ယောနသံ/People’s Spring
MNDAA ဆုတ်ခွာသွားပြီး စစ်ကောင်စီပြန်ဝင်လာသည့် လားရှိုးမြို့တွင် မြန်မာနိုင်ငံဆိုင်ရာတရုတ်အထူးသံတမန် တိန့်ရွှီကျွင်း ရောက်နေပြီး မကြာမီ MNDAA၊တရုတ်နှင့် စစ်ကောင်စီ လားရှိုးမြို့၌သုံးပွင့်ဆိုင်ဆွေးနွေးမည်ဟု သတင်းရရှိသည်။
“တိန့်ရွှီကျွင်းက ၁၉ရက်နေ့က ရောက်လာတာ။ MNDAA ဘက်က အရာရှိတွေလည်းသူနဲ့ပါလာတယ်။ စစ်ကောင်စီဘက်က ဒုဗိုလ်ချုပ်ကြီး ကိုကိုဦး လာမယ်”ဟု People’s Spring ၏ရှမ်းမြောက်သတင်းရင်းမြစ်ကပြောသည်။
တိန့်ရွှီကျွင်းသည် စစ်ကောင်စီ နှင့် MNDAA ဆွေးနွေးပွဲများတွင် ဦးဆောင်ပါဝင်သူဖြစ်သည်။ ယခုအခါ ၎င်းကိုယ်တိုင်လားရှိုးမြို့သို့ရောက်ရှိနေပြီး MNDAAက လုံခြုံရေးယူပေးထားသည်ဟု မြို့ခံတစ်ဦးကပြောသည်။
Public Service Announcement
တိန့်ရှီကျွင်းခေါင်းဆောင်သည့်ကိုယ်စားလှယ်ဖွဲ့သည် တရုတ်အလံဘေးတွင် ပစ်ခတ်ရပ်စဲမှုစောင့်ကြည့်ရေးအဖွဲ့ဟု ရေးသားထားသောအနက်ရောင်ကားများဖြင့် ဝင်ရောက်လာခြင်းဖြစ်သည်။
“သူက လားရှိုးကို အုပ်ချုပ့်မယ့် အုပ်ကြီး”ဟု တိန့်ရှီကျွင်းအားရည်ရွယ်၍လားရှိုးမြို့ခံတဦးကပြောသည်။
တရုတ်အစိုးရ ၊နိုင်ငံခြားရေးဝန်ကြီးက ၂၀၂၄ ခုနှစ် သြဂုတ်လမှာပင်မြန်မာနိုင်ငံပြည်တွင်းရေးကို ပြည်ပနိုင်ငံများကဝင်ရောက်စွက်ဖက်ခွင့် မပြုခြင်းအပါအဝင် စည်းသုံးစည်းလိုက်နာရမည်ဟုနိုင်ငံတကာကိုဆိုခဲ့သော်လည်း မြန်မာ့အရေးကိုတရုတ်ကတိုက်ရိုက်ဝင်ရောက်စွက်ဖက်ခြင်းဖြစ်ကြောင်းပြည်သူများနှင့် စစ်ရေးနိုင်ငံရေးလေ့လာသူများကပြောသည်။
တိန့်ရှိကျွင်းရောက်ရှိနေစဉ်ဧပြီလ ၂၀ရက်တွင် မိုင်းရယ်နှင့်တန့်ယန်းဘက်မှ စစ်ကောင်စီကားများ လားရှိုးမြို့သို့ အများအပြားဝင်ရောက်လာသည်ဟု သတင်းရရှိသည်။
” ယူနီဖောင်းဝတ်တွေ အများကြီး ဝင်လာတာ ဟုတ်တယ်။တရုတ်ကြီးရှိနေချိန် သူတို့အပြီးဝင်မယ်ထင်တယ်”ဟု လားရှိုးမြို့ခံတဦးကပြောသည်။
လားရှိုးမြို့သို့ စစ်ကောင်စီတပ်ဖွဲ့ဝင်များက ဧပြီ ၁၇ရက်မှစ၍ လားရှိူး- သီပေါပြည်ထောင်စုလမ်းရှိ နောင်မွန်လမ်းပိုင်းမှတဆင့် ဝင်လာသလို ဌာနဆိုင်ရာဝန်ထမ်းအချို့ကိုလည်း ရဟတ်ယဉ်ဖြင့်လည်း ပို့ဆောင်ခဲ့သည်။ ထိုရက်မတိုင်မီက MNDAA တပ်ဖွဲ့ဝင်များ ဆုတ်ခွာခဲ့ကြသည်။ သို့သော် လားရှိုးမြို့တွင် MNDAA အရာရှိအချို့နှင့်တပ်ဖွဲ့ဝင်အချို့ တွေ့မြင်နေရသေးသည်ဟု ဒေသခံများကပြောသည်။
ဧပြီလ ၂၁ရက်တွင် တိန့်ရှီကျွင်း၊ MNDAA အရာရှိအဖွဲ့နှင့် စစ်ကောင်စီ၏ အမှတ် (၁) စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီး ကိုကိုဦးပါဝင်သော ကိုယ်စားလှယ်အဖွဲ့လားရှိုးမြို့၌သုံးပွင့်ဆိုင်ဆွေးနွေးမည်ဟု သတင်းရရှိသည်။
လက်ရှိအခြေအနေများနှင့်ပတ်သက်၍ စစ်ကောင်စီကရော MNDAAကပါ သတင်းထုတ်ပြန်ထားခြင်းမရှိသေးပေ။
MNDAA နှင့် မဟာမိတ်များက ၁၀၂၇ စစ်ဆင်ရေးနှင့်အတူ ၂၀၂၄ သြဂုတ် ၃ ရက်တွင်လားရှိုးမြို့ကိုအပြီးသတ် သိမ်းပိုက်ခဲ့သည်။ MNDAA လားရှိုးမြို့ ရှစ်လကျော်ကြာ အုပ်ချုပ်ရေးယန္တရားဖော်ဆောင်ခဲ့သော်လည်းတရုတ်အစိုးရက စစ်ကောင်စီထံပြန်ပေးရန် ဖိအားပေးခဲ့ခြင်းဖြစ်သည်။ထိုနောက် ဧပြီလ တတိယပါတ်တွင်စစ်ကောင်စီတပ်က ပြန်ဝင်လာခြင်းဖြစ်သည်။
လားရှိုးမြို့သို့စစ်ကောင်စီပြန်ဝင်လာပါက မြောက်ပိုင်းမဟာမိတ်သုံးဖွဲ့ထိန်းချုပ်ထားသည်မြို့နယ်များကို စစ်ရေးအရ ခြိမ်းခြောက်ခံရလာနိုင်ကြောင်းတော်လှန်ရေးအင်အားစုများနှင့်ဒေသခံများကသုံးသပ်ထားသည်။
