နိုဝင်ဘာ ၂၅၊ ၂၀၂၅။ ဇေအောင်/People’s Spring
စစ်ကိုင်းတိုင်း၊ မုံရွာမြို့မှာ စစ်ကောင်စီက လုပ်မယ့် စျေးပွဲတော်မှာ ပြည်သူတွေဆီကအဓမ္မသိမ်းယူထားတဲ့ ပစ္စည်းတွေ ရောင်းချမယ်လို့ နီးစပ်သူတွေက ပြောပါတယ်။
မုံရွာမြို့၊ ပြည်သူ့ဥယျာဥ်မှာ လာမယ့် နိုဝင်ဘာလ ၂၈ ရက်ကနေ ဒီဇင်ဘာလ ၂ ရက်အထိ ၅ ရက်ကြာလုပ်မယ့် စစ်ကောင်စီရဲ့ စျေးရောင်းပွဲတော်မှာ မုံရွာနယ်က ပြည်သူတွေဆီကနေ အဓမ္မသိမ်းယူထားတဲ့ ပစ္စည်းတွေကို ရောင်းချမယ်လို့ သိရကြောင်း စစ်အုပ်စုနဲ့ နီးစပ်သူတွေက ပြောပါတယ်။
“ သိမ်းထားတဲ့ ပစ္စည်းတွေကို Second စျေးနဲ့ တဝက်စျေးနဲ့ရောင်းမှာ။ အဲကွန်းတွေကော အများကြီးပဲ။” လို့ မုံရွာမြို့ခံတစ်ဦးက ပြောပါတယ်။
Public Service Announcement
စစ်ကောင်စီဟာ အာဏာသိမ်းပြီးကတည်းက မုံရွာမြို့က ဆန္ဒပြပြည်သူတွေ၊ စီးပွားရေးလုပ်ငန်းရှင်တွေ၊ တော်လှန်ရေးမှာပါဝင်သူတွေရဲ့ နေအိမ်တွေကို ချိတ်ပိတ်ပြီး အိမ်အတွင်းထဲက ပစ္စည်းတွေပါ အဓမ္မသိမ်းဆည်းခဲ့တာပါ။ အခုစျေးရောင်းပွဲမှာ ချိတ်ပိတ်ခံရတဲ့ နေအိမ်တွေက ပစ္စည်းတွေ အများအပြား ပါဝင်နိုင်ကြောင်း မြို့ခံအချို့က ပြောပါတယ်။
ဒါ့အပြင် စစ်အုပ်စုက ၎င်းတို့လုပ်မယ့်ရွေးကောက်ပွဲလည်း နီးကပ်နေပြီမို့ ဒေသအေးချမ်းနေတယ်ဆိုတဲ့ပုံရိပ်ကို ပြသဖို့ စျေးပွဲတော်မှာ စတိတ်ရှိုးပါထည့်ဖို့ စီစဥ်နေကြောင်း သိရပါတယ်။
စျေးပွဲတော်အပြန် ပေါ်တာဆွဲနိုင်လို့ သတိပြုသွားလာကြဖို့ကိုလည်း တော်လှန်ရေးအင်အားစုတွေက သတိပေးထားပါတယ်။
