မတ်-၂၀၊၂၀၂၆။တေဇ/People’s Spring
ပြည်သူ့ကာကွယ်ရေးတပ်ရဲ့ စစ်ဆင်ရေးနယ်မြေ ၂ မှာ အရေးပေါ်လိုအပ်နေတဲ့ ဆေးရုံ ဆောက်လုပ်ဖို့ သူပုန်မိန်းမ ကမ်ပိန်းပြုလုပ်သွားမယ်လို့ ဒီနေ့ (မတ်၂၀) အသိပေးထားပါတယ်။
“သူပုန်ဖြစ်ရတာ မလွယ်ဘူး၊ ခက်ခဲပါတယ်။ သုပုန်မိန်းမ ဖြစ်ရတာ ပိုပြီးခက်ခဲပါတယ်။အခက်အခဲကြားက ရှင်သန် ရပ်တည် နေကြသောသူပုန်များရဲ့ မိန်းမတွေရော ကိုယ်တိုင်သူပုန်ဖြစ်နေကြတဲ့ သူပုန်မိန်းမတွေရောတော်လှန်ရေးမှာပါဝင်နေကြတဲ့ မိန်းမသားထုကို ကိုယ်စားပြုမယ့် သူပုန်မိန်းမ ကမ်ပိန်းမှာ ပါဝင်ပေးကြပါလ်ု့ မေတ္တာရပ်ခံပါတယ်။” လို့ ကမ်ပိန်းရဲ့ ဖေ့စ်ဘွတ်ခ်မှာ ကြေညာထားတာပါ။
ဒီကမ်ပိန်းက စစ်ကောင်စီက သူပုန်ကြေညာခံထားရတဲ့ ဒါရိုက်တာကိုပေါက်ရဲ့ ဇနီး မနီရဲ့ မတ် ၂၆ ရက်မှာ ကျရောက်မယ့် မွေးနေ့နဲ့ ဧပြီ ၇ မှာ ကျရောက်မယ့် ဒါရိုက်တာကိုပေါက်တို့ရဲ့ မင်္ဂလာနှစ်ပတ်လည် အမှတ်တရ အနေနဲ့ ပြုလုပ်တာဖြစ်ပါတယ်။
Public Service Announcement
“၁၇.၂.၂၀၂၁ မှာ ကျနော်ကိုဖမ်းဝရမ်းထုတ်လို့ ဝရမ်းပြေးသူပုန်စဖြစ်ပါတယ်။ ၁၇.၁၂.၂၀၂၁ မှာ မိန်းမနဲ့ သား၂ ယောက်နေတဲ့အိမ်ပေါက်ဝ တည့်တည့်ကို သေနတ်နဲ့ ၉ ချက် ပစ်ပြီး ကိုပေါက်မိသားစုကိုရှင်းဖို့လုပ်တာ ခံရပါတယ်။ ၁၇.၁.၂၀၂၂ မှာ မိသားစုပိုင်အိမ်ကို ချိတ်ပိတ်လိုက်ပါတယ်။” လို့ ပြည်သူ့ဘက်ရပ်တည်ခဲ့တာကြောင့် ကြုံခဲ့ရတဲ့ အကြောင်းကို ကိုပေါက်ကရင်ဖွင့်ထားပါတယ်။
သူပုန်ကြေညာခံရတာကြောင့် အိမ်ကထွက်ပြေးခဲ့ရတဲ့ အချိန်ကစပြီး လက်ရှိအချိန်အထိ သားနှစ်ယောက်အပေါ်မှာရော အိမ်ရဲ့စီးပွားရေးရော တော်လှန်ရေးမှာနောက်ဆံမတင်းဘဲ စိတ်ဖြောင့်ဖြောင့် လုပ်နိုင်အောင်ဇနီးဖြစ်သူက ကြိုးစားရပ်တည်ပေးခဲ့တာလို့ ကိုပေါက်ကပြောထားပါတယ်။
ဒီကမ်ပိန်းကနေ ငွေကျပ် သိန်း ၃၈၀၀ ရရှိဖို့ ရည်မှန်းထားပြီး ပြည်သူ့ကာကွယ်ရေးတပ်ရဲ့ စစ်ဆင်ရေးနယ်မြေ ၂ မှာ စစ်ရှောင်တွေ ပြည်သူတွေ နဲ့ တော်လှန်ရေးရဲဘော်တွေ ဆေးဝါးမပြည့်စုံမှုတွေကြောင့် အသက်ဆုံးရှုံးမှုတွေ ကိုယ်လက်အင်္ဂါစွန့်လွှတ်မှုတွေကို ကာကွယ်နိုင်ဖို့ ဆေးရုံဆောက်လုပ်ဖို့ ရည်ရွယ်ထားတာပါ။
ကမ်ပိန်းကာလကို ဒီနေ့ကနေ မေလ ၇ ရက်အထိ ၄၉ ရက်သတ်မှတ်ထားပြီး Package တွေနဲ့ လည်း ပါဝင်နိုင်တယ်လို့ အသိပေးထားပါတယ်။
Package လေးခုကို အမေရိကန်ဒေါ်လာ နှစ်ရာကနေ ငါးရာ အထိသတ်မှတ်ထားပြီး Package ဝယ်ယူသူတွေအတွက် ရတနာပစ္စည်းကံစမ်းမဲပါဝင်မယ်လို့ဆိုပါတယ်။
“Package နဲ့ ပါဝင်ဖို့ အဆင်မပြေလျှင်လည်း နိုင်သလောက် ပါဝင်လို့ရပါတယ်။” လို့ သူပုန်မိန်းမ ကမ်ပိန်းက အသိပေးထားပါတယ်။
