သြဂုတ်-၁၃၊၂၀၂၅။ဇေအောင်/People’s Spring
မြင်းခြံမြို့အနီးမှာ စစ်ကောင်စီတပ်က စစ်ကြောင်း ၃ ကြောင်းနဲ့ ဆက်လက်ထိုးစစ်ဆင်နေပြီး တိုက်ပွဲတွေ ဆက်ဖြစ်နေပါတယ်။
သြဂုတ်လဆန်းကတည်းက မြင်းခြံမြို့အရှေ့ဘက် ၃ မိုင်ခန့်အကွာက ရွာတွေကို စစ်ကြောင်းထိုးနေတဲ့ စစ်ကောင်စီတပ်နဲ့ ကာကွယ်ရေးတပ်တွေတိုက်ပွဲ ဖြစ်ပွားနေခဲ့တာပါ။ နှစ်ဘက်ထိခိုက်မှုတွေရှိနေပြီး ရဲဘော် ၅ ဦးထက်မနည်း ကျဆုံးကာ ကာကွယ်ရေး စခန်း ၄ ခု ဆုံးရှုံးထားပါတယ်။
သြဂုတ်လ ၁၂ ရက်မှာတော့ အင်အား ၃၀၀ ခန့်ပါတဲ့ စစ်ကောင်စီတပ်ဟာစစ်ကြောင်း ၃ကြောင်းခွဲပြီး ထပ်မံထိုးစစ်ဆင်လာတာကြောင့် ပြောက်ကျားနည်းစနစ်နဲ့ ပြန်လည်တိုက်ခိုက်ခဲ့ရာမှာ စစ်တပ်စစ်ကြောင်းမှ၅ဦး သေဆုံးပြီး ၂ဦး ပြင်းထန်ဒဏ်ရာရရှိခဲ့တယ်လို့ Myingyan Black Tiger (MBT)တပ်ဖွဲ့ရဲ့ ခေါင်းဆောင် ဗိုလ်မိုက်ခဲက ပြောပါတယ်။
Public Service Announcement
“ရဲဘော်နှစ်ယောက်တည်းနဲ့ ရန်သူ့ကြားထဲဝင်ပြီး ပစ်ခတ်တိုက်ခိုက်ခဲ့တာပါ။ ၇ ယောက်က ရှေ့ကိုတက်ဖို့ချောင်းနေတဲ့အချိန် နောက်ကနေ သွားပစ်ခဲ့တာ။”လို့ ဗိုလ်မိုက်ခဲက ဆိုပါတယ်။
သြဂုတ် ၁၃ ရက်နေ့အထိလည်း စစ်တပ်စစ်ကြောင်းဟာ မြင်းခြံမြို့အရှေ့ဘက်မှာ လှည့်လည်စစ်ကြောင်းထိုးနေဆဲဖြစ်တယ်လို့ သိရပါတယ်။
အလားတူ မြင်းခြံနယ်ထဲကပဲ တလုပ်မြို့မှာ တပ်စွဲထားတဲ့ စစ်တပ်စခန်းတွေကိုဩဂုတ်လ ၉ ရက်နေ့ နံနက် အစောပိုင်းမှစတင်တိုက်ခိုက်ခဲ့တာကြောင့်စစ်ကောင်စီတပ်ဖွဲ့ဝင်ရှစ်ဦးသေဆုံးခဲ့တယ်လို့ CDSOM က သတင်းထုတ်ပြန်ပါတယ်။ စစ်တပ် စစ်ကြောင်းကို မြောင်မြို့နယ်ပြည်သူ့ကာကွယ်ရေးနဲ့ လုံခြုံရေးအဖွဲ့ (CDSOM)ရဲ့ ဗိုလ်စင်္ကြာစစ်ကြောင်း နဲ့ PDF တလုပ်တို့ ပူးပေါင်းတိုက်ခိုက်ခဲ့တာပါ။
” တလုတ်ပွဲက ကိုယ့်ဘက်က အပေါင်းဖြစ်တယ်။ စစ်ကြောင်းတွေခွဲပြီး ဝင်တိုက်တာ။ စစ်ကောင်စီဘက်က တော်တော်လေး ထိသွားတယ်။ အခုကတော့ အခြေအနေပြန်ငြိမ်နေပါတယ်”လို့ မြင်းခြံမြို့နယ်မှ PDFတစ်ဦးက ပြောပါတယ်။
စစ်တပ်ကအထိနာတဲ့အတွက်လေကြောင်းကနေပါ ပစ်ကူပေးခဲ့တယ်လို့ ကာကွယ်ရေးရဲဘော်တွေက ပြောပါတယ်။
စစ်ကောင်စီဟာ ကျေးရွာတွေကိုပါ ဝင်ရောက်ပစ်ခတ်ခဲ့လို့ မြောက်ကုန်းရွာမှာ ပြည်သူ ၄ ဦးနဲ့ ဗလုံရွာက ပြည်သူတွေတချို့လည်း သတ်ဖြတ်ခံရပြီး နေအိမ် ၂၀၀ ကျော်ပါ မီးရှို့ဖျက်ဆီးခံရတယ်လို့ မြင်းခြံလူထုလှုပ်ရှားမှုကော်မတီက ထုတ်ပြန်ထားပါတယ်။
လက်ရှိမှာ စစ်တပ်စစ်ကြောင်းတွေကြောင့် ကျေးရွာ ၁၅ ရွာထက်မနည်း၊ ပြည်သူထောင်ချီ ထွက်ပြေးတိမ်းရှောင်နေရတယ်လို့ သိရပါတယ်။
