ဇန်နဝါရီ-၁၊၂၀၂၅။အိမ်သွင်/People’s Spring
စစ်တပ်က သံတွဲမြို့ပေါ်ကိုယမန်နေ့ညမှာ ဗုံးကြဲခဲ့မှုကြောင့် နှစ်ပေါင်းရာချီသက်တမ်းရှိတဲ့ ရှေးဟောင်းနေအိမ်တချို့ပျက်စီးဆုံးရှုံးခဲ့ပြီး လူသုံးဦး ဒဏ်ရာရရှိခဲ့တယ်လို့ ဒေသခံအချို့ကပြောပါတယ်။
အာဏာသိမ်းစစ်တပ်ကသံတွဲမြို့၊ အမှတ် (၁) ရပ်ကွက်အတွင်းကို ဒီဇင်ဘာ ၃၁ ရက်နှစ်သစ်ကူးည ၇ နာရီ၂၈မိနစ်အချိန်မှာဗုံးကြဲခဲ့တာပါ။
“ကိုလိုနီခေတ်ကအိမ်ကြီးကိုတည့်တည့်ကြဲတာ။ ပတ်ဝန်းကျင်က အိမ်ကြီးအိမ်ကောင်းတွေလည်းကုန်တယ်။ည၁၀နာရီကျော်မှ မီးငြှိမ်းသတ်နိုင်ပါတယ်”လို့ မြို့ခံတဦးကပြောပါတယ်။
Public Service Announcement
ရှေးဟောင်းအိမ်လေးလုံးအပါအဝင် အိမ်ကိုးလုံးပျက်စီးခဲ့ပြီး လူသုံးဦး ဒဏ်ရာရခဲ့တယ်လို့ ဒေသခံကပြောပါတယ်။
နှစ်သစ်ကူးညမှာ လေကြောင်းတိုက်ခိုက်မှုကြောင့်လူနေအိမ်အချို့ မီးလောင်နေတယ်လို့ တိုက်ခိုက်ခံရပြီးမိနစ်ပိုင်းအကြာမှာအာရက္ခတပ်တော်(AA)က သတင်းထုတ်ပြန်ခဲ့ပါတယ်။ နောက်ဆက်တွဲအခြေနေကိုမထုတ်ပြန်သေးပါဘူး။
ဒီဇင်ဘာလ၂၉ရက်နေ့ညကလည်း သံတွဲမြို့နယ်၊ ငပလီမြို့ကို စစ်ကောင်စီက လေကြောင်းကနေ ဗုံးကြဲလို့ ကလေးငယ် သုံးဦးအပါအဝင် ကိုးဦးသေဆုံးပြီး ၂၃ဦး ဒဏ်ရာရခဲ့ပါတယ်။ နေအိမ် ၂၃ လုံးလည်းပျက်စီးခဲ့ပါတယ်။
AAဟာ ငပလီကမ်းခြေဒေသပါဝင်တဲ့ သံတွဲမြို့ကို ၁၀၂၇ စစ်ဆင်ရေးနဲ့အတူ တိုက်ခိုက်သိမ်းပိုက်ခဲ့တာဖြစ်ပါတယ်။ စစ်တပ်က ပြီးခဲ့တဲ့ စက်တင်ဘာလကစတင်ပြီး သံတွဲမြို့ကို လေကြောင်းအပြင် ရေတပ်သင်္ဘောတွေပေါ်ကနေလည်း လက်နက်ကြီးတွေနဲ့ပစ်ခတ်တိုက်ခိုက်နေလို့ လုံခြုံရေးသတိပြုကြဖို့ AA သတိပေးချက်ထုတ်ပြန်ထားပါတယ်။
