ဩဂုတ်-၇၊ ၂၀၂၅။ ရဲခေါင်၊ သက်ဝေ/People’s Spring
တအာင်းတပ်မတော်(PSLF/TNLA) အနေဖြင့် သိမ်းပိုက်ထိန်းချုပ်ထားသည့် မြို့ရွာဒေသများ လုံခြုံရေးတွင် ဒေသခံများပူးပေါင်းဆောင်ရွက်နိုင်ရေး ဖိတ်ခေါ်မှုရှိကြောင်း TNLA ပြောရေးဆိုခွင့်ရှိသူ လွေးယေဦးကပြောကြားပြီး မိုးကုတ်မြို့တွင် ဂေါ်ရခါးလူမျိုးစုများ တပ်သားစုဆောင်းမှုကိုလည်း အတင်းအကြပ်လုပ်ဆောင်ခြင်း မရှိဟု ရှင်းလင်းသည်။
ဂေါ်ရခါးလူမျိုးစုများအား TNLAက စစ်သားစုဆောင်းမှု သတင်းနှင့်ပတ်သက်ပြီး TNLAက ဩဂုတ် ၅ရက်တွင် ကျင်းပသည့် သတင်းစာရှင်းလင်းပွဲ၌ ယခုကဲ့သို့ ရှင်းလင်းပြောကြားခဲ့ခြင်းဖြစ်သည်။
” ဒီကိစ္စက စိုးရိမ်ဖွယ်ရာတော့ မရှိပါဘူး။ အတင်းအကြပ်လုပ်ဆောင်တာမျိုး ကျမတို့ ဆောင်ရွက်တာမျိုး မရှိသေးဘူး”ဟု လွေးယေဦးက ပြောသည်။
Public Service Announcement
ဂေါ်ရခါးလူမျိုးစုခေါင်းဆောင်များနှင့် PSLF/TNLA တာဝန်ရှိသူများ ဆွေးနွေးမှု ရှိနေသည်ဟုလည်း ၎င်းက ဆိုသည်။
“သူတို့ရဲ့ ပူးပေါင်းပါဝင်မှုကို ရရှိမယ်ဆို ဒေသတွင်း တည်ငြိမ်ရေးနဲ့ ဒေသတွင်း တရားဥပဒေ စိုးမိုးရေးဆောင်ရွက်တဲ့အချိန်မှာ မြန်ဆန်ပြီးမှ ဆောင်ရွက်နိုင်မှာ ဖြစ်ပါတယ်”ဟု လွေးယေဦးက ပြောသည်။
မိုးကုတ်မြို့သည် စစ်ကောင်စီ၏ အပြင်းအထန်လေကြောင်း တိုက်ခိုက်မှု ကြုံနေရသည့် ဒေသဖြစ်ပြီး အရပ်သား သေဆုံးဒဏ်ရာရမှုများ ရှိနေကြောင်း၊ ထို့ပြင် ဒေသတွင်း ဓားပြနှင့် အခြားဒုစရိုက်မှုများလည်း ပေါများလျက်ရှိရာ ဒေသတည်ငြိမ်ရေးလူမျိုးစုများ၏ ပူးပေါင်းမှုလိုအပ်ဟုလည်း ပြောသည်။
TNLA အနေဖြင့် တပ်သားစုဆောင်းမှုနှင့်ပတ်သက်၍ အဖွဲ့ မူဝါဒအရ၊ဥပဒေသတ်မှတ်ချက်အရ အရ သတ်မှတ်ချက်အရ အသက်ပြည့်ပြီးဖြစ်သည့် တအာင်းလူမျိုးကိုသာ ဥပဒေအရ ကောက်ခံခြင်းဖြစ်ပြီး အခြား လူမျိုးစုများကိုမူ ၎င်းတို့၏ ပါဝင်လာမှုအပေါ်မူတည်ပြီး ပူးပေါင်းဆောင်ရွက်နေသည်ဟု ပြောသည်။
ထိုသို့ဆောင်ရွက်ရာတွင် မိုးကုတ်နှင့် မိုးမိတ်မြို့တွင် တအာင်းလူမျိုးမဟုတ်သည့် လူမျိုးစုများ ပါဝင်သည်ကိုတွေ့ရကြောင်းလည်း ပြောသည်။
တဖက်တွင် စစ်ကောင်စီက တနိုင်ငံလုံး စစ်မှုမထမ်းမနေရ ဥပဒေကို ထုတ်ပြန်ပြီး တပ်သားစုဆောင်းနေခြင်း ၊ လူငယ်များကို ဖမ်းဆီးခြင်း ရှေ့တန်းတိုက်ပွဲများ၌ တာဝန်ထမ်းဆောင်စေခြင်းများ ရှိနေကြောင်းလည်း လွေးယေဦးက ပြောသည်။
TNLA အနေဖြင့် တအာင်းလူမျိုးကိုသာ မူဝါဒအရ တပ်သားစုဆောင်းမှု ပြုလုပ်လျက်ရှိရာ အခြားလူမျိုးစုများ၏ ပါဝင်မှု ရရိရေးအတွက်လည်း ကြိုးပမ်းနေကြောင်း လွေးယေဦးက ပြောသည်။ အားလုံးရဲ့ ပူးပေါင်းပါဝင်ခြင်းက ဒေသတည်ငြိမ်ရေးအတွက် ဆောင်ရွက်နိုင်မည်ဖြစ်ကြောင်း ထပ်လောင်းပြောသည်။
