ဒီဇင်ဘာ-၂၆၊၂၀၂၅။တေဇ/People’s Spring
စစ်ကောင်စီ သတင်းတွေကိုဖော်ပြတဲ့ MWD News (မြဝတီသတင်း)စာမျက်နှာကို Tik Tok ကနေ ဖယ်ရှားလိုက်တယ်လို့ Justice For Myanmarက အသိပေးထားပါတယ်။
“ Justice For Myanmarသည် TikTokထံ စာရေးသားပေးပို့၍ စစ်အုပ်စုအကောင့်များအတွက် ဝန်ဆောင်မှုများ ဆက်လက်ပေးအပ်နေမှုများနှင့်ပတ်သက်ပြီး ဒဏ်ခတ်ပိတ်ဆို့မှုများကို လိုက်နာဆောင်ရွက်မှုနှင့် လူ့အခွင့်အရေးဆိုင်ရာစိုးရိမ်မှုများအပေါ် မေးခွန်းထုတ်ပြောကြားခဲ့ပြီးနောက် ယခုကဲ့သို့ TikTok က MWD News (မြဝတီ သတင်း)အကောင့်အား ဖြုတ်ချလိုက်ခြင်းလည်းဖြစ်သည်။” လို့ JFMက ဒီနေ့ (ဒီဇင်ဘာ၂၆) ထုတ်ပြန်ထားပါတယ်။
MWD Newsကို စစ်ကောင်စီရဲ့ ပြည်သူ့ဆက်ဆံရေးနှင့်စိတ်ဓါတ်စစ်ဆင်ရေးညွှန်ကြားရေးမှူးရုံးက ကြီးကြပ်လုပ်ဆောင်နေတာလို့သိရပါတယ်။
Public Service Announcement
ရွေးကောက်ပွဲနီးလာချိန်မှာ စစ်ကောင်စီရဲ့ မီဒီယာအကောင့်တွေနဲ့ ဝါဒဖြန့်အကောင့်တွေကို နည်းပညာကုမ္ပဏီတွေက သူတို့ရဲ့ ပလက်ဖောင်းတွေကနေဆက်တိုက် ဖယ်ရှားနေတာပါ။
တိုက်ရိုက်ထုတ်လွှင့်မှုပလက်ဖောင်းဖြစ်တဲ့ Amazonကုမ္ပဏီရဲ့Twitch ၊ ဩစတေးလျနိုင်ငံ အခြေစိုက် Kick တို့က စစ်ကောင်စီအတွက် ဝါဒဖြန့်ပေးနေတဲ့ အကောင့်တွေကို ဖယ်ရှားခဲ့ပါတယ်။
ဒါ့အပြင် ဖေ့စ်ဘွတ်ခ် ၊ ယူကျူ့ကလည်း စစ်ကောင်စီရဲ့ ဝါဒဖြန့်အကောင့်တွေကို ဖျက်သိမ်းခဲ့သလို ဝါဒဖြန့်သတင်းစာတွေရဲ့ PDF ဖိုင်တွေကို သိမ်းဆည်းတဲ့ MediaFireကလည်း ဖျက်သိမ်းခဲ့တယ်လို့ သိရပါတယ်။
“ TikTokနှင့် အခြားနည်းပညာကုမ္ပဏီအားလုံးအနေဖြင့် ကျန်ရှိနေသေးသည့် စစ်အုပ်စု၏ ဝါဒမှိုင်းဖြန့်အကောင့်များအား ဖြုတ်ချရန်နှင့် ၄င်းတို့၏ပလက်ဖောင်းများအား စစ်အုပ်စုက အသုံးပြုနေခြင်းကို ပိတ်ပင်ရန် Justice For Myanmarက ဆက်လက် တောင်းဆိုပါသည်။” လို့ JFMက ထပ်မံတောင်းဆိုထားပါတယ်။
