးနောက်ပိုင်း မန္တလေးတိုင်းအတွင်းရှိ စစ်ကောင်စီထိန်းချုပ်ရာနယ်မြေများတွင် လောင်းကစားဝိုင်းများ ပေါများနေပြီး စစ်အုပ်စုက ငွေကြေးယူ၍ဖွင့်ခွင့်ပြုထားသည်။
