ဒီဇင်ဘာ-၁၆၊၂၀၂၅။ ဆန်အောင်/People’s Spring
အာဏာသိမ်းစစ်အုပ်စုကျင်းပမယ့် ရွေးကောက်ပွဲဟာ အတုအယောင်ရွေးကောက်ပွဲ ဖြစ်ကြောင်း ပြည်သူလူထုက ထုတ်ဖော်ပြောဆိုပြသနိုင်ဖို့ ကိုယ့်ရဲ့လူမှုကွန်ရက်စာမျက်နှာမှာ REJECT SHAM ELECTION စာသားပါ Profile Picture ပြောင်းလဲရေး ကမ်ပိန်းမှာ ပြည်သူတွေ ပါဝင်ကြဖို့ စစ်တပ်ရွေးကောက်ပွဲ ဆန့်ကျင်ရေးလှုပ်ရှားမှုတွေ ဆက်တိုက်ဖော်ပြနေတဲ့ Anti Sham Election(တရားမဝင်အတုအယောင်ရွေးကောက်ပွဲဆန့်ကျင်ရေး) ဖေ့စ်ဘွတ်ခ် စာမျက်နှာက တိုက်တွန်းထားပါတယ်။
စစ်အုပ်စုရဲ့ရွေးကောက်ပွဲဟာ ပြည်သူတွေရဲ့ ရွေးကောက်ပွဲမဟုတ်ပဲ ရာဇဝတ်မှုတွေကို ဆက်လက်ကျူးလွန်နိုင်ဖို့ ခေါင်းစဉ်ပြောင်းတဲ့ အတုအယောင်ရွေးကောက်ပွဲသာဖြစ်လို့ အဲဒီ ရွေးကောက်ပွဲကို ပြည်သူတွေကလက်မခံကြောင်း နိုင်ငံတကာကသိအောင် ဆိုရှယ်မိဒီယာတွေကတဆင့် ဖော်ထုတ်နိုင်ဖို့ အခုလို လုပ်ဆောင်တာဖြစ်ပါတယ်။
Facebook အပါအဝင် တခြားသော Social Media အကောင့်တွေမှာ Profile picture ပြောင်းပြီး ရွေးကောက်ပွဲကို လက်မခံကြောင်း ပြသကြဖို့ တိုက်တွန်းထားပြီး Profile Picture ပြောင်းလဲရာတွင် အသုံးပြုရန် ပုံကိုလည်း ဖော်ပြထားပါတယ်။
Public Service Announcement
ယခုလှုပ်ရှားမှုဟာ လွတ်မြောက်နယ်မြေမှာ အခြေချနေထိုင်နေသူတွေ ပြည်ပနိုင်ငံတစ်ခုခုမှာ ရောက်ရှိနေထိုင်နေသူတွေနဲ့ လုံခြုံရေးစိတ်ချရသူတွေသာ ပါဝင်လှုပ်ရှားရန်ဖြစ်ကြောင်းလည်း အသိပေးထားပါတယ်။
“အဓိကတော့ ရွေးကောက်ပွဲဆိုတာ ပြည်သူ့ဆန္ဒကို ဖော်ထုတ်တဲ့ပွဲဖြစ်တယ်။ ဒီတရားမဝင်အတုအယောင်ရွေးကောက်ပွဲကို အလိုမရှိဘူး ဒါဟာ အတုအယောင်ဖြစ်တယ်ဆိုတာ ပြည်သူတွေက များများပြောနိုင်လေလေ ကောင်းလေလေပဲပေါ့။ အဲဒီအတွက်ကြောင့် ဒီလိုမျိုးကမ်ပိန်းတွေမှာ တက်နိုင်သမျှ ပြည်သူလူထုအနေနဲ့ နည်းလမ်းပေါင်းစုံနဲ့ ပါဝင်ကြဖို့ တိုက်တွန်းလိုပါတယ်”လို့ စစ်တပ်ရွေးကောက်ပွဲ ဆန့်ကျင်ရေးလှုပ်ရှားမှုမှာ ပါဝင်ဆောင်ရွက်နေသူတဦးက ပြောပါတယ်။
ပြည်သူသန်းပေါင်းများစွာက မြန်မာရာဇဝတ် စစ်အုပ်စုရဲ့ရွေးကောက်ပွဲကို ဆန့်ကျင်ကြောင်း ထုတ်ဖော်ပြသနေကြတာကြောင့် ကမ္ဘာတဝန်းမှအစိုးရတွေ အနေနဲ့ မြန်မာပြည်သူတွေနဲ့ အတူ ရပ်တည်ဖို့၊ မြန်မာပြည်သူတွေရဲ့ အသံကို နားထောင်ဖို့နဲ့ စစ်အုပ်စုရဲ့ ရွေးကောက်ပွဲလုပ်ငန်းစဉ်အား နိုင်ငံရေးတရားဝင်မှုပေးခြင်းကို ငြင်းပယ်ကြဖို့လည်း တောင်းဆိုထားပါတယ်။
“စစ်အုပ်စုရဲ့ အတုအယောင် ရွေးကောက်ပွဲကို အာဏာရှင်မိတ်ဖက် ရုရှား၊ တရုတ်၊ ဘယ်လားရုတ်စ်နဲ့ အာဆီယံနိုင်ငံအချို့တို့က အားပေးအားမြှောက် ပြုလုပ်နေတာပါ။ ဒါဟာ ရာဇဝတ်ဂိုဏ်း စစ်အုပ်စုရဲ့ အကြမ်းဖက်မှုတွေ၊ စစ်ရာဇဝတ်မှုတွေ နိုင်ငံတွင်းမှာ ခုထက် ပိုမိုဆိုးဝါးစွာ လုပ်ဆောင်နိုင်ဖို့ ပံ့ပိုးပေးနေတာလည်း ဖြစ်ပါတယ်။ ဒါကြောင့် စစ်အုပ်စုပြင်ဆင်နေတဲ့ အတုအယောင် ရွေးကောက်ပွဲကို နိုင်ငံတကာ အစိုးရတွေအနေနဲ့ အသိမှတ်မပြုဖို့အတွက် မြန်မာ ပြည်သူတွေ နည်းလမ်းပေါင်းစုံနဲ့ တောင်းဆိုနေကြတာပါ”လို့ အသိပေးပါတယ်။
စစ်တပ်ကျင်းပမယ့် ရွေးကောက်ပွဲဟာ မြန်မာလူထုရဲ့ ပြည်သူ့ဆန္ဒ လုံးဝ (လုံးဝ) မပါဝင် ကြောင်းနဲ့ လက်မခံကြောင်း နိုင်ငံတကာ အစိုးရတွေကို နည်းလမ်းပေါင်းစုံနဲ့ ပြောဖို့လိုအပ်ကြောင်းလည်း တိုက်တွန်းနှိုးဆော်ထားပါတယ်။
