မုံရွာမှာ စစ်တပ်က အိမ်စီးကားတွေသုံးပြီး ပေါ်တာလိုက်ဆွဲနေ

စက်တင်ဘာ-၁၁၊၂၀၂၅။ဇေအောင်/People’s Spring

စစ်ကိုင်းတိုင်း၊ မုံရွာမြို့ပေါ်မှာ စစ်တပ်က အိမ်စီးကားတွေနဲ့ မြို့လုံးပတ် ပေါ်တာလိုက်ဆွဲနေပြီး လူငယ်အချို့ ဖမ်းဆီးခံလိုက်ရပါတယ်။

စစ်အုပ်စုဟာ အိမ်စီးကား ၅ စီးနဲ့ မြို့လုံးပတ်ကာ ပေါ်တာလိုက်ဆွဲနေတာဖြစ်တယ်လို့ဒေသခံတွေက ပြောပါတယ်။စက်တင်ဘာ ၁၀ ရက် ညနေပိုင်းကပဲ မုံရွာမြို့၊ ပြည်ထောင်စုလမ်း၊ အင်းကုန်းအဆင်းတောင်ဘက်မှာ လူငယ် ၂ ဦး၊ ရေဦးဆန်ဆိုင်ရှေ့မှာ ၄ ဦး စုစုပေါင်း ၆ ဦးကို အိမ်စီးကားတွေနဲ့ပတ်ပြီး ပေါ်တာဆွဲသွားကြောင်း ဒေသခံတွေက ပြောပါတယ်။

“AD Van ကားတွေနဲ့ကော ပတ်တာ။ ကမ်းနားတာရိုးဘက်တွေကော။ မနက်တိုင်းရှိတယ်။”လို့ မြို့ခံတဦးက ပြောပါတယ်။

Public Service Announcement

အရင်ရက်တွေကလည်း အလုပ်ကပြန်လာတဲ့လူငယ်တွေကို စစ်အုပ်စုက ပေါ်တာဆွဲလို့ လေးယောက်ထက်မနည်း ဖမ်းဆီးခံလိုက်ရတယ်လို့ သိရပါတယ်။

စက်တင်ဘာ ၆ ရက် မနက်ပိုင်းကလည်း ဆိုင်ကယ်စီးလာတဲ့ အမျိုးသမီး ၂ ဦးကိုပါ စစ်သားတွေက တားဆီးကာစစ်ဆေးပြီးပေါ်တာဆွဲဖမ်းဆီးသွားခဲ့ပါသေးတယ်။

ပေါ်တာဆွဲခံလိုက်ရတဲ့သူတွေကိုတော့ ဘယ်ကိုခေါ်သွားတယ်ဆိုတာ အတိအကျမသိရသေးဘဲ မိသားစုဝင်တွေက လိုက်လံစုံစမ်းနေရကြောင်း မြို့ခံတွေက ပြောပြပါတယ်။ စစ်အုပ်စုဟာ ငွေပေးနိုင်သူတွေကိုတော့ ပြန်လွှတ်ပြီး သိန်းရာချီတောင်းနေတယ်လို့ သိရပါတယ်။

စစ်ကောင်စီတပ်ရဲ့ ဖမ်းဆီးမှုတွေကြောင့် မုံရွာမြို့ပေါ်မှာ ရုံးတက်ရုံးဆင်းချိန်ကလွဲလို့ လူသွားလူလာ ကင်းရှင်းနေတယ်လို့မုံရွာမြို့ခံတွေကပြောပါတယ်။

စစ်ကောင်စီဟာ စစ်ကိုင်း၊ မုံရွာ၊ ရန်ကုန်၊ မန္တလေး စတဲ့မြို့ကြီးတွေမှာပါ လူငယ်တွေကို ပေါ်တာဆွဲဖမ်းဆီးနေပြီး စစ်မှုထမ်းအပတ်စဥ် (၁၇)ကို စတင်ဖို့ ကြိုးစားနေပါတယ်။