စက်တင်ဘာ−၁၀၊ ၂၀၂၅။ဇော်ဝင်း/People’s Spring
အမေရိကန်ဒေါ်လာသန်း ၁၄၀ ခန့်တန်ဖိုးရှိ ဂျပန်ယန်း ၁၅ ဘီလီယံထောက်ပံ့မယ့်စီမံကိန်းကို ဂျပန်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(JICA)က ဆိုင်းငံ့လိုက်တယ်လို့ စစ်ကောင်စီရဲ့ မြန်မာ့စီးပွားရေးဘဏ်(MEB) က စက်တင်ဘာ ၉ ရက်မှာ ထုတ်ပြန်ပါတယ်။
JICA ရဲ့ပင်လယ်ရပ်ခြားဖွံ့ဖြိုးမှုအစီအစဥ်ချေးငွေ(ODA) အောက်က အသေးစားအလတ်စား-SME ချေးငွေစီမံကိန်း အစီအစဉ်ကနေ ပြည်တွင်းက အသေးစား၊အလတ်စားစီးပွားရေးလုပ်ငန်းရှင်တွေကို မြန်မာ့စီးပွားရေးဘဏ်နဲ့ ပုဂ္ဂလိကဘဏ်တွေကနေတဆင့် ထုတ်ချေးနေတာလို့ ဆိုပါတယ်။
၂၀၂၀ နိုဝင်ဘာ ၄ရက်က ဂျပန်နိုင်ငံအစိုးရကိုယ်စား ဂျပန်အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ (JICA)နဲ့ မြန်မာနိုင်ငံအစိုးရကိုယ်စား ငွေတိုက်ဦးစီးဌာနတို့အကြား SME ချေးငွေစာချုပ်(Loan Agreement)ကို ချုပ်ဆိုခဲ့တာပါ။ ဒါပေမယ့်ချေးငွေဆက်ထုတ်ပေးမယ့်အစီအစဉ်တွေကို JICAက ယာယီဆိုင်းငံ့ထားလိုက်တယ်လို့ မြန်မာ့စီးပွားရေးဘဏ်ရဲ့ ထုတ်ပြန်ချက်မှာ ဖော်ပြပါတယ်။
Public Service Announcement
ဆိုင်းငံ့လိုက်တဲ့ ရက်စွဲ နဲ့အကြောင်းအရင်းကိုတော့ ထုတ်ပြန်ချက်မှာ မပါရှိပါဘူး။ဒါ နဲ့ ပတ်သက်ပြီး မြန်မာ့စီးပွားရေးဘဏ် နဲ့ JICA တို့ကို လူထုနွေဦးက ဆက်သွယ်မေးမြန်းဖို့ကြိုးစားနေဆဲ ဖြစ်ပါတယ်။
ပြည်တွင်းက အသေးစားနဲ့အလတ်စားလုပ်ငန်းတွေ ရပ်တည်ရှင်သန်နိုင်ရေး အပါအဝင် ပြည်တွင်းထုတ်ကုန်တွေ တိုးတက်လာဖို့ရည်ရွယ်ချက်နဲ့ JICAက ၂၀၁၅ကစပြီး အတိုးနှုန်း ၀ ဒသမ ၀၁ ရာခိုင်နှုန်းသာရှိတဲ့ နှစ်ရှည်ချေးငွေတွေ မြန်မာနိုင်ငံကို ပေးခဲ့ပါတယ်။
မြန်မာ့စီးပွားရေးဘဏ်ရဲ့စာရင်းအချက်အလက်တွေအရ SMEစီမံကိန်း အဆင့် ၁ ချေးငွေတွင် ဂျပန်ယန်း ၄ ဒသမ ၇၇၄ ဘီလီယံနဲ့ ၂၀၁၈က အဆင့် ၂ ချေးငွေအဖြစ် ဂျပန်ယန်း ၁၄ ဒသမ ၅ ဘီလီယံပေးခဲ့တယ်လို့ သိရပါတယ်။
JICAဘက်ကထုတ်ပြန်ချက်တွေအရရွေးကောက်ခံ အရပ်သားအစိုးရလက်ထက်ဖြစ်တဲ့၂၀၂၀ နိုဝင်ဘာ ၄ ရက်က မြန်မာအစိုးရနဲ့ စီမံကိန်းနှစ်ခုအတွက်စာချုပ်ချုပ်ခဲ့ပြီး အသေးစား၊အလတ်စားလုပ်ငန်း နဲ့ ပဲခူး-ကျိုက်ထို အဝေးပြေးလမ်းပိုင်းသစ်တည် ဆောက်ရေးဖြစ်တယ်လို့ တွေ့ရှိပါတယ်။
စာချုပ်ပါအချက်အလက်တွေအရ ပဲခူး-ကျိုက်ထို အဝေးပြေးလမ်းပိုင်းအတွက် ယန်း ၂၇ ဒသမ ၇၇၉ ဘီလီယံ(ဒေါ်လာသန်း ၂၆၀ )ဝန်းကျင်၊အသေးစားအလတ်စားလုပ်ငန်းရှင်တွေအတွက် ဂျပန်ယန်း ၁၅ ဘီလီယံ ကို နှစ်စဥ်အတိုးနှုန်း ၀ ဒသမ ၀၁ ရာခိုင်နှုန်း၊ပြန်ဆပ်ရမယ့်ကာလကြာချိန် နှစ် ၄၀ နဲ့ ချေးငွေအတွက်မည်သည့်ချုပ်နှောင်မှုမှ မရှိဘူးလို့ ပါရှိပါတယ်။
