ဇွန် – ၅ ၊၂၀၂၅ ၊ ဆိုင်းမင်း/People’s Spring
ငလျင်ဒဏ်သင့်ဒေသက မြန်မာလူထုအတွက် စားနပ်ရိက္ခာ ထောက်ပံ့ဖို့ ဥရောပသမဂ္ဂ (EU) က ရန်ပုံငွေ ယူရို ၅ သန်းကို ကုလသမဂ္ဂ ကမ္ဘာ့စားနပ်ရိက္ခာအစီအစဉ်အဖွဲ့ကြီး (WFP) ကတဆင့် ပေးအပ်သွားမယ်လို့ သိရပါတယ်။
ဥရောပသမဂ္ဂ က ပေးလာတဲ့ အဲဒီ ရန်ပုံငွေ နဲ့ ငလျင်ဘေးဒဏ်အဆိုးရွားဆုံး ခံစားခဲ့ရသူတွေအတွက် စားနပ်ရိက္ခာ ဒါမှမဟုတ် ရိက္ခာ ဝယ်ဖို့ ငွေသားအကူအညီပေးအပ်သွားမယ်လို့ WFP က ဆိုပါတယ်။
ဒါအပြင် ကလေးတွေနဲ့မိခင်တွေအတွက်ပါ အထူးအာဟာရ အထောက်အပံ့တွေပေးအပ်သွားမယ်လို့ ဇွန်လ ၄ ရက်မှာ WFP က သတင်းထုတ်ပြန်ထားပါတယ်။
Public Service Announcement
အထောက်အပံ့အကူအညီလိုအပ်နေသူတွေထံ တိုက်ရိုက်ပေးအပ်သွားမှာဖြစ်ပြီး ဒေသခံ မိတ်ဖက်တွေ၊ အစိုးရ မဟုတ်တဲ့ NGO တွေနဲ့ လက်တွဲဆောင်ရွက်မယ်လို့ WFP က အသိပေးပါတယ်။
မန္တလေး တိုင်း ဆီ မကြာသေးခင်က EU နဲ့ WFP က တာဝန်ရှိသူတွေ ကွင်းဆင်းလေ့လာရာမှာ ငလျင်ဒဏ်သင့် ပြည်သူတွေ ရင်ဆိုင်နေရတဲ့အခက်အခဲတွေ ကိုတွေ့ရပြီးနောက် အခုလို ရန်ပုံငွေ ရရှိလာတာလို့ WFP က ဆိုပါတယ်။
WFP ဟာ မန္တလေးတိုင်း၊ စစ်ကိုင်းတိုင်း၊ ရှမ်းပြည်တောင်ပိုင်း၊ နေပြည်တော်အပါအဝင် ငလျင်ဒဏ်သင့် ဒေသတွေက လူဦးရေလေးသိန်းခန့်ဆီ အရေးပေါ် စားနပ်ရိက္ခာ အကူအညီတွေ ပေးအပ်နိုင်ခဲ့တယ်လို့သိရပါတယ်။
ဒါအပြင် လက်ရှိ ဇွန်လဆန်းကစတင်ပြီး နှစ်လတာကာလအတွင်း လူဦးရေ တစ်သိန်းခွဲ ခန့်ကို ထောက်ပံ့ ကူညီပေးသွားမယ်လို့လည်းသိရပါတယ်။
ရန်ပုံငွေမလုံလောက်မှုကြောင့် WFP ဟာ မြန်မာနိုင်ငံက လူဦးရေတစ်သန်းကျော်အတွက် စားနပ်ရိက္ခာ အထောက်အပံ့တွေကို ပြီးခဲ့တဲ့ ဧပြီလကတည်း က ဖြတ်တောက်ခဲ့ရပါတယ်။
