ဒီဇင်ဘာ – ၂၆ ၊၂၀၂၅၊ နိုင်ပကောင်း/People’s Spring
ကျားဖြန့်ကြောင့် အမေရိကန် အစိုးရ ရဲ့ ပိတ်ဆို့အရေးယူမှုခံရပြီးနောက် ဒီမိုကရေစီအကျိုးပြုကရင်တပ်မတော်(DKBA)က ထပ်ပိုင်းခေါင်းဆောင်အပြောင်းအလဲ ပြုလုပ်လာပါတယ်။
ပိတ်ဆို့အရေးယူခံရပြီးတစ်လကျော်အကြာမှာ စစ်ဦးစီးချုပ်အပြောင်း အလဲပြုလုပ်တာကို DKBA က ဒီဇင်ဘာလ ၂၆ ရက်မှာ ထုတ်ပြန်ပါတယ်။
စစ်ဦးစီးချုပ် ဗိုလ်ချုပ်ကြီးစောစတီးကို DKBA ဗဟိုအကြံပေးအဖွဲ့ ဦးဆောင် နာယကကြီးအဖြစ် တာဝန်ပေးခန့်အပ်လိုက်ပြီး စစ်ဦးစီးချုပ်သစ်အဖြစ် ဒုစစ်ဦးစီးချုပ်ဖြစ်သူ ဒုဗိုလ်ချုပ်ကြီးစောရွှေဝကို ဗိုလ်ချုပ်ကြီးအဆင့်နဲ့ တာဝန်ပေးခန့်အပ်လိုက်တယ်လို့ DKBA က ထုတ်ပြန်ထားပါတယ်။
Public Service Announcement
စစ်ဦးစီးချုပ်သစ်အဖြစ်လာသူ ဗိုလ်ချုပ်ကြီးစောရွှေဝဟာ အမေရိကန်ရဲ့ ပိတ်ဆို့အရေးယူမှုမှာ မပါဝင်ပါဘူး။
ဗိုလ်ချုပ်ကြီးစောစတီး ကတော့ အသက် ၆၅ နှစ်ပြည့်သွားတဲ့အတွက် တပ်ဖွဲ့ စည်းမျည်းအတိုင်း အနားယူသွားတာလို့ သိရပါတယ်။
အမေရိကန် နိုင်ငံသားတွေကို ပစ်မှတ်ထားငွေလိမ်တဲ့ ကျားဖြန့်လို့ လူသိများတဲ့ အွန်လိုင်းငွေလိမ်လုပ်ငန်းတွေနဲ့ ပတ်သက်ဆက်စပ်လို့ဆိုပြီး DKBA ထိပ်ပိုင်းခေါင်းဆောင် လေးဦးဖြစ်တဲ့ စစ်ဦးစီးချုပ် ဗိုလ်ချုပ်ကြီးစောစတီး၊ စစ်ဦးစီးအရာရှိချုပ် ဗိုလ်ချုပ်စောဆန်းအောင်၊ အမှတ်(၁)စစ်ကွပ်ရေးမှုး ဗိုလ်မှူးချုပ်စိုင်းကျော်လှ၊ စစ်ရေးချုပ် ဗိုလ်မှုးချုပ်စောစိန်ဝင်းတို့ ကိုအမေရိကန်အစိုးရက ပိတ်ဆို့အရေးယူထားတာပါ။
တပ်ဖွဲ့ရဲ့ ထိပ်ပေါင်းခေါင်းဆောင်အပြောင်းအလဲမှာ အမှတ်(၂)စစ်ကွပ်ကဲရေးမှုးဗိုလ်မှုးချုပ်စောဘငြိမ်းအောင်ကို ဒုတိယဗိုလ်ချုပ်ကြီးအဆင့်နဲ့ ဒုတိယစစ်ဦးစီးချုပ်၊ အမှတ်(၁)စစ်ကွပ်ကဲရေးမှုး ဗိုလ်မှုးချုပ်စိုင်းကျော်လှက ဗိုလ်ချုပ်အဆင့်နဲ့ ဗဟိုစီးပွားရေးကော်မတီ ဥက္ကဋ္ဌဖြစ်လာပါတယ်။
ဗိုလ်ချုပ်အဆင့်နဲ့ ရာထူးတိုးသွားပြီး အမေရိကန်ရဲ့ ပိတ်ဆို့အရေးယူမှုစာရင်းမှာပါဝင်တဲ့ စိုင်းကျော်လှဟာ ကျားဖြန့်နဲ့ ပတ်သက်လို့ နာမည်ဆိုးနဲ့ ကျော်ကြားတဲ့ ထိုင်း-မြန်မာနယ်စပ်နား ကျောက်ခက်ဒေသကို ထိန်းချုပ်ထားတဲ့ ထိပ်ပိုင်းခေါင်းဆောင်တစ်ဦးပါ။
ဒါအပြင် ထိုင်း-မြန်မာနယ်စပ် ကြာအင်းဆိပ်ကြီးမြို့နယ်၊ ဘုရားသုံးဆူမြို့ကို ထိန်းချုပ်ထားတဲ့ DKBA ရဲ့ အမှတ်(၂)စစ်ကွပ်ကဲရေးနည်းဗျူဟာမှုး ဗိုလ်မှုးကြီးစောအေဝမ်းကို ဗိုလ်မှူးချုပ်အဆင့်နဲ့ အမှတ်(၂)စစ်ကွပ်ကဲရေးမှုး တာဝန်ပေးခန့်အပ်လိုက်ပါတယ်။
ဘုရားသုံးဆူမြို့ဟာလည်း ကျားဖြန့် ကြောင့် နာမည်ဆိုးထွက်နေပါတယ်။
တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA) ကို ဦးသိန်းစိန်အစိုးရ လက်ထက်မှာ DKBA ဟာ လက်မှတ်ရေးထိုးထားတာဖြစ်ပြီး အာဏာသိမ်းစစ်ကောင်စီနဲ့လည်းနေပြည်တော်မှာ တွေ့ဆုံဆွေးနွေးမှုတွေရှိခဲ့တဲ့ အဖွဲ့ဖြစ်ပါတယ်။
စစ်ကောင်စီက ကျင်းပမယ့် ရွေးကောက်ပွဲကိုလည်း ထောက်ခံကူညီမယ်လို့ DKBA က ကြေညာချက်ထုတ်ထားပါတယ်။
