မုံရွာမြို့နယ် ကျေးရွာနှစ်ရွာကို စစ်တပ်မီးရှို့

ဒီဇင်ဘာ-၁၆၊ ၂၀၂၅။ ရှိန်း/People’s Spring

စစ်ကိုင်းတိုင်း၊ မုံရွာမြို့နယ်မှာ စစ်တပ်က စစ်ကြောင်းထိုးပြီး မီးရှို့ခဲ့လို့ နဂါးတွင်းနဲ့ ပေါက်ပင်ရွာက အိမ်ခြေ ၅၁လုံး မီးလောင်ပျက်စီးခဲ့တယ်လို့ မုံရွာမြို့နယ်၊ ပြည်သူ့ကာကွယ်ရေးအဖွဲ့က ပြောပါတယ်။

ဒီဇင်ဘာ ၁၅ ရက် မနေ့ မနက် ၁၁နာရီဝန်းကျင်က မုံရွာမြို့တောင်ဘက် စစ်အုပ်စုအထိုင်ချထားတဲ့ စွမ်းရည်ထက် ဆီဆိုင်ကနေထွက်လာတဲ့ အင်အား ၁၅၀ ကျော်ပါ စစ်အုပ်စုက ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ဆည်ကြီးတောရွာကို ဝင်မွှေကာ ဖောက်ထွင်းလုယက်ယူခဲ့ပြီး နဂါးတွင်းနဲ့ ပေါက်ပင်ရွာတို့ကို မီးရှို့ဖျက်ဆီးခဲ့တာလို့ သိရပါတယ်။

“ဆည်ကြီးတောကတော့ မီးရှို့ခံရတာ မရှိပေမယ့် အိမ်တွေ ဖောက်ထွင်းခိုးယူခံခဲ့ရပါတယ်”လို့ မုံရွာမြိုနယ်ပကဖတာဝန်ရှိသူတစ်ဦးက ပြောပါတယ်။

Public Service Announcement

ပြည်သူတွေက စစ်ကြောင်းတွေ ဝင်လာကတည်းက ရှောင်တိမ်းနေကြတာမို့ ဖမ်းဆီးခံရတာမျိုးမရှိခဲ့ဘူးလို့ သိရပါတယ်။

ဒီနေ့မှာ အဲဒီစစ်အုပ်စု စစ်ကြောင်း ပြန်သွားတာကြောင့် ဒေသခံတွေ နေရပ်ပြန်ဝင်ပြီး ရှင်းလင်းရေးတွေ လုပ်ဆောင်နေကြတယ်လို့ သိရပါတယ်။

မုံရွာမြို့နယ်ကို စစ်တပ်က စစ်ကြောင်းထိုးမီးရှို့ နေသလို လက်နက်ကြီးပစ်ခတ်တာ၊ လေကြောင်းတိုက်ခိုက်တာတွေလည်း ဆက်တိုက်ပြုလုပ်နေတယ်လို့ ဒေသတွင်း သတင်းရင်းမြစ်တွေက ပြောပါတယ်။