မလှိုင်၊ထမ္မကြီးရွာစစ်တပ်ခန့်အုပ်ချုပ်​ရေးမှူးအပါအဝင်ဒေသခံ ၁၂ဦးအသတ်ခံရပြီး စစ်ကြောင်း ဝင်လာလို့ပြည်သူတိမ်း​ရှောင်ရ

ဩဂုတ်၃၁၊၂၀၂၆၊ကတ်သရင်း၊​နေသစ်/People’s Spring

မန္တလေးတိုင်း၊မလှိုင်မြို့နယ်၊ထမ္မကြီးရွာမှာ စစ်တပ်ခန့်အုပ်ချုပ်ရေးမှူးလည်းဖြစ်ပျူ​စောထီး​ခေါင်း​ဆောင်လည်းဖြစ်သူအပါအဝင် ဒေသခံ ၁၂ ဦးဒီက​နေ့မှာ သတ်ဖြတ်ခံရပြီး​နောက်စစ်တပ်စစ်​ကြောင်းဝင်ရောက်လာတဲ့အတွက်ဒေသခံ တွေရှောင်တိမ်းနေရတယ်လို့ ဒေသခံ တွေကပြောပါတယ်။

ဩဂုတ်လ၃၁ရက် ၊မနက်မှာ ကား၄စီးနဲ့ လက်နက်ကိုင် ဆောင်ထားသူတွေဝင်လာပြီး ထမ္မကြီးရွာက စစ်တပ်ခန့်အုပ်ချုပ်ရေးမှူး ဦးစိုးလင်းထိုက်အပါအဝင် အမျိုးသား၁၀ဦးနဲ့ အမျိုးသမီး၂ ဦးကို သတ်ဖြတ်ခဲ့တာလို့ သိရပါတယ်။

Public Service Announcement

ဒီဖြစ်စဉ်ဖြစ်ပြီးတဲ့နောက် မလှိုင်မြို့က နေစစ် တပ်ကကားတွေနဲ့​ရောက်လာပြီးရွာထဲဝင် ရောက်လာတာမို့ ဒေသခံပြည်သူတွေ ထွက်ပြေး နေကြတယ်လို့ သိရပါတယ်။

“စစ်တပ်ဝင်လာကတည်းကတော့ပြည်သူတွေကပြေးကြပြီလေ။ဘယ်သူမှမရှိကြတော့ဘူး။လက်ရှိအခြေအနေက ဘာမှအတည်ပြုမရဘူး။အဆက်သွယ် တွေမရဘူး”လို့ ဒေသခံတဦးကပြောပါတယ်။

သေဆုံးသူ စိုးလင်းထိုက်ဟာ ၂၀၂၄ခုနှစ်ကတည်းက စစ်တပ်ဖွဲ့စည်းထားတဲ့ ပြည်သူ့စစ်အဖွဲ့ခေါင်း ဆောင်တဦးဖြစ်တယ်လို့ ​ဒေသခံအချို့က​ပြောပါတယ်။ စစ်တပ်ခန့်အုပ်ချုပ်​ရေးမှူက ရွာကို ကာကွယ်​ရေးအတွက်ဆိုပြီး ပြည်သူ့စစ်အဖွဲ့ (​ခေါ်) ပျူ​စောထီး ဖွဲ့ဖို့ ဖိအား​ပေး​ပြီး ပျူအဖွဲ့ ဖွဲ့ပြီးချိန်မှာ အခုဖြစ်စဥ်ဖြစ်ခဲ့တာလို့ ​ဒေသခံအချို့က​ပြောပါတယ်။

“PDFဆိုရင် အဲ့လိုမလုပ်သင့်ပါဘူးဗျ။ကျွန်တော်သိရသလောက်သူတို့ကအဖွဲ့ (ပျူအဖွဲဲ့)ပဲဖွဲ့ထားတာဘယ်သူ့မှဒုက္ခမပေးရသေးပါဘူးဗျ။လူတစ်ယောက်မှလဲမသတ်ဖူးပါဘူး။ရှေ့တန်းမှသူပစ်ကိုယ်ပစ်တောင်လက်နက်ချအညံ့ခံရင်မသတ်ရတာ။ခုကလက်နက်ကိုင်ဆောင်ထားခြင်းမရှိသေးပါဘူး။အဖွဲ့ဖွဲ့ထားရုံပဲရှိပါသေးတယ်”လို့ ​ဒေသခံတဦးက​ပြောပါတယ် ။

