နိုဝင်ဘာ-၂၊ ၂၀၂၅။ဇေအောင်/People’s Spring
စစ်ကိုင်းတိုင်း၊ မုံရွာမြို့ပေါ်မှာ စစ်တပ်နဲ့ရဲတွေက သေနတ်တွေ၊ ကျည်ကာတွေနဲ့ လုံခြုံရေးအပြည့်ယူကာ ကထိန်လှည့်ခဲ့ကြောင်း မြို့ခံတွေက ပြောပါတယ်။
နိုဝင်ဘာ ၁ ရက်နဲ့ ဒီကနေ့ နိုဝင်ဘာ ၂ရက်က မုံရွာမြို့ပေါ်မှာ အာဏာသိမ်းစစ်ကောင်စီတပ်နဲ့ ရဲတပ်ဖွဲ့ဟာ သေနတ်တွေ၊ ကျည်ကာတွေ၊ ဂျန်မာတွေနဲ့ လုံခြုံရေးအပြည့်ယူပြီး ကထိန်လှည့်ခဲ့ကြောင်း မြို့ခံတွေက ပြောပါတယ်။
“မနေ့ကရဲ၊ ဒီကနေ့က စစ်တပ်။ ကျည်ကာတွေလည်းဝတ်ထားတယ်။ ဂျန်မာတွေနဲ့ကိုထွက်တာ။”လို့ မုံရွာမြို့ခံအမျိုးသားတဦးက ပြောပါတယ်။
Public Service Announcement
စစ်ကောင်စီတပ်ရဲ့ကထိန်မှာ ဒရုန်းနဲ့ဗုံးကြဲခံရမှာကြောက်လို့ ဂျန်မာကားနဲ့ ကထိန်လှည့်ခဲ့တာကြောင့် တမြို့လုံးဖုန်းလိုင်းတွေ ယာယီပြတ်တောက် သွားခဲ့ကြောင်း မြို့ခံတွေက ဆိုပါတယ်။
ဒါ့အပြင် စစ်ကောင်စီတပ်က လုံခြုံရေးအတွက် မုံရွာမြို့ပေါ်က လမ်းတွေပါပိတ်ထားခဲ့တယ်လို့ ဒေသခံတွေက ပြောပါတယ်။
စစ်ကောင်စီတပ်ဟာ မုံရွာမြို့ပေါ်မှာလည်း လာမယ့်တန်ဆောင်တိုင် ပျော်ပွဲ၊ရွှင်ပွဲတွေကို ပြုလုပ်ဖို့ စီစဥ်နေပြီး လူငယ်တွေကို ပေါ်တာဆွဲဖမ်းဆီးဖို့ စီစဥ်နေတယ်လို့ ဒေသခံတွေက ပြောပါတယ်။
စစ်တပ်ဟာ မုံရွာမြို့ပေါ်မှာ ပျော်ပွဲ၊ရွှင်ပွဲတွေ ပြုလုပ်နေပေမဲ့ မုံရွာပတ်ပတ်လည်မှာတော့ တော်လှန်ရေးအင်အားစုတွေနဲ့ တိုက်ပွဲတွေ ဖြစ်ပွားနေပါတယ်။
