ဖားကန့် – ကာမိုင်းလမ်းပိုင်း တိုက်ပွဲဆက်ဖြစ်နေ၍ သွားလာခြင်းမလုပ်ရန် သတိပေးနေ

ဩဂုတ်-၁၂၊၂၀၂၅။မိထက်/People’sSpring

ကချင်ပြည်နယ်၊ ဖားကန့် – ကာမိုင်းလမ်းပိုင်း၌ တိုက်ပွဲဖြစ်နေ၍ အဆိုပါလမ်းပိုင်းအား ယခုရက်ပိုင်းအတွင်း အသုံးမပြုကြရန် ဒေသခံများနှင့် ယာဉ်မောင်းများက သတိပေးနေကြသည်။

ဖားကန့်နှင့်မြစ်ကြီးနားမြို့ကို ဆက်သွယ်ထားသည့် လမ်းပိုင်းမှ ဖားကန့် – ကာမိုင်းလမ်းပိုင်းတွင်ကချင်လွတ်လပ်ရေးတပ်မတော်(KIA)၊KPDF ပူးပေါင်းတပ်နှင့် စစ်ကောင်စီတပ်တို့ ဩဂုတ် ၁၀ရက်ကစတင်၍ တိုက်ပွဲဖြစ်ခဲ့သည်။ မအူပင်ကျေးရွာအနီးတွင် တိုက်ပွဲအပြင်းထန်ဆုံးဖြစ်ပွားနေပြီး မိုင်း အန္တရာယ်လည်းကြီးမားနေကြောင်း ဒေသခံများက သတိပေးသည်။

“စစ်ကောင်စီစစ်ကြောင်းတက်လာလို့ တိုက်ပွဲဖြစ်နေတာ။ အဲဒီလမ်းပိုင်းမှာ မိုင်းကွဲတာတွေဖြစ်ပြီး အရပ်သားကားတချို့ထိတယ်။တိုက်ပွဲကခဏလို့ထင်ပေမယ့်အခုကဆက်ဖြစ်နေတယ်။မလိုအပ်ဘဲမသွားတာအကောင်းဆုံးပဲ”ဟု ဖားကန့်ဒေသခံတစ်ဦးက ပြောသည်။

Public Service Announcement

ဖားကန့် – ကာမိုင်းလမ်းပိုင်း၌ စစ်ကောင်စီတပ် အင်အား၅၀၀ခန့်ရောက်ရှိလာပြီးနောက် တိုက်ပွဲဖြစ်ပွားခြင်းဖြစ်သည်။ လက်ရှိတွင် ဖားကန့်မြို့နယ်အတွင်း တိုက်ပွဲများဖြစ်နေသလို ဖားကန့်မှအထွက်လမ်းပိုင်းတွင်လည်း တိုက်ပွဲတစ်ကျော့ပြန်ဖြစ်ပွားလာခြင်းဖြစ်သည်။

ပြီးခဲ့သည့်ဧပြီက မိုးကောင်းမြို့အခြေစိုက် စစ်ဆင်ရေးကွပ်ကဲမှုဌာနချုပ် -စကခ(၃) ဦးဆောင်သည့်စစ်ကောင်စီတပ်စစ်ကြောင်းသည် ကာမိုင်း – လုံးခင်း – ဖားကန့်လမ်းအတိုင်း ဖားကန့်မြို့သို့ဝင်ရောက်လာစဉ် တိုက်ပွဲအပြင်းအထန်ဖြစ်ပွားခဲ့သည်။

မေလကုန်၌ ဖားကန့်မြို့သို့ စစ်ကောင်စီတပ် စစ်ကြောင်းဝင်ရောက်သွားနိုင်ပြီးနောက် ဖားကန့် – ကာမိုင်းလမ်း၌ တိုက်ပွဲများရပ်တန့်နေရာမှ ယခုတကြိမ်ထပ်မံဖြစ်ပွားခြင်းဖြစ်သည်။

ဩဂုတ် ၁၁ရက်က အရပ်သားကားတစ်စီးမိုင်းထိရာ ဒဏ်ရာရသူအချို့ရှိခဲ့ပြီး ဒဏ်ရသူ ငါးဦးကို ကာမိုင်းဆေးရုံသို့ပို့ဆောင်ခဲ့ရသည်ဟု ဒေသခံအချို့က ပြောသည်။

ထို့အပြင်ယမန်နေ့ကဖြစ်ပွားသောတိုက်ပွဲအတွင်းစစ်ကောင်စီတပ် ထိခိုက်သေဆုံးမှုများကြောင်း KPDF နှင့်နီးစပ်သူအချို့ထံမှ သတင်းရရှိသည်။

ဖားကန့် – ကာမိုင်းလမ်းပိုင်းရောက်ရှိလာသောစစ်ကြောင်းသည် မိုးကောင်းမြို့မှလာရောက်ခြင်းဖြစ်ပြီး တိုက်ပွဲမှာ ရက်အနည်းငယ်ကြာနိုင်ကြောင်းလည်း သတိပေးမှုများရှိနေသည်။

လက်ရှိတိုက်ပွဲဖြစ်နေသည့်ဖားကန့်မြို့နယ်တွင်လည်း လက်နက်ကြီးနှင့်လေကြောင်းအန္တရာယ်ကိုသတိပြုရန်ကချင်လွတ်လပ်ရေးတပ်မတော် (KIA)နှင့် KPDFက သတိပေးထားသည်။