စစ်တပ်စစ်​ကြောင်းဝင်လာလို့​ဒေသခံ​​တွေတိမ်း​ရှောင်ကြရ​ပေမယ့် ည​နေပိုင်းမှာ ​ဒေသခံအများစုရွာထဲပြန်ဝင်ပြီလို့ သိရပါတယ်။ စစ်တပ်က ထမ္မကြီးရွာ အနီးတဝိုက်က ​နေရာအချို့ကို သြဂုတ် ၃၁ ရက်ည​နေမှာ ဗုံးကြဲခဲ့တယ်လို့လည်း ​ဒေသခံအချိူ့က​ပြောပါတယ်။

“စစ်တပ်က သင်တန်းပေးထားတဲ့ရွာဗျ။ ဒီရွာကြောင့် တော်တော် ဒုက္ခရောက်ကြတယ်။ စစ်တပ်က လက်နက်ထုတ်ပေးထားတယ်။ တိုက်ပွဲဖြစ်ရင် ခေါ်သုံးတယ်။ ပြီးရင် လက်နက်တွေပြန်သိမ်းတယ်။ဒီရက်ထဲလည်းအဲ့ရွာကနေ စစ်ကြောင်းထွက်မယ်ကြားနေလို့ ဘေးရွာတချို့ ရှောင်ရတယ်” မလှိုင်မြို့နယ်မှ​ဒေသခံတဦးက​​ပြောပါတယ်။

ဒီဖြစ်စဉ်နဲ့ ပတ်သက်ပြီး စစ်တပ်ဝါဒဖြန့် လူမှုကွန်ရက်​တွေက စိုးလင်းထိုက် အပါအဝင် ၁၂ ဦးကို တော်လှန်ရေးအဖွဲ့ တွေက သတ်ဖြတ်ခဲ့တယ်လို့စွပ်စွဲ​ရေးသားပြီး​သေဆုံးသူ​တွေရဲ့ရုပ်အ​လောင်းဓါတ်ပုံဖြန့်​ဝေ​နေတာ​တွေ့ရပါတယ်။

ဒီဖြစ်စဥ်နဲ့ပတ်သက်ပြီးတော်လှန်ရေးတပ် တွေက ထုတ်ပြန်ထားတာမျိုးမရှိ သေးသလို ဘယ်အဖွဲ့အစည်းက ပစ်ခတ်သတ်ဖြတ်ခဲ့တယ်ဆိုတာကိုလည်းမသိရ​သေးပါဘူး။

​ဒေသတွင်း​တော်လှန်​ရေးအဖွဲ့တစ်ခုဖြစ်တဲ့ Guardians Of Mahlaing အဖွဲ့ရဲ့တာဝန်ရှိသူက​”အဲ့ဒီရွာမှာ စစ်တပ်ဘက်က ဖွဲ့စည်းထားတဲ့ ပြည်သူ့စစ်ခေါင်းဆောင်၊ ဒုခေါင်းဆောင်၊ ဘဏ္ဍာရေးမှုးနဲ့ အဖွဲ့ဝင်(၉)ဦး ကိုတော်လှန်ရေးအင်အားစုတွေဘက်က ရှင်းလင်းသွားတာလို့ သိရပါတယ်”လို့ပြောပါတယ်။

ရှင်းလင်းခံရတဲ့ ပြည်သူ့စစ်အဖွဲ့ဟာ မိတ္ထီလာခရိုင်ထဲမှာ စစ်တပ်နဲ့အတူပေါ်တာဆွဲတာ၊ ဂိတ်ချငွေတောင်းတာတွေ ပြုလုပ်ခဲ့တယ်လို့ ဒေသခံတချို့ရဲ့ပြောပြချက်အရသိရတယ်လို့အထက်ပါတာဝန်ရှိသူက ပြောပါတယ်။

ထမ္မကြီးရွာဟာ ရန်ကုန်-မန္တလေးအမြန်လမ်း ၂၉၅ မိုင် ရဲ့ အနောက်ဘက် ၄မိုင်ခန့်အကွာမှာရှိပါတယ် ။ မလှိုင်မြို့ရဲ့ အရှေ့ဘက် မှာရှိပြီးမြို့နယ်အစွန်မှာတည်ရှိတဲ့ကျေးရွာဖြစ်ပါတယ်။ရွာဟာ မလှိုင်မြို့ရဲ့ အရှေ့တောင်ဘက်မှာရှိပြီး မိတ္ထိလာမြို့နဲ့လည်း ဆက်စပ် နေပါတယ်။