သြဂုတ်-၁၉၊၂၀၂၀။လူအေး/People’s Spring
TNLA သိမ်းပိုက်ထိန်းချုပ်ထားသည့်ကျောက်မဲမြို့နယ်၊နောင်ပိန်တိုက်နယ်အတွင်းသို့စစ်ကောင်စီတပ်စစ်ကြောင်းထိုးလာပြီး TNLA၊PDF ပူးပေါင်းတပ်များနှင့်တိုက်ပွဲပြင်းထန်နေကြောင်း သတင်းရရှိသည်။
စစ်တပ် စစ်ကြောင်းကSSPP တပ်စွဲထားသောကျောက်မဲမြို့နယ််၊ထန်းတပင်ရွာကိုဖြတ်၍ ရှမ်းပြည်နယ်တောင်ပိုင်း ရပ်စောက်မြို့နယ်ဘက်မှ စစ်သားရာနှင့်ချီဝင်ရောက်လာခြင်းဖြစ်သည်ဟုဒေသခံများကပြောသည်။
“ထန်းတပင်ကနေကျော်လာတာက ရှမ်းအဖွဲ့(SSPP)ခွင့်ပြုလိုက်လို့ဝင်လာတာ။ ဒီနေ့ နေ့ခင်းကနောင်ပိန်ကို လက်နက်ကြီးတွေနဲ့ပစ်ပြီး တိုက်ပွဲတွေပြင်းထန်နေသလို ညနေပိုင်းမှာလေကြောင်းကနေလာပစ်သွားတယ်”ဟု နောင်ပိန်ဒေသခံတစ်ဦးကပြောသည်။ ဒေသခံက SSPP နှင့်ပတ်သက်၍ ပြောကြားချက်အပေါ် People’s Spring ကသီးခြားအတည်မပြုနိုင်သေးပါ ။
Public Service Announcement
စစ်ကောင်စီ၏တပ်မ(၁၁)လက်အောက်ခံတပ်ရင်းများသည်ထန်းတပင်ရွာကိုကျော်၍ဝင်ရောက်လာခြင်းဖြစ်ပြီး ယနေ့(သြဂုတ် ၁၉)ညအထိ တိုက်ပွဲဖြစ်နေသည်ဟုသတင်းရရှိသည်။
ထို့အပြင် ဩဂုတ်လ ၁၉ ရက်ည ၇ နာရီခန့်တွင် စစ်ကောင်စီကနောင်ပိန်လမ်းခွဲအနီးသို့ လေကြောင်းမှ ဗုံးနှစ်လုံး ကြဲချခဲ့သည်ဟု ဒေသခံများကပြောသည်။ ဗုံးကြဲမှုကြောင့်လူထိခိုက်မှုရှိ ၊မရှိကိုမူ မသိရသေးပေ။
နောင်ပိန်တိုက်နယ်သည်နောင်ချိုမြို့နှင့် နီးပြီး ရှမ်းပြည်နယ်တောင်ပိုင်းနှင့်လည်းဆက်စပ်နေသည်။ စစ်ကောင်စီက နောင်ချိုကိုပြီးခဲ့သည့် ဇူလိုင်လလယ်ကပြန်လည်သိမ်းယူပြီးနောက်နောင်ပိန်တိုက်နယ်ကို လက်နက်ကြီးများဖြင့် မကြာခဏပစ်ခတ်ခြင်း၊လေကြောင်းမှဗုံးကြဲခြင်းများပြုလုပ်ခဲ့သည်။
လက်နက်ကြီးဖြင့်ပစ်ခတ်ခြင်း ၊ဗုံးကြဲခြင်းတို့ကြောင့်ဇူလိုင်လကုန်ပိုင်းတွင် ဒေသခံအချို့တိမ်းရှောင်ခဲ့ကြသည်။
ထိုအပြင်သြဂုတ် ၁၈ ရက်ညကလည်းစစ်တပ်က နောင်ပိန်တိုက်နယ်၊ ရပ်ကွက်(၅)အတွင်းကို လက်နက်ကြီး ၆လုံးပစ်ခတ်ခဲ့၍ အရပ်သားတစ်ဦးသေဆုံးခဲ့သည်။သြဂုတ် ၁၉ ရက်တွင် စစ်တပ်ကရှမ်းတောင်မှတဆင့် မြေပြင်စစ်ကြောင်းထိုးရန်ကြိုးစားလာခြင်းဖြစ်သည်။
“ကျောက်မဲကို ပြန်တိုက်ဖို့ နောင်ပိန်ကို အရင်တိုက်တဲ့သဘောပဲ။ ဘေးနားက ရွာတွေကို စစ်ကောင်စီက ဒုက္ခပေးတော့မယ်။အရပ်သားကိုပစ်မှတ်ထားလာရင် ဒေသခံတွေ၊ အရပ်ဘက်အဖွဲ့တွေ အသံထွက်ဖို့လိုတယ်”ဟု နောင်ပိန်ဒေသခံတစ်ဦးကပြောသည်။
သြဂုတ် ၁၉ ရက်ဖြစ်ပွားသောတိုက်ပွဲများနှင့်ပတ်သက်၍ TNLAက သတင်းမထုတ်ပြန်သေးပေ။ PDF ရဲဘော်များကလည်း အသေးစိတ်ဖြေကြားခြင်းမရှိသေးပေ။
တရုတ်အစိုးရ၏ကြားဝင်စွက်ဖက်မှုဖြင့်စစ်ကောင်စီနှင့် TNLA တို့ သြဂုတ်လတွင် တွေ့ဆုံဆွေးနွေးရန်ရှိပြီး ဆွေးနွေးပွဲမတိုင်ခင် စစ်တပ်ကTNLA နှင့် မဟာမိတ်များသိမ်းပိုက်ထိန်းချုပ်ထားသည့် မိုးကုတ် နှင့်ကျောက်မဲမြို့နယ်တို့ကို စစ်ရေးအရဖိအားပေးတိုက်ခိုက်လာခြင်းဖြစ်သည်။
