'/%3E%3C/svg%3E){kind=small}
ဒီဇင်ဘာ-၂၃၊၂၀၂၅။မိုမို/People’s Spring
မကွေးတိုင်း၊ပေါက်မြို့နယ်မြောက်ပိုင်းတိုက်ပွဲတွေမှာ စစ်ကောင်စီတပ်သား ၁၀ ဦးထက်မနည်းသေဆုံးပြီး တစ်ဦး လက်နက်ချအလင်းဝင်လာတယ်လို့ ပြည်သူ့တော်လှန်ရေးတပ်ဦး(PRF)က ဒီကနေ့(ဒီဇင်ဘာ ၂၃ရက်)မှာ ထုတ်ပြန်ပါတယ်။
ပေါက်မြို့နယ်မြောက်ပိုင်းကျေးရွာတွေကို စစ်ကြောင်းထိုးလာတဲ့ စစ်ကောင်စီတပ် စစ်ကြောင်းနဲ့ ဒီဇင်ဘာ ၉ရက်၊၁၀ ရက်၊ ၁၆ရက်နဲ့ ဒီဇင်ဘာ ၂၀ရက်တွေမှာ တိုက်ပွဲဖြစ်ခဲ့တယ်လို့ ဆိုပါတယ်။
တိုက်ပွဲတွေအတွင်းမှာ စစ်ကောင်စီတပ်က ၁၂ ဦး သေပြီး ၃၇ ဦးထက်မနည်း ဒဏ်ရာရကာ တပ်သားတစ်ဦး MA4 လက်နက်နဲ့ လက်နက်ချလာတယ်လို့ အသိပေးပါတယ်။ဒါပေမယ့် စစ်ကောင်စီတပ်က သေဆုံးထိခိုက်မှုတွေနဲ့ပတ်သက်လို့ လူထုနွေဦးက သီးခြားအတည်မပြုနိုင်သေးပါဘူး။
Public Service Announcement
တိုက်ပွဲမှာ ပေါက်မြို့နယ်ဒေသခံကာကွယ်ရေးတပ်ဖွဲ့ဝင်တစ်ဦးနဲ့ မကွေးပြည်သူ့ကာကွယ်ရေးတပ်မတော်(MGY-PDF)က ရဲဘော် တစ်ဦးကျဆုံးပြီး ရဲဘော်ငါးဦး ထိခိုက်ခဲ့တယ်လို့ သိရပါတယ်။
စစ်ကောင်စီတပ်စစ်ကြောင်းရဲ့ ရက်သတ္တပတ်နှစ်ခုကျော်ကြာ ထိုးစစ်ဆင်ခဲ့မှုမှာ ကျေးရွာတွေကို ဖျက်ဆီးခဲ့တယ်လို့ ထုတ်ပြန်ချက်မှာ ဖော်ပြပါတယ်။
“ရွေးကောက်ပွဲ နီးကပ်လာတဲ့အချိန်မှာ နယ်မြေအရ ပြန်ပြီးထိန်းချင်တဲ့ သဘောရတယ်”လို့ စစ်ကောင်စီတပ်စစ်ကြောင်းနဲ့ပတ်သက်လို့ PRF တာဝန်ရှိသူက ပြောပါတယ်။
အဲဒီစစ်ကြောင်းကို PRF ၊ပြည်သူ့ဒီမိုကရက်တစ်တပ်တော်(PDO/PDA)၊ ကျောင်းသားလက်ရုံးတပ်တော်(SAF)၊ နယ်စည်းမခြား ပြည်သူ့ကာကွယ်ရေးတပ်ဖွဲ့(ပခုက္ကူ) (BORDERLESS)၊မကွေးပြည်သူ့ကာကွယ်ရေးတပ်မတော်(MGY-PDF)၊Phoenix Guerrilla Force(ဖီးနစ်ပြောက်ကျားတပ်ဖွဲ့)၊ပေါက်၊ မြိုင် (ပကဖ) နဲ့ BLYပြည်သူ့ကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့ကြတယ်လို့ဆိုပါတယ်။
စစ်ကောင်စီတပ်က ပေါက်မြို့နယ်မှာရှိတဲ့ အမှတ်(၂၄)ကာကွယ်ရေးပစ္စည်းစက်ရုံ (ကပစ -၂၄) ကနေပြီး ပေါက်မြို့နယ်မြောက်ပိုင်းကို အခုနှစ် အောက်တိုဘာကတည်းက စစ်ကြောင်းထိုးနေတာ ဖြစ်ပါတယ်။
“စစ်ကြောင်းကတော့ မပြတ်သေးဘူး။ညောင်ရင်းရွာထဲ ပဲရှိနေသေးတယ်။ဖြစ်နိုင်တာကတော့ ဇီးပြား(ပျူစောထီး)ရွာကို သွားဖို့များတယ်”လို့ ပေါက်မြို့နယ် စစ်ရေးသတင်းရင်းမြစ်က ပြောပါတယ်။
အခုနှစ် သြဂုတ်က ပခုက္ကူတပ်မ(၁၀၁) ကနေ ကပစ(၂၄)ကို အင်အား ၁,၀၀၀ ဝန်းကျင် ဖြည့်တင်းခဲ့ပါတယ်။အဲဒီနောက် ပေါက်၊ဆိပ်ဖြူ အပါအဝင် ယောဒေသဘက်ကို စစ်ကောင်စီတပ်က စစ်ကြောင်းထိုးတွေဖြန့်ကျက်ပြီး ထိုးစစ်ဆင်နေတာလို့ သိရပါတယ်။
